Rauf Zeyni: “...ictimai nəzarətlə bağlı vəziyyəti tam olaraq dəyərləndirməlidir”
“Azərbaycanda korrupsiyaya, rüşvətxorluğa qarşı mübarizə amansız aparılmalıdır. Bu məsələ ilə bağlı mən öz fikirlərimi bildirmişdim, bir daha demək istəyirəm ki, Azərbaycanın uğurlu inkişafı, ölkəmizin dayanıqlı inkişafı üçün xoşagəlməz hallara son qoyulmalıdır. Siz də rəhbərlik edəcəyiniz rayonlarda bütün xoşagəlməz hallara qarşı öz işinizlə ciddi mübarizə aparmalısınız. Korrupsiyanın, rüşvətxorluğun, talançılığın kökü kəsilməlidir. Bu sahədə sizin dövlət tərəfindən böyük dəstəyiniz olacaqdır, eyni zamanda, geniş ictimaiyyəti də bu işlərə cəlb edin. Çünki ictimai nəzarət xoşagəlməz hallara qarşı mübarizədə çox önəmli amildir. Mən şadam ki, son müddət ərzində ictimai nəzarət mexanizmləri təkmilləşir. Birinci növbədə siz vəziyyəti təhlil etməlisiniz və insanları narahat edən problemləri həll etməlisiniz...”.
Bu fikirləri Prezident İlham Əliyev mayın 21-də Seymur Orucovu Ağstafa Rayon İcra Hakimiyyətinin, Elçin Rzayevi isə İmişli Rayon İcra Hakimiyyətinin başçısı vəzifələrinə təyin olunmaları ilə əlaqədar videoformatda qəbul edərkən bildirib.
İcra başçıları ictimai nəzarət mexanizminə lazımı önəm verə biləcəkmi?
- “Korrupsiyaya qarşı mübarizə ilə əlaqədar olaraq icra orqanları ilə qeyri-hökumət təşkilatlarının əməkdaşlığının yeni mərhələsi başlanmalıdır”
Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni “Bakı-Xəbər”ə bildirdi ki, Prezident İlham Əliyevin ölkəmizdə həyata keçirdiyi islahatlar davam edir və davam edəcək də, vətəndaş cəmiyyəti də bu islahatlara öz töhfəsini verir. “Əlbəttə, biz daha geniş iştirak etmək istəyirik. Cənab Prezident hər dəfə yeni kadrlar təyin edərkən və onları qəbul edib tövsiyələrini verərkən həmişə ictimai nəzarət məsələsinə xüsusilə toxunur. Prezident Ağstafa və İmişlinin yeni təyin etdiyi icra başçılarını vidoformatda qəbul edərkən də bir daha islahatlar məsələsinə toxundu, rüşvətxorluğa, korrupsiyaya qarşı mübarizənin çox vacibliyini və bu kimi neqativ halların kökünün kəsilməli olduğunu bildirdi. Həmçinin də bu kimi hallarla mübarizədə ictimai nəzarətin gücləndirilməsini çox vacib amil olaraq qiymətləndirdi. Bu da vətəndaş cəmiyyəti təmsilçiləri, ictimaiyyətin üzvü olaraq bizim üzərimizə çox böyük vəzifələr qoyur. Biz də öz işimizi elə qurmalıyıq ki, ölkədə qanunlar çərçivəsində geniş ictimai nəzarəti həyata keçirə bilək. Qeyri-hökumət təşkilatları, vətəndaş cəmiyyəti bu istiqamətlərdə şəffaflığın təmin olunmasında, monitorinqlərin aparılmasında daha geniş səviyyədə iştirak etməlidir, edir də. Biz gərək bütün imkanlardan istifadə edib bütün potensialımızı bu məsələ ilə bağlı səfərbər edək ki, ölkə başçısının apardığı islahatlara ictimai dəstək verə bilək”.
R.Zeyninin fikrincə, ölkə başçısının etdiyi çağırışlar, verdiyi göstərişlər bütün yerli və mərkəzi icra hakimiyyəti orqanlarına əsas göstəriş hesab olunmalıdır: “Mərkəzi və yerli icra hakimiyyəti orqanları həm qanunlarımıza, həm də Prezidentin çağırışlarına və tapşırıqlarına uyğun olaraq ictimai nəzarətlə bağlı vəziyyəti tam olaraq dəyərləndirməlidir. Hansı icra hakimiyyəti orqanı indiyə qədər ictimai şura yaratmayıbsa, onlar ictimai şuralar yaratmalıdırlar. Bütövlükdə, korrupsiyaya qarşı mübarizə ilə əlaqədar olaraq icra orqanları ilə qeyri-hökumət təşkilatlarının əməkdaşlığının yeni mərhələsi başlanmalıdır. Düşünürəm ki, bu il bu sahədə həm “Könüllülər ili” çərçivəsində, həm də ictimai nəzarətin gücləndirilməsi, şəffaflığın artırılması, birgə monitorinqlərin həyata keçirilməsi, ölkədə şəffaflığın təmin olunması ilə bağlı çox böyük irəliləyişlər gözlənir. Bu da mütləq baş verməlidir. Çünki bu, bilavasitə ölkə başçısının tapşırığıdır. Bununla əlaqədar olaraq yerli və mərkəzi icra hakimiyyəti orqanlarına nə kimi dəstək vermək lazımdırsa, Milli Qeyri-Hökumət Təşkilatları Forumu olaraq əlimizdən gələni etməyə hazırıq”.
İradə SARIYEVA
