"Azərbaycanın maraqlarının qorunmasında dövlət başçısı hər zaman çevik və məqsədəuyğun siyasət yeridir"
"Bir neçə gündür ölkə mətbuatında Dağlıq Qarabağın "KVN" komandalarının beynəlxalq festivalın iştirakçılarının siyahısından çıxarılması ilə bağlı atılan addımlar haqqında məlumatlar yayılır". Bu sözləri Azərbaycan Prezident Administrasiyası rəhbərinin müavini, Xarici əlaqələr şöbəsinin rəhbəri Novruz Məmmədov özünün "facebook" şəbəkəsindəki səhifəsində yazıb.
"Nazirliklər bu addımları ölkə başçısının tapşırığından sonra atdıqlarını qeyd etsəydilər, onda ədalətli olardı", - deyə Novruz Məmmədov bildirib.
Məlumat üçün qeyd edək ki, Azərbaycanın Ermənistan tərəfindən işğal olunmuş ərazilərində yaradılmış qondarma rejim adından fəaliyyət göstərən "S xlebom i solyu" və "DeleYaman" "KVN" komandaları yanvarın 10-23-də Soçidə keçirilən 28-ci Beynəlxalq ŞHK festivalında iştirak etməyə cəhd göstərmişlər. Ancaq Azərbaycanın Gənclər və İdman, eləcə də Xarici İşlər nazirliklərinin müraciətindən sonra həmin komandalar tədbirdən kənarlaşdırıldılar.
O da məlumdur ki, Prezident İlham Əliyev Azərbaycanın maraqlarını qorumaq, ölkənin dayanıqlı inkişafını təmin etmək üçün hər zaman çalışır. O cümlədən, ölkəyə yönəlik istənilən bu kimi təxribatların qarşısını almaq üçün zəruri addımlar atır. Bu baxımdan sözügedən məsələ ilə bağlı Novruz Məmmədovun iradlarını ekspertlər necə dəyərləndirir?
İctimai Problemlərin Tədqiqi Assosiasiyasının rəhbəri Məhərrəm Zülfüqarlının fikrincə, müvafiq qurumlar bu kimi məsələlərdə diqqətli olmalıdır: "Ona görə ki, Azərbaycanın maraqlarının qorunmasında dövlət başçısı hər zaman çevik və məqsədəuyğun siyasət yeridir. Dəfələrlə biz bunun şahidi olmuşuq. Məsələn, elektrik enerjisi və qazın limitinin artırılması məhz dövlət başçısının təşəbbüsü ilə reallaşdı. Belə misallar çox çəkmək olar. O cümlədən, "KVN"lə bağlı erməni təxribatının qarşısının alınmasında dövlət başçısının qətiyyəti danılmazdır. Bu baxımdan hesab edirəm ki, sözügedən məsələlərdə müvafiq qurumlar daha ayıq-sayıq davranmalı və dövlət başçısının rolunu qeyd etməlidirlər. O da məlum həqiqətdir ki, ermənilər bütün sahələrdə Azərbaycana qarşı təxribat törətmək istəyir. Onlar təkcə işğalla kifayətlənməyərək, bizim bütün maddi-mənəvi irsimizi öz adlarına çıxarmaq istəyir. Belə məsələlərdə hamı ayıq-sayıq olmalıdır".
Vidadi ORDAHALLI
