Azərbaycan Milli Məclisinin bu gün keçirilən iclasında “Xocalı soyqırımının 25 illiyi ilə əlaqədar” qərar layihəsi müzakirə edilib. APA-nın məlumatına görə, spiker Oqtay Əsədov bildirib ki, Xocalı soyqırımının təşkilatçıları bölgədə öz maraqlarını həyata keçirmək istəyən qüvvələr olub, icraçıları isə Ermənistandır. O qeyd edib ki, hadisə Milli Məclisin qərarları ilə soyqırımı kimi tanınıb: “İslam Əməkdaşlıq Təşkilatı, bir sıra ölkələrin parlamenti Xocalı soyqırımını rəsmən tanıyıb, ABŞ-ın 21 ştatında müvafiq qərar qəbul olunub. Bu günlərdə Milli Məclisin üzvləri dünyanın bir sıra ölkələrində soyqırımı ilə bağlı tədbirlərdə iştirak etmək üçün səfərə çıxıblar. Azərbaycan ərazisinin bir hissəsinin işğalı ilə heç zaman barışmayacaq. Bu vəhşiliyi törədənlər layiq olduqları cəzalarına çatacaqlar”.
Yeni Azərbaycan Partiyasının icra katibinin müavini, deputat Siyavuş Novruzov bildirib ki, Azərbaycanın hüquq-mühafizə orqanları Xocalı soyqırımını törədənlər barədə şifahi də olsa cinayət işi başlamalı və məhkəmə hökm çıxarmalıdır: “Onların bir neçəsi cinayət törətdiyini BMT-nin sürtülmüş kürsüsündə belə etiraf edib. Ermənistan prezidenti Serj Sarkisya da onlardan biridir. Bundan artıq etiraf lazımdır? Ermənistanın “böyük ziyalısı” Zori Balayan uşaqların öldürülməsi, onların yandırılmasından ləzzət aldığını qeyd edib. Nəyə görə biz onların izahat yazmasını və ya məhkəmə qarşısında etiraflarını gözləməliyik? Barələrində indidən qərar çıxarılmalıdır və tutulub gətirilməlidirlər. Bunun üçün İnterpola müraciət etməliyik ki, sonradan fakt qarşısında qalmayaq”.
Vitse-spiker Bahar Muradova isə deyib ki, müharibə etmək, sülh istəmək onu necə həyata keçirmək adamların dünya görüşü, həyata baxışı qəlbdən gələn şəkildə ifadə oluna bilər: “Amma bir qayda olaraq, siyasət siyasətçilərin işi olduğu kimi, hərb də hərbçilərin işidir. Hər kəs əmin olsun ki, Azərbaycan prezidenti sülh danışıqları aparmaqla yanaşı, ölkəmizi ərazilərimizin hərbi yolla alınmasına da hazırlayır. Övladlarımızın şəhid olması bizimlə yanaşı, Azərbaycan prezidentini də narahat edir”.
B. Muradova qeyd edib ki, Xocalı işğaldan azad edilsə belə, bu faciə haqqında danışılacaq. Bu faciəni unutmaq olmaz.
Deputat Qənirə Paşayeva bir sıra təkliflərlə çıxış edib. O, Şəhidlər xiyabanında Xocalı abidəsinin qoyulması təklifini irəli sürüb: “Bakıda soyqırımı muzeyi ilə bərabər, Şəhidlər xiyabanında informasiya mərkəzinin yaradılması da vacibdir. Soyqırımı dünyaya daha təsirli dildə çatdırmaq üçün beynəlxalq səviyyəli bədii filmin çəkilməsinə böyük ehtiyac var. Yəhudi soyqırımı ilə bağlı “Pianoçu” filminin yəhudi soyqırımı gerçəklərinin dünyaya yayılmasında böyük təsirini xatırlayaq".
Deputat Rafael Cəbrayılov ona dəstək olaraq, deyib ki, Azərbaycanda soyqırımını özündə əks etdirən möhtəşəm memorial kompleks yoxdur: “Şəhidlər xiyabanında soyqırımı memorial kompleks salınmalıdır”.
Deputat Pərvin Kərimzadə isə bildirib ki, 1976-cı ildəd ünyada beynəlxalq cinayət anlayışı formalaşıb və soyqırımı anlayışı beynəlxalq cinayət kimi qəbul olunur. Deputat BMT-nin müvafiq sənədlərini xatırladaraq bildirib ki, Xocalı soyqırımı məhz beynəlxalq cinayətdir.
Oqtay Əsədov: “Biz artıq ağlaşma, matəm üzərində köklənməyəcəyik”
Oqtay Əsədov deputat Fəzail İbrahimlinin çıxışı zamanı səslənən “erməni obrazı” ifadəsinə şərh verib. O. Əsədov bildirib ki, Azərbaycana təcavüz edən Ermənistan öz gücünə yox, havadarlarının - arxasında duran qüvvələrin hesabına bunu edib: “Necə deyərlər, arxalı köpək qurd basar. Amma artıq Azərbaycanın prezident İlham Əliyevin başçılığı altında böyük gücü var və biz öz gücümüzə arxalanarıq. Ermənilər isə hələ də yox. Bax, budur erməni obrazı. Biz artıq ağlaşma, matəm üzərində köklənməyəcəyik”.
