Nizami Hüseynov: "Yaxşı olar ki, bağçalarda tibb bacıları müəllimlər kimi imtahanla işə götürülsün"
Şagirdlərin orta təhsil müddətində uğur qazanmaları üçün hələ məktəbəqədər dövrdən onların zehni və fiziki sağlamlıqlarının qeydinə qalınması mütləqdir. Bu işin öhdəsindən gələ bilmək üçün məktəbəqədər təhsil müəssisələrində tibbi xidmət təşkil olunub. Lakin ölkəmizdəki uşaq bağçalarının heç də hamısında tibbi xidmət göstərilmir.
Məktəbəqədər və Ümumi Təhsil üzrə Dövlət Agentliyinin məlumatına görə, Azərbaycan üzrə fəaliyyət göstərən 1 668 məktəbəqədər təhsil müəssisəsindən (uşaq bağçası) 1 091-də tibb bacısı fəaliyyət göstərir. Bildirilib ki, bağçalarda tibb bacısı vəzifəsi üzrə vakant olan bağçaların sayı 339-dur. Yəni 339 uşaq bağçasında tibb bacısı yoxdur.
Təhsil müəssisələrinə tibb bacıları hansı şərtlərlə qəbul olunur? Ümumiyyətlə, 339 bağçada tibb bacısı niyə yoxdur?
"Məktəbəqədər təhsil müəssisələrində tibbi xidmətin təşkili ilə bağlı ciddi problemlər var"
Təhsil eksperti Nizami Hüseynov "Bakı-Xəbər"ə açıqlamasında bildirdi ki, məktəbəqədər təhsil müəssisələrində tibbi xidmətin təşkili ilə bağlı ciddi problemlər var: "Xüsusilə də qış aylarında uşaqların qrip və soyuqdəymə riski çoxalır. Təbii ki, uşağı bu xəstəliklərdən tam sığortalamaq mümkün deyil. Amma hər şeydə olduğu kimi burada da müəyyən hədd var. Qrip və bu kimi xəstəlik daşıyıcıları bağçalara daxil olduqda tibb xidmət göstərən əməkdaşı profilaktik tədbirlər həyata keçirməlidir. Bağça rəhbərliyi müəssisənin tibbi personalı ilə hər gün monitorinq aparmalı, şagirdlər arasında qrip virusu ilə bağlı təhlükə varsa, o zaman bütün azyaşlılar qoruyucu maskalardan istifadə etməli, həmin şagird müvəqqəti olaraq sonuncu partada əyləşməlidir. Qrup tərbiyəçisi virusa yoluxmuş şagirdin digər şagirdlərlə ünsiyyətinə diqqət yetirilməlidir. Məktəbin tibb işçiləri uşaqlar arasında müayinələr aparmalı, xəstəliyi olan şagirdlər barədə onların şəxsi işlərinə məlumat yazmalıdırlar".
Ekspert onu da əlavə etdi ki, bəzi dövlət bağçalarında hər gün uşaqlar tibb bacısı tərəfindən müayinə olunur: "Bu qayda həm özəl, həm də dövlət bağçalarında tətbiq olunur. Ancaq ucqar ərazilərdə vəziyyət heç də yaxşı deyil. Hətta ştatda tibb bacısının adı olsa da özü olmur. Yaxşı olar ki, bağçalarda işə götürülən tibb bacıları müəllimlər kimi imtahan olunsun. Nəzərə almaq lazımdır ki, məktəbəqədər təhsil müəssisələrində çalışan tibb bacıları körpələrin sağlamlığına cavabdehdirlər".
Günel CƏLİLOVA
