Qarabağ Araşdırmalar Mərkəzi İctimai Birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının layihəsi çərçivəsində KİV nümayəndələri üçün "Ermənistanın Azərbaycana qarşı ərazi iddiaları və təcavüzkarlıq siyasətinin mərhələləri" mövzusunda qısamüddətli elmi maarifləndirmə və təbliğat kursları başa çatıb.
APA-nın məlumatına görə, Azərbaycan Prezidentinin ictimai-siyasi məsələlər üzrə köməkçisi - şöbə müdiri, tarix elmləri doktoru, professor Əli Həsənov "Ermənistan-Azərbaycan, Dağlıq Qarabağ münaqişəsinin nizama salınması istiqamətində Azərbaycan dövlətinin siyasəti" mövzusunda çıxış edib.
Ə.Həsənov bildirib ki, mərkəz tərəfindən həyata keçirilən seminarların əsas məqsədi Azərbaycan mediasında çalışan jurnalistləri ermənilərin 200 ildən artıq müddətdə azərbaycanlılara qarşı həyata keçirdiyi etnik təmizləmə, soyqırımı və təcavüzkarlıq siyasətinin bütün detalları ilə tanış etməkdir: "Məqsəd ondan ibarətdir ki, jurnalistlər ermənilərin azərbaycanlılara qarşı həyata keçirdiyi etnik təmizləmə, soyqırımı və təcavüzkarlıq siyasətini daha dərindən bilsinlər".
Prezidentin köməkçisi qeyd edib ki, erməni faktoru böyük imperiyaların əlində hər zaman siyasi alət, silah olub, onlar bu silahdan zaman-zaman öz siyasətlərini reallaşdırmaq, öz geosiyasi hədəflərinə çatmaq üçün istifadə ediblər: "Çox təəssüf ki, onların istifadə etdiyi bu silah və onun acı nəticələri Azərbaycan xalqının fəlakətə düçar olması ilə nəticələnib".
Ə.Həsənov bildirib ki, Dağlıq Qarabağ, Ermənistan-Azərbaycan münaqişəsi ilə bağlı Azərbaycanın haqq səsi bütün dünya ictimaiyyətinə çatdırılır: "Dünyanın elə bir regionu yoxdur ki, biz ora Dağlıq Qarabağ həqiqətlərini, münaqişənin təfsilatını, o cümlədən 200 ildən artıqdır Azərbaycan xalqına qarşı həyata keçirilən etnik təmizləmə, soyqırımı və təcavüzkarlıq siyasətinin əsas məsələlərini çatdırmayaq. Azərbaycan Prezidenti cənab İlham Əliyev başda olmaqla, Azərbaycan dövləti ötən müddətdə, xüsusən son 10 ildə Dağlıq Qarabağ münaqişəsinin ədalətli həlli ilə bağlı bütün beynəlxalq təşkilatlarda öz sözünü deyib, hücum diplomatiyası həyata keçirib. Nəticə nədən ibarətdir? Azərbaycanın üzv olduğu və ya əməkdaşlıq etdiyi bütün beynəlxalq təşkilatlar çərçivəsində bu münaqişənin həlli ilə bağlı Azərbaycanın haqlı mövqeyi dəstəklənib. Bu baxımdan ilk növbədə İslam Əməkdaşlıq Təşkilatını qeyd etmək istəyirəm. Bu təşkilat, demək olar ki, bütün sammitlərində Ermənistanı təcavüzkar dövlət kimi tanıyıb, Azərbaycanın ərazilərinin işğal olunduğu faktını qeyd edib və ermənilərin Azərbaycan torpaqlarından tezliklə çəkilməsini tələb edib. Qoşulmama Hərəkatı da birmənalı şəkildə Dağlıq Qarabağ münaqişəsinin həllini Azərbaycanın ərazi bütövlüyü çərçivəsində dəstəkləyib. Avropa Şurası, ATƏT, Avropa Parlamenti, üzv olduğumuz və tərəfdaşlıq etdiyimiz digər qurumların əksəriyyəti Azərbaycan ərazilərinin işğal faktını tanıyıb, ermənilərin torpaqlarımızdan çıxarılmasını qeyd edib.
Bilirsiniz ki, 1992-ci ildə işğal baş verərkən həmin ildən 1993-cü ilin sonuna qədər Dağlıq Qarabağ münaqişəsi ilə bağlı BMT Təhlükəsizlik Şurası 4 qətnamə qəbul edib. Bu qətnamələrin hər birində Azərbaycanın işğal olunmuş ərazilərinin qeyd-şərtsiz boşaldılması, dinc əhalinin geri qaytarılması ilə bağlı tələb irəli sürülüb və bu qətnamələr beynəlxalq hüququn əsas sənədləri kimi bu gün ortadadır.
Təəssüflər olsun ki, beynəlxalq münasibətlərin indiki çoxstandartlı vəziyyətində, hələ ki, ermənilərə işğal etdikləri torpaqlardan geri çəkilmək üçün ciddi təzyiq göstərən beynəlxalq təşkilat və ölkə yoxdur".
