Sosial şəbəkədə Yeni Günəşli, Qaraçuxur qəsəbələrini Babək prospekti ilə birləşdirən 4 zolaqlı yolun 1 zolağının qəbiristanlıq ərazisinə satıldığına dair məlumat və fotolar yayılıb. İddia olunur ki, həmin ərazi satılıb və 180 yeni qəbir yeri hazırlamaq üçün işə başlayıblar.
Bu barədə ictimai fəal Haldun Novruzzadə sosial şəbəkə hesabında yazıb.
O iddia edir ki, həmin ərazi satılıb: “Bu ərazini kim satıb? Azərbaycan Avtomobil Yolları Dövlət Agentliyi, Suraxanı Rayon İcra Hakimiyyəti yoxsa, Xətai Rayon İcra Hakimiyyəti? Dövlətə məxsus yolu kim satıb insanları zülmə salıb, hər gün tıxacda qoyur?”.
Suraxanı Rayon İcra Hakimiyyəti: “Əraziyə Qaraçuxur bələdiyyəsi nəzarət edir”
Məsələ ilə bağlı Suraxanı Rayon İcra Hakimiyyəti ilə əlaqə saxladıq. İcra Hakimiyyətindən bildirildi ki, sözügedən əraziyə Qaraçuxur bələdiyyəsi nəzarət edir, onlara aidiyyəti yoxdur.
Qaraçuxur bələdiyyəsi: “Torpaq sürüşmələrinin qarşısını almaq üçün Azərbaycan Avtomobil Yolları Dövlət Agentliyi tərəfindən istinad divarı inşa edilir”
Qaraçuxur bələdiyyəsindən qeyd edildi ki, həmin ərazidə heç bir torpaq satışından söhbət belə gedə bilməz: “Sadəcə ərazidə olan torpaq sürüşmələrinin qarşısını almaq üçün Azərbaycan Avtomobil Yolları Dövlət Agentliyi tərəfindən istinad divarı inşa edilir”.
Azərbaycan Avtomobil Yolları Dövlət Agentliyi Anar Nəcəfli: “Betonlama işlərinə görə hazırda orada taxta konstruksiyalar quraşdırılıb, konstruksiyalar götürüləndən sonra…”
Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli qeyd etdi ki. orada yol daralmayıb. Sözügedən ərazidə torpaq sürüşməsinin qarşısını almaq məqsədilə AAYDA tərəfindən istinad divarı inşa edilir. Onun da hesabına yol daralmır: “Sadəcə olaraq, betonlama işlərinə görə hazırda orada taxta konstruksiyalar quraşdırılıb. Konstruksiyalar götürüləndən sonra həmin küçənin də əsaslı təmiri tərəfimizdən nəzərdə tutulur. Yeni piyada səkilərinin inşası olacaq. Tam 4 hərəkət zolaqlı yol müasir görkəmdə istifadəyə veriləcək”.
Günel CƏLİLOVA
