Prezidentin ötən ilin dekabrında dövlət uşaq bağçalarının yerli icra hakimiyyətlərindən alınaraq Təhsil Nazirliyinin tabeliyinə verilməsi barədə imzaladığı sərəncam cəmiyyətdə məktəbəqədər təhsil müəssisələrinin fəaliyyətində köklü dəyişikliklər olacağına inam yaradıb.
Çünki bağçaların icra hakimiyyətlərinin tabeliyində olduğu bu on ildə məktəbəqədər təhsil müəssisələrində baş verən özbaşınalıqlar və qanunsuzluqlar sadalamaqla bitməz.
Bağça müdirlərinin dövlətin maliyyələşdirdiyi məktəbəqədər təhsil müəssisəsində qanunsuz VİP qruplar açaraq belə qruplara ödənişlə uşaq cəlb etməsi, bağçalarda çarpayı sayını gizlədərək rüşvətlə uşaq qəbul etməsi kimi özbaşınalıqların hamısı bağçaların yerli icra hakimiyyətlərinin tabeliyində olduğu dövrə təsadüf edir.
Bu günlərdə Azərbaycan Qida Təhlükəsizliyi Agentliyi tərəfindən bağçalarda müvafiq yoxlama-nəzarət tədbirləri keçirilərək inzibati intizam tədbirləri görülüb. Ölkə ərazisində fəaliyyət göstərən 1600-dən çox məktəbəqədər təhsil müəssisəsindən 1000-ə yaxınında Azərbaycan Qida Təhlükəsizliyi Agentliyi tərəfindən müvafiq yoxlama-nəzarət tədbirləri keçirilərək inzibati intizam tədbirləri görülüb. Onu da qeyd edək ki, Təhsil Nazirliyi tərəfindən məktəbəqədər təhsil müəssisələrində aparılmış monitorinq nəticəsində 11 nəfər bağça müdiri tutduğu vəzifədən azad edilib. Monitorinq zamanı sözügedən müəssisələrdə ərzaq təminatı, ərzaq və mətbəxin saxlanılma vəziyyəti, tədris vəsaitlərinin təminatı, uşaqların davamiyyətinin təşkili, sənədləşmənin aparılması, sanitar-gigiyena qaydalarına əməl olunması və digər sahələrdə ciddi nöqsan və çatışmazlıqlar aşkar olunub.
Qeyd etdiyimiz kimi, bağçalarla bağlı problem uzun illərdir yaşanır. Maraqlıdır, bu sahədə yaşanan problem necə həll olunacaq?
“Ayrı-ayrılıqda tədbirlərin görülməsi ciddi dəyişikliyə gətirib çıxarmayacaq”
Təhsil eksperti Elşən Qafarov bildirdi ki, təhsil sisteminin ilk pilləsi olan məktəbəqədər təhsil müəssisələrinin infrastrukturu 10 il ərzində tamamilə dağıdılıb, məhv edilib. Bağçalarda təlim-tərbiyə işinin lazımi səviyyədə qurulmayıb, uşaqların bu müəssisələrə qəbulu zamanı ciddi qanun pozuntularına və neqativ hallara yol verilib: “Bir sözlə bağçaların yerli icra hakimiyyətinin tabeliyinə verilməsi təhsilin bu pilləsinin məhv edilməsi ilə nəticələnib. Hazırda Təhsil Nazirliyi tərəfindən bağçalardakı neqativ halların, qanun pozuntularının, məktəbəqədər təhsil müəssisələrində illərlə mövcud olan “vəziyyətin” aradan qaldırılması istiqamətində müvafiq tədbirlər görülür. Bu hələ məktəbəqədər təhsildə olan ümumi neqativ halların aradan qaldırılması demək deyil. Fikrimcə, görülən işlərin qısa müddətdə nəticəsi olmayacaq. Bağçalardakı vəziyyəti düzəltmək üçün illər lazımdır. Sistemin yenilənməsi, optimallaşdırılması istiqamətində işlər görülmür. Ancaq ayrı-ayrı hadisə və halların üzərinə gedilir. Bu zaman bir nəticə əldə etmək mümkün olmayacaq. Ola bilər ki, neqativ hallar qismən azalsın, amma tamamilə aradan qalxmayacaq. Ayrı-ayrılıqda tədbirlərin görülməsi ciddi dəyişikliyə gətirib çıxarmayacaq. Amma sistemin dəyişməsi problemləri kökündən həll edəcək və müsbət nəticə əldə olunacaq”.
E.Qafarovun sözlərinə görə, Təhsil Nazirliyi sistemində çalışanların heç biri indiyənədək məktəbəqədər təhsil sistemi ilə işləməyiblər. Bu sahə onlar üçün yad, unudulmuş bir sahədir: “Buna görə də məktəbəqədərin idarə olunması ilə bağlı təcrübənin toplanması, tətbiqi və s. bütün bunlar bir qədər zaman alacaq. Buna görə də bağçalardakı mövcud “vəziyyətin” qısa zamanda düzəlməsi mümkün deyil”.
Günel CƏLİLOVA
