Son illər Bakıda inşa edilmiş yeraltı keçidlərin əksəriyyəti eskalatorla təchiz edilsə də, onların bir qismi işləmir. Bu kimi hallara paytaxtın bütün ərazilərində, o cümlədən Nəsimi rayonunda yerləşən Heydər Əliyev parkı və “Qış parkı”nda rast gəlmək olar.
Eskalatorların işləməməsi hamıya, xüsusilə də yaşlı insanlara çətinlik yaradır. Son nəticədə insanlar yeraltı keçidlərdən istifadə etməməyə, nəqliyyat vasitələrinin sıx olduğu yollarla hərəkət etməyə üstünlük verirlər. Bu isə təhlükəsizlik qaydalarına ziddir.
“Yeraltı və yerüstü keçidlərdə insanların rahatlığının təmin olunması üçün eskalatorların işlək olmasını mütəmadi nəzarətdə saxlamalıdırlar”
Sosioloq Aytəkin Kamranqızı bildirdi ki, yerüstü və yeraltı keçidlərdə eskalatorların işləməməsi insanlara əlavə problemlər yaradır: “Biz hər yerdə deyirik, bəyan edirik ki, insanlar yeraltı və yerüstü keçidlərdən istifadə etməlidirlər. Çünki yollardan birbaşa keçərkən öz həyatlarını təhlükə altına ata bilərlər. Bəllidir ki, eskalatorların işləməməsi insanları çətin duruma salır. Əlilliyi olan və ya yaşlı insanlar işləməyən eskalatorlarla hündür pillələri qalxıb-düşərkən çətinlik çəkirlər. Bu isə onlar üçün çox çətin olur. Obyektiv səbəbdən işləməyən eskalatorlardan istifadə etməyərək birbaşa yolu qadağan olan hissədən keçərək həyatlarını təhlükə altına atırlar. Nəticə etibarilə bir tərəfdən həyatları təhlükə altına düşür, digər tərəfdən qəza şəraitinin yaranmasına səbəb olurlar”.
Həmsöhbətimizin sözlərinə görə, aidiyyəti qurumlar yeraltı və yerüstü keçidlərdə insanların rahatlığının təmin olunması üçün eskalatorların işlək olmasını mütəmadi nəzarətdə saxlamalıdırlar: “Dövlət qurumları ilə yanaşı, vətəndaşlar da bu məsələdə fəal olmalıdırlar. Hansı keçiddə eskalator işləmirsə, vətəndaş dərhal bu barədə aidiyyəti qurumu məlumatlandırmalıdır. Bakı şəhərinin bəzi yeraltı və yerüstü keçidlərində ciddi problemlər var. Yağış yağarkən bəzi keçidlərə su dolur. Bu da drenaj sisteminin olmaması ilə bağlıdır. Həmin keçidlər istifadə üçün yararsız olur, piyadalar oradan keçə bilmir”.
Günel CƏLİLOVA
