Azər Həsrət: "İnternet azad bir müstəvi olsa da, çox təəssüflər olsun ki, bir çox insanlar bundan sui-istifadə edir"
Məlum olduğu kimi, Azərbaycanda internet informasiya ehtiyatına müraciətin məhdudlaşdırılması qanunla təsbit edilir və bu, məhkəmənin xüsusi icraat qaydasında baxdığı işlər siyahısına daxil edilir. Eyni zamanda, müvafiq icra hakimiyyəti orqanına yayılması qadağan edilən informasiyanın yerləşdirilməsi hallarını müəyyən etdikdə, internet informasiya ehtiyatına müraciətin məhdudlaşdırılması üçün məhkəməyə müraciət etmək imkanı verilir. Bununla bağlı Mülki Prosessual Məcəlləyə əlavələr təklif edilir.
Layihəyə əsasən, Məcəllənin 305-ci maddəsinə (Məhkəmənin xüsusi icraat qaydasında baxdığı işlər) yeni bənd - "internet informasiya ehtiyatına müraciətin məhdudlaşdırılması haqqında" cümləsi əlavə edilir. Buna əsasən, Məcəlləyə 40-6 fəslinin (İnternet informasiya ehtiyatına müraciətin məhdudlaşdırılması haqqında işlər üzrə icraat) əlavə edilməsi təklif olunur. Yeni fəslin maddələrində icraatla bağlı müvafiq icra hakimiyyəti tərəfindən bununla bağlı ərizənin verilməsi, ərizənin məzmunu və ona baxılaraq qətnamənin qəbul edilməsi və s. məsələlər əksini tapıb. Burada söhbət ondan gedir ki, müvafiq icra hakimiyyəti orqanı internet informasiya ehtiyatında "İnformasiya, informasiyalaşdırma və informasiyanın mühafizəsi haqqında" Qanuna əsasən, yayılması qadağan edilən informasiyanın yerləşdirilməsi hallarını müəyyən etdikdə, internet informasiya ehtiyatına müraciətin məhdudlaşdırılması üçün məhkəməyə müraciət edir.
Layihə Milli Məclisin plenar iclasına tövsiyə olunub və aprelin 7-də müzakirəyə çıxarılacaq.
Sözügedən layihə qəbul edilsə, o zaman bəzi qeyri-ciddi, məsuliyyətsiz saytların imkanları daralacaq. Nəticədə böhtan xarakterli, insanların şərəf və ləyaqətinə yönəlik yazılar azalacaq.
Maraqlıdır, bəs media ekspertlərinin bu təklifə münasibəti necədir?
Məsələyə münasibət bildirən media eksperti Azər Həsrətin sözlərinə görə, belə bir dəyişikliyin edilməsinə zərurət var. O bunu bir sıra amillərlə əlaqələndirdi: "İnternet resurslarının Azərbaycanda yerləşənləri də var, yerləşməyənləri də. Yəni elələri var ki, xaricdə yerləşir. Ancaq Azərbaycanda olanları hansısa bir formada əngəlləmək, onların zərərli fəaliyyətinin qarşısını almaq mümkündür. Ancaq bundan fərqli olaraq, xaricdə olanların zərərli fəaliyyətinin qarşısını almaq çətin olacaq. Bu baxımdan düşünürəm ki, sözügedən məsələ tətbiq olunanda yəqin xaricdə fəaliyyət göstərənlərin, sadəcə, Azərbaycanda yayımının əngəllənməsindən söhbət gedə bilər. Yəni onların tam olaraq qapadılması, yaxud hansısa formada cəzalandırılması mümkün deyil. Ümumilikdə götürəndə bu məsələdə bir zərurət var. Çünki internet azad bir müstəvi olsa da, çox təəssüflər olsun ki, bir çox insanlar bundan sui-istifadə edir. Azərbaycanla bağlı məsələlərdə ortalığı qarışdırmaq, yanlış informasiyalarla ictimaiyyəti çaşdırmaq yolunu tuturlar. Dövlət, əslində, bu addımı məcburiyyət qarşısında atır. Bilirsiniz ki, Azərbaycan azad internet prinsiplərinə həmişə sadiq olub və sadiq olmağa da davam edəcək. Sadəcə, elə bir zərurət yaranıb ki, məcburiyyət üzündən bu cür məhdudiyyətlər olacaq".
Vidadi ORDAHALLI