Zeynəb Xanlarova: "Gəlin müharibə edək, torpağımızı alaq, nəyi gözləyirik?"
“Bizim torpalqarımız işğal edilib, o vaxtdan bəri də şəhid veririk. Bundandırsa, gəlin müharibə edək, torpağımızı alaq. Nəyi gözləyirik?". Bunu isə Zeynəb Xanlarova deyib.
"Onsuz da hər ay nə qədər şəhid veririk. Birdəfəlik ya ölək, ya qalaq. Müharibə edək, bitsin bu məsələ. Biz ki, onların torpağını almamışıq? Onlar bizim torpağımızı işğal ediblər. 25-30 ildir, Milli Məclisdə oturmuşam, ancaq elə danışırıq. Məsəl var, "Dəyirman öz işindədir, çax-çax baş ağırıdır". Nə qədər balalarımız öləcək, nə qədər analar göz yaşı axıdacaq?" deyə, millət vəkili əlavə edib.
O, ATƏT-in Minsk Qrupunu da tənqid edib: "Biz haqqımızı almaq üçün kimdənsə icazə almalıyıq? Əgər mənim evimə basqın ediblərsə, sakit nə qədər dayanıb gözləyəcəm? Bəli, mən sülh adamıyam, istəmərəm müharibə olsun. Amma biz torpaqlarımızı geri almalıyıq".
Milli Məclis Xocalı soyqırımının 25 illiyi ilə əlaqədar qərar qəbul etdi
Milli Məclisin iclasında "Xocalı soyqırımının 25 illiyi ilə əlaqədar" qərar layihəsi müzakirəyə çıxarılıb. Trend-in məlumatına görə, qərar layihəsində 1992-ci il fevralın 25-dən 26-na keçən gecə Ermənistan hərbi birləşmələri, Dağlıq Qarabağdakı erməni silahlı dəstələri və keçmiş sovet ordusunun 366-cı motoatıcı alayı tərəfindən Xocalı şəhərində azərbaycanlıların kütləvi qırğınının Milli Məclisin 1994-cü il 24 fevral, 1995-ci il 24 fevral, 2007-ci il 27 fevral və 2012-ci il 24 fevral tarixli qərarları ilə soyqırımı (genosid) cinayəti kimi qiymətləndirilməsi bir daha təsdiq edilib.
Qərar layihəsində Milli Məclis deputatlarına bir vəzifə olaraq tapşırılıb ki, xarici ölkələrə səfərlər zamanı, o cümlədən beynəlxalq təşkilatların tədbirlərində iştirak edərkən son yüz ildən artıq dövrdə azərbaycanlıların məruz qaldıqları soyqırımı aktları, o cümlədən Xocalı faciəsi haqqında həqiqətlərin daha geniş yayılmasını təmin etsinlər, bu məqsədlə Milli Məclisin xarici ölkələrin parlamentləri ilə birgə işçi qruplarının imkanlarından dolğun və səmərəli istifadə etsinlər.
Azərbaycanın hüquq-mühafizə orqanlarına tövsiyə olunub ki, Xocalı şəhərində soyqırımı aktının törədilməsində iştirak etmiş şəxslərin müəyyən edilməsi və cinayət məsuliyyətinə cəlb olunması üçün görülən tədbirləri davam etdirsinlər.
Azərbaycanın müvafiq dövlət və qeyri-hökumət qurumlarına, o cümlədən qeyri-hökumət təşkilatlarına tövsiyə edilib ki, Ermənistan-Azərbaycan, Dağlıq Qarabağ münaqişəsi ilə bağlı məlumatların geniş yayılması, yalançı erməni təbliğatının ifşa edilməsi üçün səylərini birləşdirsinlər.
Xarici ölkələrin parlamentlərinə, beynəlxalq parlament təşkilatlarına müraciət edilib ki, 1992-ci il fevralın 25-dən 26-na keçən gecə Dağlıq Qarabağ bölgəsindəki Xocalı şəhərində azərbaycanlıların kütləvi qırğınını soyqırımı cinayəti kimi tanısınlar.
Qərar layihəsi müzakirələrdən sonra səsə qoyularaq təsdiq edilib.
Xatırladaq ki, ermənilərin törətdiyi Xocalı soyqırımı nəticəsində 613 nəfər dinc azərbaycanlı milli mənsubiyyətinə görə qətlə yetirilib, 487 nəfər şikəst edilib, 1275 nəfər girov götürülərək amansız işgəncələrə məruz qalıb. Girov götürülənlərdən 150 nəfərin, o cümlədən 68 qadının və 26 uşağın bu günədək taleyi məlum deyil.
