Məlum olduğu kimi, cari il Azərbaycanda "İslam Həmrəyliyi İli" elan edilib. Ölkə daxilində və xaricində verilən qiymətlər isə "İslam Həmrəyliyi İli" elan edilməsinin həm vacib, həm də indiki dünya reallığında çox mühüm olduğunu üzə çıxarır.
Oun da xatırladaq ki, Prezident İlham Əliyev Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında da bu məsələ ilə bağlı çox maraqlı fikirlər səsləndirib.
Önjə IV İslam Həmrəyliyi Oyunlarına toxunan dövlət başçısı qeyd edib: "Bu il Azərbaycanda IV İslam Həmrəyliyi Oyunları keçiriləcək. Bu çox önəmli beynəlxalq tədbirdir, bütün müsəlman aləminin həmrəylik oyunlarına biz ev sahibliyi edəcəyik. Bu təkcə idman tədbiri deyil. Əgər kimsə hesab edir ki, İslam Həmrəyliyi Oyunları idman tədbiridir, səhv edir. Bu böyük siyasi tədbirdir, bu böyük mədəni tədbirdir, bu böyük ictimai hadisədir. Bu bir daha Azərbaycanı müstəqil, öz dəyərlərinə, İslam dəyərlərinə sadiq ölkə kimi, eyni zamanda, müasir ölkə kimi göstərir və bu gün İslama qarşı çirkin kampaniya aparanlara da bir cavab olacaq. Çünki onlar İslam haqqında rəy formalaşdırırlar ki, İslam geridə qalmış sivilizasiyadır. Onlar öz imkanları hesabına həm mediada, həm ictimai fikirdə, həm dəmüxtəlif qeyri-hökumət təşkilatları çərçivəsində rəy formalaşdırırlar ki, İslam dünya üçün təhlükədir, İslamı terrorizmlə eyniləşdirirlər, islamofobiyaya rəvac verirlər, xalqları dinə görə bölürlər, müsəlman qaçqınlarına hörmətsizlik edirlər. Avropa İttifaqına üzv olan bəzi ölkələrin rəhbərləri "Stop İslam" deyir. Bəziləri deyir ki, biz miqrantları qəbul etməyə hazırıq, ancaq müsəlmanları yox. Bu, faşizmdir və faşizm harada yaranıb, biz yaxşı bilirik və unutmamışıq. Faşizm İslam aləmində yaranmayıb. Ona görə, İslam Həmrəyliyi Oyunlarının çox böyük mənası var. Biz bu Oyunları keçirməklə bir daha gücümüzü, imkanlarımızı göstərəcəyik, dini dəyərlərimizə sadiqliyimizi nümayiş etdirəcəyik, çalışacağıq ki, İslam aləmini birləşdirək. Bizi bölmək, aramıza nifaq salmaq, bir-birimizə qarşı qoymaq istəyənlər öz hədəflərinə çatmamalıdırlar".
Ekspertlər də hesab edir ki, indiki vəziyyətdə İslam aləminin birləşdirilməsinə həqiqətən böyük ehtiyac var. Sirr deyil ki, İslam ölkələri arasında qarşıdurma yaratmaq, məzhəb və təriqət ayrıseçkiliyi salmaq istəyən xarici qüvvələr var. Bunun əsas səbəblərindən biri İslam dünyasının yerləşdiyi coğrafiyanın, islam ölkələrinin təbii sərvətlərlə zəngin olmasıdır. Statistika göstərir ki, hazırda dünyada olan neft ehtiyatlarının 62%-i, təbii qaz ehtiyatlarının isə 60%-i islam ölkələrinin ərazisindədir. Enyi zamanda bu fonda dünyada mövcud münaqişələrin böyük əksəriyyəti də müsəlman ölkələrinin payına düşür. Bu mənada İslam aləminin birləşdirilməsi, onlar arasında həmrəyliyin olması çox vacibdir və Azərbaycan bu istiqamətdə mühüm addımlar atır. İranın Azərbaycandakı keçmiş səfiri Möhsün Pakayin də bildirir ki, Azərbaycanda "İslam Həmrəyliyi İli"nin elan olunması təqdirəlayiqdir və hazırda İslam dünyasının dostluğa və birliyə daha çox ehtiyacı var. Diplomat "AzərTAc"a müsahibəsində bildirib ki, bu il Bakıda keçiriləcək IV İslam Həmrəyliyi Oyunları da müsəlmanların birliyinə töhfə olacaq: "Bu Oyunların əsas hədəfi təkcə İslam ölkələrinin idmançılarını deyil, ictimaiyyətlərini də bir araya gətirməkdir. Oyunlar İslam ölkələrinin dostluğunun və qardaşlığının simvoluna çevriləcək. Azərbaycanın mötəbər idman tədbirlərinə ev sahibliyi etmək üçün böyük təcrübəsi var. Bu onu deməyə əsas verir ki, İslam Həmrəyliyi Oyunları da yüksək səviyyədə keçiriləcək".
Bu ilin Azərbaycanda "İslam Həmrəyliyi İli" elan edilməsi qardaş Türkiyədə də böyük rəğbətlə qarşılanıb. Məsələyə münasibət bildirən Türkiyə Respublikasının Diyanət İşləri başqanı Mehmet Görmez deyir: "Bütün insanlığın sevgiyə, mərhəmətə, həmrəyliyə çox ehtiyac duyduğu bir zamanda Azərbaycanda "İslam Həmrəyliyi İli" elan edilməsi olduqca humanist və sülhsevər bir təşəbbüsdür. İnanıram ki, Azərbaycan qədim və zəngin mədəniyyəti ilə bu həmrəyliyə böyük töhfələr verəcək, İslam aləmində, ümumiyyətlə bütün dünyada insanlar arasında sevgi və məhəbbət, mərhəmət hisslərini gücləndirəcək. Azərbaycan Prezidentinin bu təşəbbüsü müsəlman aləmində həmrəyliyin möhkəmlənməsinə, bu istiqamətdə önəmli işlərin görülməsinə təkan verəcək. Qardaş Türkiyə olaraq "İslam Həmrəyliyi İli"ndə biz də öz köməyimizi göstərmək üçün əlimizdən gələni əsirgəməyəcəyik. Heç şübhəsiz, "İslam Həmrəyliyi İli" təkcə Azərbaycanda deyil, bütün İslam aləmində sülhün, əminamanlığın, həmrəyliyin yaranmasında və möhkəmlənməsində mühüm rol oynayacaq". Rusiya Dövlət Dumasının deputatı Dmitri Savelyev isə qeyd edir: "Məhz Azərbaycan dünyaya düzgün millətlərarası və konfessiyalararası siyasət nümunəsi göstərir. Bunun sayəsində əhalisi əsasən müsəlmanlardan ibarət olan Azərbaycan, məsələn, bugünkü Avropanın üzləşdiyi onlarla problemlə heç vaxt qarşılaşmayıb". Dövlət Dumasının deputatı əmindir ki, bu il may ayında Bakıda keçiriləcək İslam Həmrəyliyi Oyunları azarkeşlərə də güclü təsir bağışlayacaq.
Nahid SALAYEV