Prezidentin köməkçisi Azərbaycanın Ermənistanı tanımayan, onunla diplomatik münasibətlər qurmayan dostları olduğunu da xatırladıb: "Onlardan Türkiyə, Pakistan, Səudiyyə Ərəbistanı və digər dövlətlərin adını çəkmək olar. Dağlıq Qarabağ münaqişəsi ilə bağlı çoxsaylı beynəlxalq təşkilatlara mövqeyimizi qəbul etdirə bilmişik. Dünyanın bir çox dövləti, çoxsaylı vilayətlər, ştatlar, başqa hüquqi qurumlar Xocalı soyqırımını tanıyıb. Biz bu siyasətimizi davam etdirəcəyik. O vaxta kimi davam etdirəcəyik ki, ermənilər qeyri-konstruktiv mövqelərindən əl çəkməyəcək, işğal siyasətindən imtina etməyəcək, Azərbaycan torpaqlarını işğaldan azad etməyəcəklər. Yalnız işğal altında olan torpaqlar azad olunandan, qaçqın və məcburi köçkünlər yurd-yuvalarına qayıdandan, münaqişə bölgəsində tam sülh, sabitlik yaranandan sonra biz Ermənistanla münasibətlər qura bilərik. Hazırda Azərbaycanın, Ermənistan istisna olmaqla, bütün bölgə və dünya dövlətləri ilə çox yaxşı münasibətləri var. Bu tərəfdaşlıq münasibətlərindən istifadə edib, dövlətimizi inkişaf etdiririk".
Sonra kurs iştirakçılarına sertifikatlar və Dağlıq Qarabağ münaqişəsinə aid kitablar təqdim edilib.
Qeyd edək ki, kurslar iyunun 13-dən 19-dək keçirilib.
"Ermənistan-Azərbaycan, Dağlıq Qarabağ münaqişəsi ilə bağlı Azərbaycanın mövqeyi aydındır. Bu mövqe həmsədrlərə, BMT Təhlükəsizlik Şurasına, ATƏT-ə, Avropa Şurasına, bütün dünya ictimaiyyətinə çatdırılıb. Bu mövqe ondan ibarətdir ki, Azərbaycanın ərazi bütövlüyü bərpa olunmalı, qaçqın və məcburi köçkünlər öz torpaqlarına qaytarılmalı, münaqişənin həlli ilə bağlı beynəlxalq hüquq normalarına əməl olunmalıdır". Bu sözləri Əli Həsənov ATƏT-in Minsk Qrupunun həmsədrlərinin Azərbaycana səfərinə münasibət bildirərkən deyib.
"Əlbəttə, biz kompromisi də, həmsədr ölkələrin və beynəlxalq təşkilatların bu məsələ ilə bağlı fərqli mövqelərini də anlayırıq, amma əsas məsələ beynəlxalq hüququn pozulmaz prinsipi olan ərazi bütövlüyü məsələsidir ki, biz ondan heç vaxt vaz keçməyəcəyik. Cənab prezident İlham Əliyev dəfələrlə bəyan edib ki, Azərbaycan öz torpaqlarının bir qarışını da heç kimə güzəştə getməyəcək. Biz eyni zamanda bölgədə konstruktiv sülhə nail olmağa hazırıq", - deyə Ə.Həsənov qeyd edib.
Prezidentin köməkçisi bildirib ki, həmsədrlərin Azərbaycana növbəti səfəri də vəziyyətin aydınlaşdırılmasına, tərəflərin mövqelərinin bir daha araşdırılmasına və bu mövqelərin yaxınlaşdırılması fonunda münaqişənin həlli ilə bağlı irəliləyişə nail olunmasına xidmət edir: "Hesab edirik ki, istənilən formatda keçirilən hər bir görüş ortaq mövqelərin tapılmasına xidmət edir və bu mövqelər gec-tez tapılacaq. Əks təqdirdə, müharibə, Dağlıq Qarabağ və işğal altında olan digər torpaqların Azərbaycan ordusu tərəfindən azad olunması qaçılmazdır".
"Ermənistanın təcavüzkar siyasəti daim davam edib. Onlar heç vaxt bu siyasətə ara verməyiblər. Sadəcə olaraq, bəlli məqamlarda bir az geri çəkilib, öz mövqelərini gizlətməyə, beynəlxalq ictimaiyyəti aldatmağa çalışıblar" - deyən Ə.Həsənov bildirib ki, Ermənistan ötən əsrin 90-cı illərindən başlayaraq bu günə qədər təxribatları davam etdirir: "Onlar davamlı olaraq, xüsusən də beynəlxalq səviyyədə danışıqların intensivləşdiyi, status-kvonun aradan qaldırılması ilə bağlı beynəlxalq aləmin səylərinin artdığı vaxtlarda təxribatlara əl atır, cəbhədə qarşıdurmanı gücləndirməyə çalışır, bu fonda həm beynəlxalq aləmdə anti-Azərbaycan mövqelərini gücləndirməyə cəhd edir, həm də əhalinin Ermənistan hakimiyyətinə olan narazılığını ört-basdır etmək məqsədi güdürlər. Ona görə də biz hazırda cəbhədə baş verənləri də əvvəlki təxribatlar kimi Ermənistan hakimiyyətinin qeyri-konstruktiv mövqeyi olaraq dəyərləndirir, buna belə yanaşırıq".
Xəbər xidməti
