Yadigar Məmmədli: "Sosial şəbəkələrin fəaliyyətinin qanunla tənzimlənməsində məqsəd mediada nizam yaratmaqdır"
Azər Həsrət: "Son illər sosial şəbəkələrlə bağlı çox ciddi problemlərin yaşanması belə bir tənzimlənmənin həyata keçirilməsini zəruri edir"
Azərbaycanda internet resursları, o cümlədən sosial şəbəkələri, blogerlərin fəaliyyətini tənzimləyən qanun layihəsinin hazırlanması təklif olunur. Bu təşəbbüslə Milli Məclisin İnsan hüquqları komitəsinin üzvü, Mətbuat Şurasının sədri Əflatun Amaşov komitənin iclasında çıxış edib.
O qeyd edib ki, bu gün dünyada blogerlərin fəaliyyəti başqa cür dəyərləndirilsə də, Azərbaycanda buna yanaşmada fərqli baxış var və onun fəaliyyətinin sərhədləri müəyyən edilməyib: "Ona görə də bu sahənin fəaliyyətini tənzimləyən yeni qanuna ehtiyac var".
Milli Məclisin Dövlət quruculuğu üzrə qanunvericilik şöbəsinin sektor müdiri Sarvan Sadıqov da bu təşəbbüsü dəstəkləyib: "Kim nə istəyirsə, onu da yazır. Odur ki, bu sahədə bir xaos hökm sürür. Ona görə də bu sahənin qanunla tənzimlənməsinə ciddi ehtiyac var".
Mətbuat Şurası İdarə Heyətinin üzvü Yadigar Məmmədli "Bakı-Xəbər"ə açıqlamasında qeyd etdi ki, sosial şəbəkələr və blogerlər medianın bir hissəsi hesab olunur, baxmayaraq ki, sosial şəbəkə əsl jurnalistikadan kənardır: "Ancaq media sosial şəbəkələrdə yazılan bəzi məsələlərə istinad edir. Bəllidir ki, artıq "Tvitter"də qeyd olunan fikirlər rəsmi qəbul olunur. Eyni zamanda, "Facebook"da yazılan fikirlər jurnalist yazılarında sitat kimi istifadə olunur. Bu baxımdan ictimaiyyət üçün əhəmiyyət daşıyan, önəmli şəxslərin fikirlərindən istifadə olunur. Məsələn, ictimai xadimlərin, millət vəkillərinin fikirləri fakt hesab olunduğu üçün sosial şəbəkələr tənzimlənməlidir.
Ancaq ictimai əhəmiyyət daşımayan bir şəxsin sosial şəbəkədə hər hansı bir fikir bildirməsi qanuna şamil oluna bilməz".
Həmsöhbətimiz hesab edir ki, sosial şəbəkələrin fəaliyyətinin qanunla tənzimlənməsində məqsəd mediada nizam yaratmaqdır.
Media sahəsi üzrə ekspert Azər Həsrət qəzetimizə açıqlamasında qeyd etdi ki, sosial şəbəkələrin tənzimlənməsinə ehtiyac var: "Bir neçə il əvvəl sosial şəbəkələrin tənzimlənməsinə cəhd olunmurdu. Çünki sonrakı müddətdə nələrin baş verəcəyi bəlli deyildi. Son illər sosial şəbəkələrlə bağlı çox ciddi problemlərin yaşanması belə bir tənzimlənmənin həyata keçirilməsini zəruri edir. Sosial şəbəkələrə dövlətin nəzarət etməsi vacibdir. Elə bizim özümüz də neçə ildir onlayn etika ilə bağlı seminarlar keçiririk".
Günel CƏLİLOVA
