Bu gün əksər marketlərin içərisində təndir yeri açılıb. Həmin təndirdə çörək və digər un məmulatları bişirilir. Mağazaya daxil olan alıcı da təndirdə çörəyin hansı formada bişirildiyini canlı şəkildə görə bilir.
Bu hal bəzi istehlakçılar tərəfindən müsbət hal kimi qəbul edilsə də, mütəxəssislər ictimai yerdə çörək və digər un məmulatlarının bişirilməsinin düzgün hesab etmir. Onların fikrincə, bu hal gigiyenik cəhətdən düzgün deyil.
“Marketlərin içərisində təndirlər açılıb orada hər hansı bir məhsulun bişirilməsi düzgün deyil”
Azad İstehlakçılar Birliyinin (AİB) sədri Eyyub Hüseynov qeyd etdi ki, Azərbaycan çörək istehlakına görə dünyada birinci yerdə dayanır. Ən çox çörək yeyən xalqıq. Bundan başqa, Azərbaycan əhalisi çörəyi çox israf edir. Çörək istehlakı ilə bağlı problemlər də yaşanır.
Ekspertin sözlərinə görə, marketlərin gigiyenik və antisanitar vəziyyəti ürəkaçan səviyyədə deyil: “Marketlərin içərisində təndirlərin açılıb orada hər hansı bir məhsulun bişirilməsi ilə qətiyyən razı deyilik. Çünki həmin yerlərdə milçəklər uçur. Marketlər insanlara mal ilə bərabər milçək yumurtaları da satır. Düşünürəm ki, marketlərin içərisində bu cür istehsal yerlərinin açılması yolverilməzdir. Hazırda marketlər üçün qaydalar yoxdur. Adi və çox sadə sanitar tədbirlərinin həyata keçirilməsi üçün AQTA nəzarət edir. Lakin bu da kifayət etmir. Təəssüflər olsun ki, nəzarət istənilən səviyyədə deyil".
Həmsöhbətimiz onu da əlavə etdi ki, marketin içində təndirlərdə çörək bişirilməsinə son qoyulmalıdır. İstehsalçılar çörəyi mütləq bükməli, istehlakçılar isə açıq çörək almamalıdır: “Bilməlidirlər ki, açıq çörəklər təkcə koronavirus yox, digər xəstəliklərin də mənbəyi ola bilər. Çörəyin hazırlanması, bükülməsi və daşınması ilə bağlı normativlər var. Görürük ki, bu cür çörəklərin əksəriyyəti necə gəldi - avtomobillərin yük yerində və başqa antisanitar vəziyyətdə daşınır. İnsanlar bu cür çörəklərə tələbat yaratmamalı və bu məsələ tezliklə həll olunmalıdır".
Günel CƏLİLOVA
