"Axtarışa verilənlərin adı ictimaiyyətə açıqlansa, düzgün olar"
Hərbi Prokurorluğun Xüsusi istintaq şöbəsinin rəisi Rauf Məmmədov Milli Məclisdə keçirilən "Xocalı soyqırımı beynəlxalq hüquq müstəvisində" adlı tədbirdə deyib ki, indiyə qədər Xocalıda soyqırım törədənlərdən 39 nəfərin cinayət məsuliyyətinə cəlb edilməsi üçün məhkəmələr tərəfindən barələrində həbs-qətimkan tədbiri seçilib, axtarışa veriliblər.
R.Məmmədov bildirib ki, bundan başqa, həmin cinayətləri törətməkdə şübhəli bilinən 231 nəfərin tam anket məlumatlarının və onların gizləndiyi yerlərin müəyyən edilməsi məqsədilə istintaq-əməliyyat tədbirləri davam etdirilir: "1992-ci il fevral ayının 25-dən 26-na keçən gecə Xocalıda törədilən vəhşiliklərlə bağlı cinayət işi 1992-ci il fevral ayının 27-də o vaxt mövcud olan Qarabağ Rayonlararası Prokurorluğu tərəfindən başladılıb. Həmin cinayət işinin istintaqı ilə bağlı 2002-ci il dekabrın 18-də Baş Prokurorluq, Daxili İşlər Nazirliyi və keçmiş Milli Təhlükəsizlik Nazirliyinin birgə istintaq-əməliyyat qrupu yaradılıb".
R.Məmmədov deyib ki, bütün cinayət işləri bir icraatda birləşdirilib: "2005-ci ilin may ayında həmin cinayət işinin istintaqının nəzarəti Respublika Hərbi Prokurorluğuna həvalə edildikdən sonra həmin ilin iyul ayında cinayət işləri sülh və insanlıq əleyhinə və müharibə cinayətlərinə tövsif edilərək hazırda Respublika Hərbi Prokurorluğunda xüsusi istintaq şöbəsində istintaq edilir".
Verilən rəsmi açıqlamadan görünür ki, faktiki olaraq 39 nəfərin adı istintaqa dəqiqliyilə məlumdur. Onların adının açıqlanması və həmin şəxslər barədə ictimai araşdırmaların aparılmasına mətbuatın da qoşulması necə qarşılanar?
Hüquqşünas Mehman Muradlı qəzetimizə bildirdi ki, Xocalı hadisələrilə bağlı bizim istintaq orqanlarında kifayət qədər faktlar var: "Bu baxımdan da təqsirləndirilənlərə cinayətlərini sübut etmək o qədər də çətin deyil. Ancaq bəzi obyektiv səbəblərə görə istintaq orqanları barələrində həbs qərarının çıxarıldığı şəxsləri məsuliyyətə cəlb edə bilmir, onlarla istintaq hərəkətləri aparmaq müşkülə çevrilib. Məndə olan məlumata görə, həmin şəxslərdən bəziləri hazırda başqa ölkələrin hərbi hissələrində çalışır. Məsələnin ictimailəşməsi olduqca vacibdir. Çünki hazırda informasiya sərhəd tanımır. Bu, həmin adamların tam ifşasına səbəb olacaq. Aparılan jurnalist araşdırmalarında onların adı barədə hamı məlumatlandırılacaq. Bu da həmin adamlar barədə ictimai qınağın yaranmasına səbəb olacaq. Bu olduqca vacib məsələdir. Axtarışa verilənlərin adı ictimaiyyətə açıqlansa, düzgün olar".
Məhəmmədəli QƏRİBLİ
