Mehdi Mehdiyev: "Adətən müharibə zamanı belə koordinasiyanın olmaması əlavə tələfat və itkilərə səbəb olur"
Azərbaycan Prezidenti, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən keçirilən irimiqyaslı təlimlərə Hərbi Dəniz Qüvvələrinin gəmi və katerləri cəlb olunub. Bu barədə Azərbaycan Müdafiə Nazirliyinin mətbuat xidmətindən məlumat verilib. Təlimlərdə iştirak edən gəmilərin və şəxsi heyətin ümumi hazırlığı, Xəzər dənizinin Azərbaycana mənsub hissəsində əməliyyat şəraiti və HDQ-nin idarə olunması yoxlanıb.
Təlimlərin ilkin mərhələsində HDQ-nin tam döyüşə hazır vəziyyətə gətirilməsi, gəmi qruplarının, hissə və bölmələrin cəmləşmə rayonlarına çıxışı, komplektləşdirmə və döyüş uzlaşması tədbirləri müvəffəqiyyətlə yerinə yetirilib.
Təlimlərin gəmi və katerlərinin cəlb olunması ilə keçirilən mərhələsinin məqsədi Xəzər dənizinin əməliyyat zonasında enerji infrastrukturunun mühafizəsi, terror-diversiya qrupu tərəfindən ələ keçirilmiş gəminin helikopterdən endirilmiş xüsusi təyinatlılar tərəfindən azad edilməsi və tapşırıqların yerinə yetirilməsi zamanı digər qoşun növləri ilə uzlaşdırılmış birgə fəaliyyətlərin icrasından ibarətdir.
Keçirilən genişmiqyaslı təlimlərə Hərbi Dəniz Qüvvələrinin də cəlb edilməsi hansı mahiyyəti daşıyır?
Ehtiyatda olan zabit Mehdi Mehdiyev qəzetimizə açıqlamasında bildirdi ki, bu tam normal bir haldır: "Bildiyimiz kimi, bütün Silahlı Qüvvələr vahid komandanlıq altında fəaliyyət göstərir. Cənab Prezident də bütün Silahlı Qüvvələrin Ali Baş Komandanıdır. Hətta müharibə şəraitində olmayan ölkələrdə belə mütəmadi şəkildə hərbi təlimlər keçirilir. Bizim torpaqlarımız işğal altındadır. Azərbaycan hər an müharibəyə başlaya bilər. Bu baxımdan da genişmiqyaslı hərbi təlimlərin keçirilməsi vacib və zəruridir. Hazırda cəbhə bölgəsində belə təlimlərə start verilib. Bəli, hərbi təlimlərə Hərbi Dəniz Qüvvələri də cəlb edilib. Bu olduqca lazımi prosesdir. Bütün silahlı qüvvələr arasında qarşılıqlı əlaqənin yaradılması baxımından gərəklidir. Adətən müharibə zamanı belə koordinasiyanın olmaması əlavə tələfat və itkilərə səbəb olur. Hərbi nöqteyi-nəzərdən zəruri sayılan addımdır".
Məhəmmədəli QƏRİBLİ
