Artıq xəbər verildiyi kimi, dünən Bişkekdə KTMT-yə üzv ölkələrin başçılarının toplantısında qurumda Baş katiblik postu rotasiya qaydasında Ermənistanın namizədinə verilib.
Bu, yarım il əvvəl ölkəsinin Milli Təhlükəsizlik Şurasına rəhbər təyin olunan Yuri Xaçaturovdur. Lakin maraqlıdır ki, aylarıdr erməni namizədin KTMT-nin başına gətirilməsi üçün dəridən-qabıqdan çıxan Ermənistanda sonuncu təyinat ciddi rezonans doğurmayıb. Səbəbi isə çox da dərində deyilmiş. Belə ki, artıq bugünkü erməni mətbuatı həmin səbəbə aydınlıq gətirib. Bəlli olub ki, Ermənistanda Xaçaturov ötən il Azərbaycanın böyük üstünlüyü ilə bitən, daha doğrusu dayandırılan dördgünlük aprel müharibəsindəki uğursuzluğun əsas günahkarlarından biri kimi tanınır. Məsələ burasındadır ki, həmin hadisələrə kimi Xaçaturov Ermənistan Silahlı Qüvvələrinin Baş Qərargah rəisi olub. Erməni cəmiyyətində gəzən söhbətlərə görə, ötən ilin aprelində Azərbaycanın hücumu (!) barədə ona məruzə ediləndə bilyard oyununu belə yarımçıq kəsməyib və heç tövrünü pozmadan “Azərbaycanın növbəti şıltaqlığıdır, atıb dayanacaqlar” kimi ifadələr işlədib. Artıq sonradan Azərbaycanın cəmi bir neçə gün ərzində 2000 hektar torpağını işğaldan azad etməsi və erməni ordusuna ciddi itkilər yaşatması elə o zaman ermənilərin özlərinin də dediyi kimi, Əliyevin Sarkisyana tərs şapalağı olub və öz növbəsində Xaçaturov da tək oyunu deyil, postunu da uduzduğunu anlayıb. Bunun ardınca Azərbaycan və Ermənistanın Baş Qərargah rəisləri təcili Moskvaya çağırılıb və Rusiya Baş Qərargah rəisi ilə üçtərəfli görüşdə atəşin dayandırılası barədə razılıq əldə olunub. Maraqlıdır ki, Ermənistan prezidenti Serj Sarkisyan bu görüşün ardından “onların orda nə danışdığından xəbərim yoxdur” deyib. Diqqət edin, bunu ölkənin prezidenti, Baş Qərargah rəisinin birbaşa tabe olduğu Ali Baş Komandan deyir və bununla da isbat edir ki, hər nə qədər gurultulu “Ali Baş Komandan” adı daşısa da, Moskvanın ipini əlində möhkə saxladığı marionetdən başqa bir şey deyil. Lakin təbii ki, söhbətimizin mövzusu Sarkisyan deyil, Xaçaturovdur. Məhz aprel hadisələrindən sonra Xaçaturov, o günə qədər Qarabağ döyüşlərinin qəhrəmanlarından sayılmasına baxmayaraq, görəvdən alınır və tam fərqli bir sahəyə - milli təhlükəsizlik sektoruna gətirilir. Həmin ərəfədə ölkənin Müdafiə naziri Seyran Ohanyan da eyni səbəblə vəzifədən çıxarılsa da, onun reytinqi Xaçaturyandan xeyli yüksək görünür. Baxmayaraq ki, hər ikisi aprel fiaskosunun birbaşa günaharları sayılır.
Bəllidir ki, ötən ilin sentyabrından KTMT rəhbərliyinə Ermənistanın namizədinin gətirilməsi gözlənirdi və erməni cəmiyyətinin ümidi bu postu Seyran Ohanyanın tutacağına idi. Ohanyan isə həmin ərəfədə bildirmişdi ki, ona belə bir təklif olunmayıb və olunarsa belə, qəbul etmək niyyətində deyil. Bununla belə, erməni cəmiyyətində bu posta İrəvanın namizədinin gətirilməsi çox ciddi şərt kimi qəbul olunurdu. Xatırlayırsınızsa, bu təyinatın baş tutması gözlənən sammitlərin birində Lukaşenkonun iştirak etməməsi, digərinə Nazarbayevin qatılmaması üzündən kvorum alınmamış və seçimlər ertələnmişdi. Artıq günlərdir Ermənistan mətbuatının qurumun 14 aprel Bişkek sammitinə geniş diqqət ayırması isə erməni cəmiyyətinin bu postla bağlı rəngarəng xəyallar qurmasından xəbər verirdi. Maraqlıdır ki, seçimlərə bu qədər önəm verən erməni mətbuatı bu gün, yəni təyinatın dərhal ardından artıq məyusluğunu gizlətmir və “o posta erməni namizəd gətirilsə də, o post Ermənistanın deyil” yazır. Bu isə, deyil Xaçaturovun, elə Ermənistanın da Moskvanın oyuncağı olduğunun növbəti sübutu kimi dəyərləndirilə bilər.
Görünən o ki, şanlı Aprel döyüşlərinin ildönümündə Ermənistan daha bir xəyal qırıqlığı yaşamalı oldu. Nə deyək, davamlı olsun...
Samirə Səfərova
