Son zamanlar paytaxt ərazisində restoranların fəaliyyətinə ciddi nəzarət var. Xüsusilə də Ekologiya və Təbii Sərvətlər Nazirliyi restoranların havanı çirkləndirməyinə qarşı sərt mübarizə apararaq, lazımi nəticələrə gəlməkdədir.
Bir neçə il əvvəl ölkə başçısının sərəncamı ilə Ekologiya və Sərvətlər Nazirliyi məhkəməyə müraciət etmədən havanı çirkləndirən, müvafiq təmizləyici qurğu quraşdırmayan restoran sahiblərini cərimələyə bilər. Bu xüsusda müəyyən addımlar da atılmaqda davam edir. Ekologiya və Təbii Sərvətlər Nazirliyinin mətbuat katibi İradə İbrahimova mətbuata açıqlamasında qeyd edib ki, keçirilən növbəti monitorinqlər və səyyar laboratoriya vasitəsilə aparılan ölçmə işləri zamanı bir neçə gün əvvəl Bakı şəhərinin Binəqədi və Nizami rayonları ərazisində fəaliyyət göstərən “Pink House”, “Kişmiş”, “Sonalar Sonası”, “Üzeyir”, “Hissa”, “Qızıl Qaya” və “Qızıl Buta” restoranlarından, eyni zamanda Sumqayıt şəhərində fəaliyyət göstərən “Yaşıl Bağ” iaşə obyektindən havaya normadan artıq tullantı atılması, atmosferin kanserogen maddələrlə çirkləndirilməsi müəyyən olunub. Faktlarla bağlı Azərbaycan Respublikasının İnzibati Xətalar Məcəlləsinin 234-cü maddəsinin tələblərinə əsasən sözügedən restoran və şadlıq saraylarının istismarçıları barəsində protokol tərtib olunaraq cərimə tətbiq edilib.
Adları yuxarıda qeyd edilən bəzi iaşə obyektlərinin sahibləri və idarəçiləri verilmiş qərardan narazıdır. Onlar iddia edir ki, havaya normadan artıq tullantı atılması ilə bağlı məlumat verilməyib.
“Yaşıl Bağ” restoranı: “Cərimə etməmişdən əvvəl heç bir xəbərdarlıq olunmayıb”
“Yaşıl Bağ” restoranınından bildirildi ki, cərimə etməmişdən əvvəl ona heç bir xəbərdarlıq olunmayıb: “Qonşu şəkillər çəkib göndərib. Deyib ki, tüstü evimə dolur. Mənə desəydi problemi özüm həll edərdim. Birdən-birə gəlib 2000 AZN cərimə yazdılar. Mənə daha öncə heç bir xəbərdarlıq edilməyib”.
Elxan Əliyev: “Havanı çirkləndirən şadlıq evləri bağlanmalıdır”
Sosial sahə üzrə ekspert Elxan Əliyev qeyd etdi ki, restoranların və şadlıq saraylarının ekologiyaya vurduğu ziyana qarşı dövlət orqanlarının gördüyü işlər təqdirəlayiqdir: “Görüləcək tədbirlər ətraf mühitin çirklənməsinin qarşısının alınmasına və insanları narahat edən halların aradan qaldırılmasına təsir edəcək. Bu işdə əhalinin fəallığı lazımdır. Əgər əhali elə yerləri boykot etsə, dövlət orqanlarının qərarları asanlıqla yerinə yetirilər”.
Ekspertin sözlərinə görə, havanı çirkləndirən şadlıq evləri bağlanmalıdır: “Çünki o restoranlar ekologiyaya zərər yetirir, ətrafda yaşayan sakinlərin sağlamlığına təsir edir. Aidiyyəti qurumlar xüsusi hava təmizləyən qurğusu olmayan şadlıq evlərini araşdırır və onlarla mübarizə aparır. Müasir standartlara cavab verməyən, təmizləyici qurğuları olmayan ictimai iaşə obyektləri bağlanmalıdır. Çünki o obyektlərə dəfələrlə qeyd olunan qurğunun quraşdırılması ilə bağlı xəbərdarlıq olunub. Ancaq onlar xəbərdarlığa əhəmiyyət verməyiblər. O üzdən, bu tip məkanların fəaliyyəti dayandırılmalıdır. Restoran və şadlıq evləri yaşayış məskənlərinə yaxın ərazidə fəaliyyət göstərir. Bu məkanlardan kənara çıxan tüstü ətrafda yaşayan insanların haqlı narazılığına səbəb olur”.
Günel CƏLİLOVA
