Bu gün cəmiyyətimizdə ən ağrılı problemlərdən biri ölkənin lift təsərrüfatındakı problemlərlə bağlıdır. Çox təəssüf ki, paytaxtın lift təsərrüfatı hələ də düzəltməyib, gündə lift qəzalarının baş verməsi bunu deməyə əsas verir. İddia olunur ki, bu sahəyə ayrılan vəsait aidiyyəti sahə üzrə xərclənmədiyi üçün vəziyyət bu şəkildədir.
Mətbuatda yer alan rəsmi məlumata görə, 2019-cu ildə Prezident İlham Əliyev şəhər və rayon mərkəzlərində olan binalarda liftlərin maddi-texniki bazasının möhkəmləndirilməsi haqqında sərəncam imzalayıb. Bu sərəncama əsasən şəhər, rayon mərkəzlərində dövlət mənzil fonduna aid olan binalarda quraşdırılması məqsədi ilə yeni liftlərin mərkəzləşdirilmiş qaydada alınması və istismarda olanların bərpası üçün Prezident Ehtiyat Fondundan Bakı Şəhər İcra Hakimiyyətinə 40 milyon manat ayrılmışdı. Bildirilənə görə, növbəti illərdə ölkə başçısı ölkə ərazisində lift təsərrüfatının yenilənməsi üçün vəsaitlər ayırıb. Lakin bu qədər vəsaitə rəğmən problem yenə də qalmaqdadır, hələ də köhnə, qəzalı liftlər var, hələ də lift qəzaları baş verir.
Maraqlıdır, lift təsərrüfatına ayrılan 40 milyon manat və digər vəsaitlər bu sahəyə tam yönəlməyibmi ki, bu problemlər hələ də mövcuddur, hələ də liftlər dəhşət saçır? Bu pulların hara xərcləndiyi, yönəldildiyi ictimaiyyəti ciddi maraqlandırır.
Bakı Lift-Təmir İstehsalat Birliyi: “Bizim müsahibə vermək səlahiyyətimiz yoxdur”
Məsələ ilə əlaqədar Bakı Lift-Təmir İstehsalat Birliyinə və Bakı Şəhər İcra Hakimiyyətinə (BŞİH) müraciət etdik. Bakı Lift-Təmir İstehsalat Birliyinin baş mühəndisi “Bakı-Xəbər”in sorğusuna cavab olaraq bildirdi ki, təmsil etdiyi idarənin bu barədə danışmaq səlahiyyəti yoxdur: “Bizim müsahibə vermək səlahiyyətimiz yoxdur. Bakı Lift-Təmir İstehsalat Birliyi BŞİH-in bir qurumudur. Siz sorğunuzu Bakı Şəhər İcra Hakimiyyətinə göndərin, cavablandırılacaq”.
BŞİH-nin aidiyyəti şöbəsindən isə telefon zənglərimizə cavab verilmədiyi üçün elektron poçt vasitəsilə quruma rəsmi sorğu göndərdik və sorğunun cavabı gələn kimi, sizə təqdim edəcəyik.
Ramil Osmanlı: “Bu vəsait icraçı quruma, BŞİH-nin lift təsərrüfatı ilə məşğul olan departamentinə ayrılıb, bu vəsaitin taleyini onlar bilir”
Daşınmaz əmlak üzrə tanınmış mütəxəssis Ramil Osmanlı bizimlə söhbətində bildirdi ki, bu sahəyə ayrılan vəsaitlərin hara xərcləndiyi, hansı istiqamətə yönəldildiyi sual olaraq qalır. “Prezident sərəncamı ilə ayrılan vəsait və bu vəsaitin təyinat istiqamətləri ilə bağlı suala cavab BŞİH tərəfindən verilməlidir. Sırf qeyd olunan vəsaitin təyinatı üzrə sərf olunub olunmadığını dəqiq deyə bilməyəcəyəm. Bu vəsait icraçı quruma, BŞİH-nin lift təsərrüfatı ilə məşğul olan departamentinə ayrılıb, bu vəsaitin taleyini onlar bilir. Həmin departament rəhbərlərinin də uşaqları blogerdir və sairdir, onlar 100 minlik, 200 minlik, 1 milyonluq maşınlarda gəzirlər. Bu başqa bir söhbətin mövzusudur.
Amma bütövlükdə ölkədə lift təsərrüfatı iki istiqamətə ayrılır. Dövlətin balansında olanlar və özəl sektorda olanlar. Köhnə yaşayış binaları ki, var, həmin çoxmənzilli yaşayış binaları BŞİH-nin Mənzil Kommunal Təsərrüfat Departamentinin balansındadır. Onlara qulluq da adını çəkdiyimiz digər dövlət qurumu tərəfindən həyata keçirilir. Eyni zamanda dövlət təyinatında olan obyektlər, müəyyən qurumların binaları, ictimai binalar də bura daxildir. Biri də var özəl sektor. Bura mənzil tikinti koperatovləri, MMC-lər tərəfindən inşa olunan çoxmənzilli binalar, otellər, biznes mərkəzlər, ayrı-ayrı özəl qurumların idarəetməsində, mülkiyyətində olan inzibati binalar və sair aiddir. Burada isə artıq belə deyək, lift təsərrüfatına nəzarət birbaşa operator, yəni mülkiyyətçi tərəfindən həyata keçirilir. MTK-nın balansındadırsa MTK, yaxud idarəedici təşkilat, oteldirsə, biznes mərkəzidirsə bu iş təbii ki, sahibkar tərəfindən həyata gerçəkləşdirilir. Bu sahədə ciddi problemlər var. İstər dövlətin balansında olan, istərsə də özəl təsərrüfatda, mülkiyyətdə olan obyektlərdə problemlər mövcuddur. Liftlərə düzgün istismar qaydalarına əməl edilmir, standartlara uyğun olmayan formada quraşdırma edilir. Bu sahədə problem var deyə Bakı şəhərində lift təsərrüfatı ilə bağlı monitorinq aparmalı olsaq görərik ki, bir sıra binalarda liftlər istismara yararlı deyil, onlar istismar müddətini başa vurub. Bir çoxunda onların təmirə ehtiyacı var, ayrı-ayrı hissələri, detalları sıradan çıxıb, təhlükəli vəziyyətdədir. Bakıda lift təsərrüfatının mənzərəsi bu dərəcədə acınacaqlıdır”- deyə R.Osmanlı vurğuladı.
Əli TURABOV
