"Əminəm ki, yerli ictimaiyyət də deyilən təşəbbüsü dəstəkləyəcək"
Məlum olduğu kimi, cari il Azərbaycanda "İslam Həmrəyliyi İli" elan edilib. Ölkə daxilində və xaricində verilən qiymətlər isə "İslam Həmrəyliyi İli" elan edilməsinin həm vacib, həm də indiki dünya reallığında çox mühüm olduğunu üzə çıxarır.
Xatırladaq ki, Prezident İlham Əliyev Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında da bu məsələ ilə bağlı çox maraqlı fikirlər səsləndirib.
Ölkə başçısının bu qərarına müsəlman ölkələrindən də dəstək reaksiyaları verilib.
İranın Azərbaycandakı keçmiş səfiri Möhsün Pakayin bildirib ki, Azərbaycanda "İslam Həmrəyliyi İli"nin elan olunması təqdirəlayiqdir: "Çünki hazırda İslam dünyasının dostluğa və birliyə daha çox ehtiyacı var". Keçmiş səfir bu il keçiriləcək İslam Həmrəyliyi Oyunlarının əhəmiyyətinə də toxunub: "Bu Oyunların əsas hədəfi təkcə İslam ölkələrinin idmançılarını deyil, ictimaiyyətlərini də bir araya gətirməkdir. Oyunlar İslam ölkələrinin dostluğunun və qardaşlığının simvoluna çevriləcək. Azərbaycanın mötəbər idman tədbirlərinə ev sahibliyi etmək üzrə çox böyük təcrübəsi var. Bu onu deməyə əsas verir ki, İslam Həmrəyliyi Oyunları da yüksək səviyyədə keçiriləcək".
Bu ilin Azərbaycanda "İslam Həmrəyliyi İli" elan edilməsi qardaş Türkiyədə də böyük rəğbətlə qarşılanıb. Məsələyə münasibət bildirən Türkiyə Respublikasının dini işlər qurumunun rəhbəri Mehmet Görmez bunları deyib: "Bütün insanlığın sevgiyə, mərhəmətə, həmrəyliyə çox ehtiyac duyduğu bir zamanda Azərbaycanda "İslam Həmrəyliyi İli" elan edilməsi olduqca humanist və sülhsevər bir təşəbbüsdür. İnanıram ki, Azərbaycan qədim və zəngin mədəniyyəti ilə bu həmrəyliyə böyük töhfələr verəcək, İslam aləmində, ümumiyyətlə bütün dünyada insanlar arasında sevgi və məhəbbət, mərhəmət hisslərini gücləndirəcək".
Belə müsbət reaksiyalar İslam ölkələrinin ictimaiyyət nümayəndələrinin, elm, mədəniyyət, QHT və media təmsilçilərinin Azərbaycanda geniş konfransının keçirilməsi ideyası üzərində düşünməyi mümkün edir. İdeya nə qədər gerçək gücə malikdir?
Şərqşünas Seyid Camal Əzimbəyli qəzetimizə açıqlamasında bildirdi ki, Azərbaycanın bu qərarına verilən reaksiyalar gözlənilən idi: "Çünki ölkəmiz bu addımı ilə sübut etdi ki, həm milli, həm də dini birlik və bərabərliyə böyük önəm verir. Multikulturalizmin ardınca bunun elan olunması deyilənlərə, bir növ, möhür vurdu. "İslam Həmrəyliyi İli"nin elan olunması ilə bağlı xəbər İslam dünyası üçün həm də bir müjdə xəbəri oldu. Təbii ki, həmin ölkələrin ictimaiyyət nümayəndələrinin də ölkəmizi tanımasına ehtiyac var. Yəqin ki, fərmandan irəli gələn zəruri işlər görüləcək. Həm Ruhani İdarə, həm də Dini Komitənin xəttilə bəzi konfranslar keçiriləcək. Biz istərdik ki, dediyiniz formatda çox böyük bir neçə tədbir keçirilsin. Çünki bunun həm İslam dünyasına, həm də bizim milli maraqlarımıza böyük faydası ola bilər. Qarabağ problemi ilə bağlı əsl həqiqətləri İslam dünyasına çatdırmaqda bundan gözəl vasitə ola bilməz. Əminəm ki, yerli ictimaiyyət də deyilən təşəbbüsü dəstəkləyəcək".
Məhəmmədəli QƏRİBLİ
