04/07/2020 13:25
728 x 90

Rayonlarda rüşvətin kökünü kəsmək mümkündürmü - Prezident bütün rayonlar üçün aktual məsələni gündəmə gətirdi...

Rasim Quliyev: “Cənab Prezidentin təyin etdiyi yeni kadrlar bu sahədə cəmiyyətə nümunə olmalıdır”

img

Prezident İlham Əliyev Ağstafa və İmişli rayonlarına yeni təyin olunan icra başçılarını videoformatda qəbul edərkən Azərbaycanda korrupsiyaya, rüşvətxorluğa qarşı mübarizənin amansız aparılmasının vacibliyini bildirib:

"Mən sizi bu gün Ağstafa və İmişli rayonlarının icra hakimiyyəti başçısı vəzifələrinə təyin edirəm. Sizə böyük etimad göstərilir. Siz bu etimadı öz işinizlə doğrultmalısınız. Ağstafa və İmişli rayonlarının icra hakimiyyəti başçıları həbs olunub. Bu barədə ictimaiyyətə məlumat verilib. İndi istintaq gedir və hüquq-mühafizə orqanları hər şeyi müəyyən edəcək. Artıq ictimaiyyət məlumatlandırılıb. Ağstafa və İmişli rayonlarında icra hakimiyyəti başçıları tərəfindən edilmiş bu pozuntular digər rayonlarda da mövcud olub və bir neçə icra hakimiyyəti başçısı artıq istintaqa cəlb edilib. Bu bir daha onu göstərir ki, Azərbaycanda korrupsiyaya, rüşvətxorluğa, talançılığa qarşı mübarizə sözdə yox, əməldə aparılır və bu mübarizə bundan sonra da aparılacaq. İndi həm yerli, həm də mərkəzi icra orqanlarının fəaliyyəti araşdırılır və yol verilmiş bütün pozuntular üzə çıxacaq. Azərbaycanda korrupsiyaya, rüşvətxorluğa qarşı mübarizə amansız aparılmalıdır. Bu məsələ ilə bağlı mən öz fikirlərimi bildirmişdim, bir daha demək istəyirəm ki, Azərbaycanın uğurlu inkişafı, ölkəmizin dayanıqlı inkişafı üçün xoşagəlməz hallara son qoyulmalıdır. Siz də rəhbərlik edəcəyiniz rayonlarda bütün xoşagəlməz hallara qarşı öz işinizlə ciddi mübarizə aparmalısınız. Korrupsiyanın, rüşvətxorluğun, talançılığın kökü kəsilməlidir. Bu sahədə sizin dövlət tərəfindən böyük dəstəyiniz olacaqdır, eyni zamanda, geniş ictimaiyyəti də bu işlərə cəlb edin. Çünki ictimai nəzarət xoşagəlməz hallara qarşı mübarizədə çox önəmli amildir. Mən şadam ki, son müddət ərzində ictimai nəzarət mexanizmləri təkmilləşir. Birinci növbədə siz vəziyyəti təhlil etməlisiniz və insanları narahat edən problemləri həll etməlisiniz. Sizin həll etməyə gücünüz çatmayan məsələlər barədə müvafiq mərkəzi icra orqanlarına məlumat verin ki, bu məsələlər operativ şəkildə öz həllini tapsın”.

Göründüyü kimi, ölkə başçısı gənc başçılara təyin edildikləri rayonlarda rüşvət və korrupsiyanın kökünü  kəsməyi tapşırığını verib. Buna nail olmaq mümkündürmü?

İcra qurumlarında böyük iş təcrübəsi olan “Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, rüşvət və korrupsiya qədim zamanlardan mövcuddur və dünyanın bütün ölkələrini əhatə edir:“Neqativ proses kimi bu bəla bütün ölkələrin inkişafını əngəlləyir. Görürük ki, son dönəmdə ölkəmizdə bu bəla ilə bağlı daha sərt addımlar atılır. Həyata keçirilən məmur həbsləri buna misaldır. Cənab Prezident yeni icra başçılarının qarşısında bu vacib tələbi qoydu ki, maksimum dərəcədə rüşvətin qarşısını alsınlar. Təəssüflər olsun ki, biz bəzən məhz icra başçılarının özünün də rüşvətə qurşandığının şahidi oluruq. Onlar nəinki özləri rüşvət almamalıdır, eləcə də rəhbərlik etdikləri rayonda bunun qarşısının alınmasına çalışmalıdırlar. Başa düşürəm ki, bu problemi bir rayon çərçivəsində tam lokallaşdırmaq mümkün deyil. Görüdünüz ki, biz pandemiya ilə necə mübarizə apardıq. Yeri gələndə,  rüşvət də həmin virusdan geri qalmayan bir xəstəlik, epidemiya növüdür. Ölkə başçısı bu sahədə ardıcıl mübarizəyə start verib. Görünən budur ki, ölkə başısının qarşısına qoyduğu məqsəd bu bəlanın sonuna çatmaqdır və bu mübarizədə geriyə addımın olmadığı əzmkarlığı nümayiş edilir. Cənab Prezidentə bu məsələdə ictimai dəstək də güclü olmalıdır. Təsadüfi deyil ki, ölkə başçısı sonuncu qəbulda da icra başçılarına korrupsiya ilə mübarizə sahəsində ictimai nəzarət amillərinin gücləndirilməsinin vacibliyini bildirdi. Təbiidir ki, bu prosesdə ən başlıca rolu Prezidentin yerlərə təyin etdiyi icra başçıları oynamalıdır. Cənab Prezidentin təyin etdiyi yeni kadrlar bu sahədə cəmiyyətə nümunə olmalıdır. Bu elə bəladır ki, nəticələr tədricən mümkün olur. Rüşvətin tam kökünü kəsmək üçün, qanunların əlahiddəliyindən öncə, məktəblərin məbəd olması gərəkdir. Çalışmalıyıq ki,  bu bəla ilə biz məktəblərdən başlayaraq mübarizə aparaq. Çünki bizim vətəndaşlarımızın ilk dərs və tərbiyə aldığı yer məhz məktəbdir. Onda insanlarımız saf və nəfsinə hakim olacaq”.

Məhəmmədəli QƏRİBLİ

Son xəbərlər