I Qarabağ müharibəsi əlilləri mətbuata şikayət ediblər ki, birdəfəlik ödəmələrini ala bilmirlər. Baxmayaraq ki, 2021-ci il dekabrın 23-də Prezident İlham Əliyev I Qarabağ müharibəsi əlillərinə birdəfəlik ödəmələrin verilməsi ilə bağlı fərman imzalayıb.
Lakin Fərmanın imzalanmasından bir neçə ay keçsə də, hələ də l Qarabağ müharibəsi əlilləri onlar üçün müəyyən olunan sığorta pulunu ala bilməyiblər. Qeyd edilənə görə, birdəfəlik ödəmə 17-20 min şəxsi əhatə edəcək və həmin ödəmələr üçün 2021-ci ilin dövlət büdcəsindən ilkin olaraq 50 milyon manat vəsait ayrılıb.
Nazirlik: “...Yaxın günlərdə ictimaiyyətə açıqlama veriləcək”
Onu da vurğulayaq ki, Dövlət Sosial Müdafiə Fondunun İdarə Heyətinin sədr müavini Səfər Mehdiyev I Qarabağ müharibəsi əlillərinə birdəfəlik ödənişin iyul ayında verilməsinin nəzərdə tutulduğu haqqında məlumat vermişdi. Nazir Sahil Babayev də iyun ayında işlərin yekunlaşacağını bildirmişdi. Əmək və Əhalinin Sosial Müdafiəsi Nazirliyinin Şöbə müdiri Fazil Talıbov isə açıqlamasında bununla bağlı işlərin getdiyini bildirdi: “I Qarabağ müharibəsi əlillərinə birdəfəlik ödəmələrin verilməsi ilə bağlı yaxın günlərdə ictimaiyyətə açıqlama veriləcək”.
Ortada Prezident Fərmanı olduğu və konkret vaxt müəyyən olunmasına baxmayaraq, hələ də I Qarabağ müharibəsi əlillərinin birdəfəlik yardımının gecikməsi nə ilə bağlı ola bilər? Rəsmi tərəf yaxın günlərdə ictimaiyyətə açıqlama veriləcəyini deyir, olmazdımı bunu vaxtında icra edəydilər ki, söz-söhbət, nigarançılıq olmayaydı?
Akif Nəsirli: “Yanvar ayından sonra fevraldan, martdan bu insanların vəsaitlərinin ödənilməsi mümkün idi, amma niyə ödəmirlər, bilmirəm”
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində bildirdi ki, ümumiyyətlə, Azərbaycan digər sosial müdafiəyə ehtiyacı olan zümrələrlə yanaşı, istər Birinci, istərsə də İkinci Qarabağ müharibəsi əlillərinə də etinasız yanaşma var. “Buna çox təəssüf edirəm. Bu çox zərərli tendensiyalara aparıb çıxara bilər. Müharibə əlilləri mövzusu, ümumiyyətlə, dünya ölkələrində həssas mövzudur. Hətta despot ölkə kimi tanıdığımız İranda belə bu məsələyə çox həssas yanaşılır...”
A.Nəsirli qeyd etdi ki, indiyə qədər I Qarabağ əlili statusu almış şəxslərin bəzilərinin əlilliyi ləğv edilib, II Qarabağ müharibəsində iştirak edənlərin də hələ xeyli hissəsi əlilliyini sübut edib əlillik ala bilməyib. I Qarabağ müharibəsi əlillərinin birdəfəlik ödəməsinin gecikməsi təəssüf doğurur. Prezident fərmanının imzalanmasının üstündən 6 aydan çox vaxt keçməsinə baxmayaraq, I Qarabağ əlillərinə birdəfəlik ödəmələr verilməyib. Bu birdəfəlik ödəmənin verilməsi məsələsinin operativ həlli elə də çətin məsələ deyil. I Qarabağ əlillərinin siyahısı var, adları məlumdur, onlar müxtəlif səviyyəli əlillik müavinəti alırlar. Onların adlarını müəyyən edib ödəmələrə başlamaq üçün aylar yox, həfələr lazımdır. Bu, həftə məsələsidir. Burada gecikməyə bəhanə, texniki səbəb axtarmaq düzgün deyil. Çünki bütün məlumatlar hazırda elektron resurslardadır. Elektron resurslarda əlillərin adlarını müəyyən etmək proqramla 1-2 saat vaxt apara bilər. Bu bunun texniki tərəfidir. Digər tərəfdən də, bu işin maliyyələşmə məsələsində çətinlik ola bilər, amma burada da problem yoxdur”.
A.Nəsirlinin sözlərinə görə, ödəmə sahəsində heç bir problem ola bilməz, çünki büdcədən də 50 milyon vəsait ayrılıb: “Bu insanlara birdəfəlik vəsaitlərin ödənilməsi niyə ləngiməlidir? Bunu heç nə ilə izah etmək olmaz. Texniki problem də, maliyə problemi də yoxdur, elə isə biz niyə Vətən yolunda canını qoymuş əlillərimizə qanuni qaydada prezidentin verdiyi birdəfəlik yardımı vermirik? Bu ciddi sual doğurur. Hesab edirəm ki, bu məsələyə nazirlik daha müfəssəl açıqlama verməlidir. Səbəb nədir ki, bu 6 ay müddətində bir nəfər də olsun I Qarabağ müharibəsi əlilinə sığorta pulu ödənilməyib? Yanvar ayından sonra fevraldan, martdan bu insanların vəsaitlərinin ödənilməsi mümkün idi, amma niyə ödəmirlər, bilmirəm”.
Əli TURABOV
