Azərbaycanda “Toyota Prius” (hibrid) avtomobillərinin sayı əvvəlki illərə nisbətən daha da artıb. Bu avtomobillər yanacağa qənaət etdiyi üçün hər kəsin diqqətini cəlb edir. “Prius” avtomobillərini vətəndaşlar daha çox Gürcüstandan gətirirlər. Oraya isə avtomobillər əsasən ABŞ-dan, az bir qismi Avropadan gəlir.
ABŞ-da qəzalı vəziyyətdə olan bu avtomobillər auksiona çıxarılır. Alınan “Prius”lar təxminən 2 aya Gürcüstana, oradan isə Azərbaycana gəlir. Onlar qəzalı vəziyyətdə olduğu üçün öncə ustaya aparmaq lazım gəlir. Eyni zamanda, son zamanlar Amerikadan öz adlarına “Prius” sifariş edən azərbaycanlıların da sayı çoxalıb.
Qeyd etdiyimiz kimi, bu avtomobil növününün sayı ölkəmizdə günü-gündən çoxalır. “Toyota Prius” avtomobilləri artdıqca bu maşınların iştirakı ilə baş tutan qəzaların sayı da artır. Demək olar ki, hər gün qeyd edilən avtomobil növü ilə avto qəza baş verir. İki gün öncə “Toyota Prius” markalı avtomobilin 40 nömrəli avtobusla toqquşması nəticəsində yol nəqliyyat hadisəsi baş verib. Bu barədə Bakı Şəhər İcra Hakimiyyəti başçısının tabeliyindəki Bakı Nəqliyyat Agentliyi məlumat yayıb. Qeyd edilir ki, daşıyıcı şirkətdən verilən məlumata əsasən, qəza nəticəsində avtobusda olan sərnişinlərdən dörd nəfər və minik avtomobilinin sürücüsü xəsarət alıb.
“Bu avtomobillərin işlənmiş, təxminən 10-15 il bundan əvvəl istehsal olunmuş versiyaları ABŞ-dan Gürcüstan vasitəsilə Azərbaycana gətirilir”
Nəqliyyat sahəsiz üzrə eksperti Eldəniz Cəfərov bildirdi ki, ölkəmizə gətirilən “Prius”lar, əsasən, ömrünü başa vurmuş olur: “Adətən, bu avtomobillərin işlənmiş, təxminən 10-15 il bundan əvvəl istehsal olunmuş versiyaları ABŞ-dan Gürcüstan vasitəsilə Azərbaycana gətirilir. Həmin avtomobillərin bir qismi yararsız, istismar müddətini başa vurmuş nəqliyyat vasitələridir. Onların içərisində, təbii ki, yaxşı vəziyyətdə olanlar da var. Amma Azərbaycana, əsasən ömrünü başa vurmuş avtomobillər gətirilir”.
E.Cəfərovun sözlərinə görə, bu gün Bakı şəhərində “Prius”ların iştirakı ilə baş verən qəzaların səbəbi bu avtomobilin xüsusiyyətlərindən irəli gəlmir: “İş orasındadır ki, bu avtomobillər Bakıda, əsasən, taksi xidmətində istifadə olunur. Bu gün taksi xidmətlərində daşınmalar mobil tətbiq vasitəsilə həyata keçirilir. Sürücülər telefonlara mobil tətbiq yükləyir və bütün günü, səhərdən gecəyə qədər sürücülərin diqqəti mobil telefondadır. Eyni zamanda qeyd etmək lazımdır ki, bu gün Bakı şəhərində taksi fəaliyyəti ilə məşğul olan sürücülərin bir qismi heç də təcrübəli deyil və bu şəhərin xüsusiyyətinə uyğun taksi idarəetməsini bilmirlər. Bu qəzalar mobil tətbiqə başı qarışan həmin təcrübəsiz sürücülərin ucbatından baş verir. Bu növ avtomobillər heç bir halda təhlükəli avtomobillər deyil. Sadəcə, “Prius”ları Azərbaycanda və həmçinin digər ölkələrdə cəlbedici edən bu nəqliyyat vasitələrinin ABŞ-da ikinci əl bazarında qiymətlərinin çox ucuz və qənaətcil olmasıdır. Həm texniki baxışı az xərc tələb edir, həm benzin sərfiyyatı olduqca azdır. Çünki bu modellər hibriddir. Yəni az xərcli və qənaətcil olduğuna görə bu avtomobillərə üstünlük verilir”.
Günel CƏLİLOVA
