100 yaşlı Cənnət Teymurov: “Həyat yaşamağı sevir...” - FOTO
Cənnət Teymurov. Bu ad Masallı rayonunda hamı tərəfində böyük hörmətlə çəkilir. Elin ləyaqətli ağsaqqalı Cənnət kişi ömrünün 100 ilini yola salır. Vətəninə, xalqına olan halal sevgisi onu yaşından çox cavan saxlayıbdır. Ömrü üzün, ürəyi cavan Cənnət kişi Masallının Viləş kəndində yaşayır. O, Böyük Vətən müharibəsində fasızımın kökünü kəsməkdə əsl qəhrəmanlıq göstəribdir.
Doğma kəndində, el ağsaqqalın yaşadığı həyətdə anadan olmasının 100 illiyi münasibətilə görüş keçirildi. Tədbiri açan Masallı rayon Veteranlar Təşkilatının sədri Məmmədağa Şiriyev bildirdi ki, 1922-ci ildə dünyaya gələn Cənnət kişi rayonumuzda ömür sürən yeganə Böyük Vətən müharibəsi iştirakçısıdır. Yurdunun tərəqqisinə çalışan, hər zaman öz xalqının xoşbəxtliyini düşünən Cənnət kişi bütün Masalı camaatının fəxridir.
Natiq çıxışının sonunda müəllifi olduğu «Masallıdan Qələbəyədək» monumental kitabının siqnal nüsxəsini 100 yaşlı veterana bağışladı.
Söz Masallı RİH başçısının müavini Aybəniz Qafarovaya veriləndə, o öncə gül buketini yubilyara təqdim etdi, icra başçısının salamlarını 100 yaşlı veterana və tədbir iştirakçılarına çatdırdı, eləcə ona rayon rəhbəri tərəfindən maddi yardım ayrıldığını bildirdi. Daha sonra el ağsaqqalın həyat və döyüş yolu haqqında danışdı: - Böyük Vətən müharibəsində göstərdiyi qəhrəmanlıqları ilə yaddaşlarda iz qoyan Azərbaycan oğullardan biri də Cənnət Teymurov olubdur. Bir çox həmyerlilərimiz kimi, o, da cəsur döyüşçü kimi vuruşmuş, hünər göstərmiş, sinəsini müxtəlif illərdə aldığı orden və medallar bəzəyir. Müharibədən sonrakı illərdə də nurlu əməlləri hesabına yalnız xalqına xeyir vermişdir. İndinin özündə həmişə onun ağıllı nəsihətləri insanların əlindən tutur.
«Masallı ziyalıları» İctimai Birliyinin sədri, «Tərəqqi» medallı Qardaş Fətullayev, kəndin sakini, qəhrəman şəhidlər Anası Ziba Əsgərova, Masallı Rayon Tarix-Diyarşünaslıq Muzeyinin direktoru, Əməkdar Mədəniyyət işçisi, Azərbaycan Jurnalistlər Birliyinin üzvü Əntiqə Tağıyeva, Viləş kənd ATS-nin müdiri Qurbanəli Məmmədov, təqaüddə olan veteran müəllim Əlisa Qədiyev, Viləş ərazi dairəsi üzrə nümayəndə Alim Ələmov, veteranın yaxınları və başqaları Cənnət Teymurov haqqında xatirələrini dilə gətirdilər, həm də bildirdilər ki, ağsaqqal öz tövsiyələrini bizdən əsirgəmir, bütün işlər onun məsləhətləri ilə görürük.
Viləş kənd tam orta məktəbinin şagirdlərin veteranın şəninə söylədikləri şerlər tədbirə özgə bir ovqat gətirdi.
Yüz illiyi qeyd edilən yubilyarın öz çıxışı daha maraqla dinləndi. O, 1941-1945-ci illərdə Böyük Vətən müharibəsindəki xatirələrdən söhbət açdı, İkinci Qarabağ müharibəsində qazandığımız qələbəyə ürəkdən sevindiyini dedi və çıxışını aşağıdakı fikirlərlə tamamladı: “Bu gün mənim öz həyətimdə 100 illiyimi təbrik edirlər. Mən sizə bu diqqət və qayğıya görə minnətdarlığımı bildirirəm. Yaşamaq həmişə gözəldir, həyat yaşamağı sevir. Həyatda gərək elə yaşayasan, elə iz buraxasan ki, yüzə gəlib çata biləsən. Qoy bütün insanlar şərəflə yaşasınlar, yaratsınlar. Qəhrəman, Müzəffər Azərbaycanın gələcəyi üçün əlindən gələni eləsinlər»
Zəfər ORUCOĞLU
Azərbaycan Jurnalistlər Birliyinin üzvü
