Bilmirəm,bəlkə də yanılıram ancaq bu vaxta qədər gəldiyim qənaətə görə insanın insanlıq dərəcəsi hər şeydən öncə mənsub olduğu millətinə,onun tarixinə,adət-ənənələrinə,ailəsinə, ünsüyyətdə olduğu insanlarla münasibətində özünü biruzə verir. Elə bu yerdə atamın hər zaman təsdiqini tapmış bir fikrini yenə xatırladım. ‘’ İnsanın özü qədər heç kəs onu tanıda bilməz...’’ Mən də, uşaqlıq illərimdən tanıdığım,tanıdıqca heyran qaldığım ,hər gün daha çox sevdiyim Məhəbbət xanım belə şəxsiyyətlərdən biridir. Elə bəri başdan deyim ki , ‘’biridir’’ sözünün ardınca adlar siyahısı tərtib etmək lazım gəlsə barmaqla sayılacaq qədər çox az olacaq.....
70-ci illərin adi günlərindən biri idi.Qonaq otağında iri,dairəvi stolumuzun arxasına keçib ev tapşırıqlarını hazırlayırdım. Diqqətimi qurulu qalan televezordan boy göstərən gözəlliyilə səsinin sehrinə düşdüyüm bir aparıcı məni valeh etdi. Yavaş-yavaş gəlib düz televezorla üzbəüz dayandım. ‘’İncəsənət’’ proqramı yayımlanırmış... Proqram bitəndə divar saatına baxdım.Otuz beş dəqiqəni necə ayaq üstə yorğunluq hiss etmədən dayanıb tamaşa etdiyimə zərrə qədər təəcüb etmədim. Televezoru qapadıb yerimə keçəndə atamla qardaşımın da bayaqdan mənimlə bərabər proqramı izlədiyini anladım. Həmən gündən etibarən atamın hər həftə gətirdiyi qəzetləri bir-bir gözdən keçirib tv proqramların siyahısında ‘’İncəsənət’’ verilişinin saatını dəftərçəmdə qeyd etdim. Bu minvalla uzun illər ailəlikcə sevə-sevə mavi ekrandan adı kimi evlərimizə məhəbbət çələngi səpən Məhəbbət xanımMehdiyevanın daimi tamaşaçısına çevrildik.
Zaman keçdi və tale ailələrimizi daha da yaxınlaşdırdı. Məhəbbət xanımın bacısı Fatma müəllimə qardaşım Nazimlə ailə qurdu. Uca Tanrım lütf etdi və müəllimlik fəaliyyətimə başlayan zaman şagirdlərimlə,daha sonra tələbələrimlə tez-tez ‘’Ədəbiyyat’’ muzeyinə ziyarətə gedərkən Məhəbbət xanımı daha yaxından tanımaq fürsətim oldu. Muzeydə çalışan rəhbərlərdən biri kimi ‘’Bu tələbələr üçün giriş ödənişsiz olsun. Onlar rayonlardan,kənddlərdən gəliblər,əminəm ki hamısı da kirayişindi. Biz çalışmalıyıq ki, onlar muzeylərə,teatrlara tez-tez getsinlər və beləcə milli -mənəvi dəyərlərimizlə tanış olsunlar. Bu çox vacibdir’’ deyib bizi qapıda saxlatmağa nə də pul verib bilet almağa qoymazdı. Belə misalları sadaladıqca bitməz və bu nümunələr Məhəbbət xanımın elmimizə,mədəniyyətimizə əlbəttə ki ,milli-mənəvi dəyərlərimizə göstərdiyi sayğıdan əlavə həm də bu dəyərlərin yorulmaz təbliğatçısı kimi dəyərləndirilməlidir. Soruşsalar özü də aldığı mükafatların siyahısını inanın ki tam sadalaya bilməyəcək. Ancaq tanıdığım Məhəbbət xanım üçün pillə-pillə qalxdığı zirvədə ən böyük mükafat mədəniyyətimizi yorulmadan təmsil etmək ,mənəviyyat dünyamızı yaşatmaq ,zənginləşdirmək və qorumaq olub. Məhəbbət xanımın yaşam kredosu da zatən budur. Düşünürəm ki ,bir vacib məqamı da unutmayaq. Məhəbbət xanımın kübarlığı,alicənablığı ,şəxsiyyətində cəmləşən yüksək insanı keyfiyyətlər ,təbiətindəki mülayimlik,qayğıkeşliyin bir səbəbi də dünyaya göz açdığı ata ocağında nəfəsiylə,tərbiyəsiylə böyüdüyü bu gün də adları ehtiramla yad edilən , atası İsa Hüseynli,anası Nüşabə xanımla və əlli ilə yaxın ömür-gün yoldaşı böyük sənətkarımız İdris Mehdiyevlə də bağlı deyilmi...?. Hamı bir səslə deyəcək ki ‘’Əlbəttə belədir’’. On il öncə (2015 ci il) İdris bəyin vəfatı ailəsi qədər bizləri də sarsıtdı. Bu on ildə hər gün evində günün demək olar ki ,bütün saatlarında şirin,həzin səsini dinləyə-dinləyə Məhəbbət xanımın ilk və son sevgisinə həsr etdiyi şeirləri məhəbbət abidəsidir,onları sadəcə oxuyub keçməklə olmur. Belə munis qəlbin sahibini necə sevməyəsən?
Sən yazı sevirdin, mənsə payızı
Sən bahar oğluydun, mən payız qızı.
Sən ki, bu dünyandan payızda köçdün,
De, necə sevim mən indi payızı.?..
Həməşə demişəm və bir daha təkrar etmək istəyirəm. Elə insanlar var ki, onların keçdiyi həyat yolu bir ÖRNƏKDİR,bir MƏKTƏBDİR. Məhəbbət xanımı sadəcə diktor,muzeyşünas,alim,tərcüməçi kimi cəmiyyətə təqdim etmək ən azı insafsızlıqdı. Cəsarətlə deyirəm Bizim Məhəbbət xanım dostlarını,ailəsini,insanlığı sevən,bəşəriyyəti sevən və ədalətli görmək istəyən şəxsiyyətdir. Onun keçdiyi çətin,çətin olduğu qədər şərəfli ömür yolundan öyrəniləsi çox dəyərlər var. Tələsin...
PS. Bu gün Məhəbbət xanım 80 yaşını qeyd edir. Şəxsiyyətlərin yaşı əməlləriylə xatırlanır. Arzu edirəm ki Sizi sevənlər hələ uzun illər təqvimi gülə-gülə çevirib dünyaya gəlişinizi sevə-sevə qeyd etsinlər.
Bakı, Jalə Cəfərova. Yazar-tədqiqatçı jurnalist.
