Xarici ölkələrlə bağlı reklamların yayımlanması yerli reklam bazarına birbaşa ziyan vurur. Buna görə də kabel şəbəkəsi ilə yayımlanan xarici kanalların reklamı məhdudlaşdırılır. Trend-in məlumatına görə, bunu Milli Məclisin Mədəniyyət komitəsinin bu günki iclasında “Kabel şəbəkəsi yayımı haqqında” qanun layihəsinin müzakirəsi zamanı Milli Televiziya və Radio Şurasının sədri Nuşirəvan Məhərrəmli bildirib.
Onun sözlərinə görə, 2002-ci ildə “Teleradio yayımı haqqında” qanun qəbul edildikdə kabel şəbəkəsi inkişaf etməmişdi. Ona görə də MTRŞ öz daxili imkanları hesabına bu sahəni tənzimləyirdi.
N.Məhərrəmli deyib ki, lakin artıq bu sahədə həm kəmiyyət, həm də keyfiyyət dəyişikliyi baş verib.
O qeyd edib ki, bu gün Azərbaycanda kabel şəbəkəsi yayımı ilə məşğul olan 17, internet üzərindən yayımla məşğul olan 15 hüquqi və fiziki şəxs var: "Bundan əlavə, kabel şəbəkəsi yayımı əvvəl Bakının bir hissəsini əhatə edirdisə, indi onun əhatə dairəsinə Sumqayıt, Mingəcevir şəhəri və s. daxil olub. Bundan başqa, əvvəllər kabel şəbəkəsi yayımı ilə yalnız 40-50 kanala baxılırdısa, indi bu kanalların sayı 100-ə çatıb. Teleradio yayımının yeni üsulu - internet üzərindən yayım yaranıb. Bu sahə o qədər sürətlə inkişaf edir ki, onun fəaliyyətinin tənzimlənməsinə ehtiyac var”.
Çoxmərtəbəli binalarda qanunsuz kabel yayımı aparılır
“Çoxmərtəbəli binaların əksəriyyətində qanunsuz kabel yayımı ilə məşğul olan şəxslər var”. Bunu da N.Məhərrəmli bildirib. Onun sözlərinə görə, belə hallar xeyli saydadır: "Dəfələrlə bu məsələni qaldırmışıq. “Kabel şəbəkəsi yayımı” haqqında yeni hazırlanan qanun layihəsi əsasında buna qarşı mübarizə aparmaq istəyirik. Bununla bağlı hüquq-mühafizə orqanlarına, Vergilər Nazirliyə müraciət etmişik, amma nəticə yoxdur. Bizim də ayrı-ayrılıqda hər bir evə girmək səlahiyyətimiz yoxdur. Amma bu qurumlar bu işin öhdəsindən gələ bilərlər”.
Kabel televiziyaları peykdən götürdüyü proqramları abonentlərə satır
"Dünyada xarici ölkə televiziyalarının digər ölkənin ərazisində yerüstü televiziya yayımında olması kimi praktika yoxdur. Bu nöqteyi-nəzərdən biz ya kabel, ya da peyk televiziya yayımına üstünlük verməliyik". Bunu isə Milli Televiziya və Radio Şurasının Texniki şöbəsinin müdiri İsa Məmmədov bildirib.
Onun sözlərinə görə, peyk televiziya yayımı böyük məsrəflər hesabına başa gəlir:
"Digər məsələ budur ki, peyk yayımçısı özü bir müddət sonra – kanallara maraq yarandıqda onları kodlayır. Bununla da istəyir ki, həmin istifadəçilər yayımçının abonenti olsunlar. Kabel televiziyasında olan televiziya proqramlar isə müxtəlif peyklərdən götürülür. Hər hansı abonentin də onu evində yaratmaq imkanı yoxdur. Bunun üçün abonentin evində antena və qəbuledici quraşdırılmalıdır. Bu işi yayımçı öz üzərinə götürür və daha sonra kabel şəbəkəsinin yayımına başlayır".
Kabel televiziyaları yayımı barədə yeni qanun hazırlanır
Milli Məclisin Mədəniyyət komitəsinin sədri Rafael Hüseynov isə deyib ki, Azərbaycanda kabel şəbəkəsi yayımının qanunla tənzimlənməsi nəzərdə tutulur.
Bu gün Azərbaycanda 17 kabel şəbəkəsinin fəaliyyət göstərdiyini deyən R.Hüseynovun sözlərinə görə, bu sahədə sui-istifadə halları var: "Bu da məsələnin tənzimlənməsini zəruri edir. Bir müddət əvvəl xarici kanalların yerli tezliklərdə yayımlanması dayandırıldıqdan sonra kabel şəbəkəsinin imkanları bir qədər artıb".
Hazırkı dövrdə “Kabel şəbəkəsi yayımı haqqında” qanun layihəsinin hazırlanmasını zəruri sayan R.Hüseynov qeyd edib ki, layihə ekspert baxışından keçib: "Layihə 17 maddədən ibarət olsa da, kabel şəbəkəsi yayımı ilə bağlı ortaya çıxan bütün məsələlərə cavab verir. Kabel şəbəkəsi yayımının həyata keçirilməsinə şərait yaratmaq qanun layihəsinin birinci, ondan istifadə edənlərin marağının təmin edilməsi isə ikinci məqsəddir. Bu yayım üçün əlverişli mühit yaratmaq da məqsədlərdən biridir. Bu qanunda sahibkarların, abonentlərin maraqları ilə yanaşı, dövlətin və millətimizin marağı da nəzərə alınıb. Layihədə xarici reklamların hüdudları da müəyyənləşdirilib”.
