AŞPA-da Azərbaycan əleyhinə plan – Pandemiyadan sonra bəyan ediləcək qətnamənin mətni də hazırdır

Məhərrəm Zülfüqarlı: “Bu təhdid xarakterli qərəzli kampaniya ölkənin müstəqil siyasət yeritməsi ilə bağlıdır”

img

Azərbaycana yönəlik növbəti qərəzli kampaniyaya start verilib. Bu dəfə əvvəlkilərdən fərqli olaraq təhdid xarakterli mesajlar verilir.

Avropa Şurası Parlament Assambleyasının (AŞPA) Azərbaycanda siyasi məhbuslar üzrə məruzəçisi Sunna Evarsdottir bəyan edib ki, karantin bitəndən sonra beynəlxalq qurumların Azərbaycanda insan haqlarının durumu ilə bağlı hesabatları tənqidi olacaq. Guya Azərbaycanda tənqidi səslərə qarşı repressiyalar davam edir: “Azərbaycan da, başqa ölkələr kimi, karantindədir və ölkədə baş verənlərlə bağlı informasiya əldə etmək və xəbərləri təsdiqlətmək çətindir. Amma bu şərtlər daimi deyil. Sərhədlər açılanda və Avropa Şurası yenidən tam gücü ilə fəaliyyətə başlayanda qiymətləndirmə aparacaq və bu qiymət də tənqidi olacaq. Müəyyənləşdirəcəyik ki, pandemiyadan hansı hallarda öz avtoritar oyunlarına meydan vermək və siyasi maraqlarını həyata keçirmək üçün sui-istifadə olundu. Karantin bitəndə bunların hamısı öz əksini tapacaq və tənqid olunacaq”.

S.Evarsdottir iddia edib ki, guya Azərbaycanda tənqidi səslərə qarşı repressiyalar davam edir. Guya karantin dövründə Azərbaycanda 15-ə qədər müxalifət fəalı və jurnalist həbs olunub. S.Evarsdottir, həmçinin, bildirib ki, bütün siyasi məhbuslar azadlığa buraxılmalıdır. Ona görə, təhlükəsiz mühitdə yaşamaq bütün məhbusların fundamental haqqıdır.

Göründüyü kimi, bəzi beynəlxalq təşkilatların Azərbaycanla bağlı hesabatları azmış kimi, indi də təhdid formasında danışırlar. Bu isə beynəlxalq hüquqa uyğun olmayan bir yanaşmadır.

  • “AŞPA-nın siyasi məhbuslar üzrə məruzəçisinin fikirləri də bundan qaynaqlanır”

Məsələyə münasibət bildirən İctimai Problemlərin Tədqiqi Assosiasiyasının rəhbəri, tarix üzrə elmlər doktoru Məhərrəm Zülfüqarlının sözlərinə görə, Azərbaycana yönəlik bu təhdid xarakterli qərəzli kampaniya ölkənin müstəqil siyasət yeritməsi ilə bağlıdır: “Bütün bunlarda əsas məqsəd Azərbaycanın yeritdiyi müstəqil balanslaşdırılmış siyasətdən çəkindirməkdir. Bilavasitə ölkəni Qərbin istədiyi istiqamətə yönəltmək istəyirlər. Bu da Azərbaycan üçün heç bir əhəmiyyət daşımır. Çünki Azərbaycan şimalda Rusiya, cənubda İranla qonşudur. Azərbaycan Rusiya və İrana yönəlik embarqoları müdafiə etmir. Bu səbəbdən ölkəmizə yönəlik bu cür qərəzli kampaniya aparılır. Belə kampaniyada iştirak edən qurumlardan biri də AŞPA-dır. Adətən, bu qurumlar seçkidən sonra qarayaxma kampaniyasına start verirlər. Pandemiya səbəbindən onların bir sıra planları baş tutmadı. Ona görə də indi hədələyici tonda bəyanatlar verirlər. AŞPA-nın siyasi məhbuslar üzrə məruzəçisinin fikirləri də bundan qaynaqlanır. Olmayan şeyləri uydururlar. Guya Azərbaycan hakimiyyəti pandemiyadan sui-istifadə edərək siyasi təqiblər aparır. Görünən odur ki, yenə də Azərbaycandan nəsə qoparmaq üçün ölkəmizə qarşı təzyiq mexanizmini işə salıblar. Hesab edirəm ki, bu kimi kampaniyanın heç bir əhəmiyyəti olmayacaq. Azərbaycan öz müstəqil siyasi xəttini davam etdirəcək”.

Vidadi ORDAHALLI

Son xəbərlər