Müştərilər “Baku Electronics” servisinin bərbad gündə olduğunu iddia edir - şirkətdən normal cavab mümkünsüzdür...

Rəsul Cahangirli: “Müştərilərə göstərilən servis səviyyəsinin keyfiyyəti əhəmiyyətli dərəcədə aşağı düşüb”

img

Son vaxtlar “Baku Electronics” mağazalar şəbəkəsindən şikayətlər artıb. Problem ondadır ki, “Baku Electronics” mağazalar şəbəkəsi məsuliyyətsiz və yararsız xidmət göstərdiyi üçün müştəri tərəfindən şikayət obyektinə çevrilib. Alınan məhsulun çatdırılması ilə yanaşı quraşdırılmasından, servis xidmətindən və digər məsələlərlə bağlı sözügedən mağazalar şəbəkəsindən şikayət edənlər var.

Məsələn, mağazadan deyirlər alınan məhsul 1-ci gün çatdırılacaq. Ancaq bazar günü zəng edib deyirlər ki, bu gün olacaq. Malınız ambardan götürülüb maşındadır. Deyirsən yaxşı, gətir, saat neçə üçün olacaq çatdırılma? Deyirlər bilmirik sürücü sizə zəng edəcək.

“Baku Electronics” mağazalar şəbəkəsində məişət avadanlıqlarını satanda həm məhsulu, həm də xidmətlərini tərifləyirlər. Müştərini əmin edirlər ki, operativ xidmət göstəririk, gün ərzində məhsulda problem yaranarsa və təmirə ehtiyac yaranarsa, o zaman müştəriyə ayrı məhsul təqdim olunur. Deyirlər ki, istənilən şikayətə dərhal cavab verilir və yaranan problem aradan qaldırılır. Ancaq bütün bu vədlərə rəğmən, reallıqda müştərilər bunu görmür. Bəzən soyuducu, kondisioner xarab olur və onun təmiri 10 gün çəkir. Operativ formada yaranan problem aradan qaldırılmır. Müştəri məhsulun təmir olunması ilə bağlı “Baku Electronics”in servis mərkəzinə müraciət edir, amma müraciət qeydə alınsa da xeyri olmur. Növbəti dəfə müraciət edəndə təzədən problem barədə soruşurlar. Deyəndə ki, axı bu barədə şikayət olunub, necə olur sistemdə bu öz əksini tapmır? Düz-əməlli buna aydınlıq gətirən olmur. Beləcə müştəriləri süründürürlər.

Məsələ ilə əlaqədar “Baku Electronics”in 012991 saylı əlaqə nömrəsinə müraciət etdik. Operator şikayətlə tanış olandan sonra cavabdeh şəxslə telefon əlaqəsini təmin etməyə çalışdı. Bu baş tutmadı. Sonra dedilər ki, gün ərzində məsələyə aydınlıq gətirmək üçün əlaqə saxlanılacaq. Ancaq verdikləri sözə əməl etmədilər.

  • “Bütün bunlar onu göstərir ki, “Baku Electronics” mağazalar şəbəkəsi müştəriləri istismar edir”

Məsələyə münasibət bildirən ekspert Rəsul Cahangirlinin fikrincə, əvvəlki illərdə “Baku Electronics” mağazalar şəbəkəsinin müştərilərə xidmət səviyyəsi yaxşı idi: “Şəxsən özüm oradan məişət avadanlığı aldığım üçün bunun şahidi olmuşam. Ancaq zamanla “Baku Electronics” mağazalar şəbəkəsinin satışları artdıqca, müştərilərə göstərilən xidmət arxa plana keçməyə başladı. Mağaza ancaq daha çox məhsul satmaq üzərində kökləndi. Müştərilərə göstərilən servis səviyyəsinin keyfiyyəti əhəmiyyətli dərəcədə aşağı düşüb. Təxminən 10 il əvvəl “Baku Electronics”dən məişət avadanlığı alanda nadir hallarda alınan məhsul problemli olurdusa, son illər bütün bunlar əksinədir. Müştərilərin bir çoxu avadanlıqların keyfiyyətindən, göstərilən xidmətdən narazıdır. Dəfələrlə sosial şəbəkələrdə, digər internet resurslarında bununla bağlı şikayətlərə rast gəlmək mümkündür. Bütün bunlar onu göstərir ki, “Baku Electronics” mağazalar şəbəkəsi müştəriləri istismar edir. Çıxış yolu ona qalıb ki, vətəndaşlar kütləvi şəkildə bu şəbəkənin satdığı məhsulları almaqdan imtina etsinlər. Bəlkə o zaman onlar bundan nəticə çıxarar”.

Vidadi ORDAHALLI

Peşə etikası

Son xəbərlər