Yevlax şəhər Sahib Əliyev adına 1 nömrəli məktəbin riyaziyyat müəllimi Nailə Babayevanın şagirdlərinə dərs zamanı İmam Zamana həsr olunan “Salam Fərmandeh” (Salam komandir) mahnısını ifa etdirməsi məsələsi yenidən aktuallaşıb.
Qeyd edək ki, bununla bağlı yayılan videogörüntülərdə müəllimin hicablı olması, dini görüşlərini şagirdlər arasında təbliğ etməsi və ən əsası, masasında Azərbaycan bayrağının tərsinə qoyularaq islamçılığın qabardılması diqqət çəkib.
Yayılan görüntülərdən sonra Yevlax Təhsil Şöbəsi müəllimlə söhbət aparıb və qadın pedaqoqun izahatı alınıb. Amma Nailə Babayeva ilə bağlı hər hansı cəza tədbiri görülməyib. Nailə Babayeva növbəti dəfə “Facebook” hesabında din pərdəsi altında dövlətçiliyə xələl gətirən təhlükəli paylaşımı ilə gündəmə gəlib. O, “Azərbaycanda şiə qətliamı gözlənilir” adı altında çağırışlar edərək öz ideologiyasına uyğun kütləni əhatəsinə toplayıb.
Təhsil Nazirliyin mətbuat katibi Cəsarət Valehov açıqlamasında faktın araşdırıldığını və yaxın vaxtda açıqlama verəcəklərini bildirib.
Xatırladaq ki, hadisə Yexlax şəhər Sahib Əliyev adına 1 saylı məktəbin riyaziyyat müəllimi Babayeva Nailə Ağaməmməd qızının dərs dediyi 6a sinifində qeydə alınıb. Nailə Babayeva izahatında bildirib ki, bu addımı dini təbliğ etmək üçün yox, şagirdlərə təhsildən əlavə maraqlı məlumatlar öyrətmək məqsədilə atıb.
Son vaxtlar orta məktəblərdə məhz müəllimlər tərəfindən dini təbliğatın aparıldığına dair faktlara rast gəlinir. Belə halların qarşısının alınması üçün hansı tədbirlər görülməlidir?
Təhsil mütəxəssisi Elşən Qafarov “Bakı-Xəbər”ə açıqlamasında bildirdi ki, təhsil müəssilərində 152 min müəllim çalışır: “Bu kiçik rəqəm deyil. Bunların sırasından hansısa təhsil işçisinin bir neqativ hərəkətə yol verməsi ümumi təhsilə şamil edilə bilməz. Düzdür, Azərbaycanda dini seçim, əqidə və söz azadlığı var. Ancaq bu heç də o anlama gəlmir ki, bundan kimsə sui-istifadə edə bilər. Azərbaycan mahiyyət etibarı ilə dünyəvi dövlətdir. Bizim təhsilimiz də dünyəvidir. Belə hallara yol verən müəllimlər vəzifələrindən sui-istifadə etmiş olurlar. Bununla bağlı da qanunvericilikdə cəzalar nəzərdə tutulur. Hesab edirəm ki, belə hallarla bağlı əlaqədar qurumlar sərt tədbir görməlidir. Ancaq bu faktları əldə tutub deyə bilmərik ki, belə hallar təhsilimizdə kütləvi hal alıb. Müəllimin özü maarifləndirməni aparan insandır. Onlar öz addımlarının məsuliyətini gözəl anlamalıdırlar. 152 min müəllimin içərisində məqsədli salınan insanlar da ola bilər. Ölkəmizin təhlükəsizlik və idarəetmə orqanları belə halları mütləq nəzarətdə saxlamalıdır. Müəllimlərin etik qaydalarını müəyyən edən sənədlər qəbul edilib. Həmin etik davarnış qaydalarının 4-cü maddəsinin birinci hissəsində göstərilir ki, müəllim öz vəzifə səlahiyyətindən sui-istifadə etməməlidir. Belə hallar olarsa, onunla bağlı hüquqi ölçü götürülməlidir. Təbiidir ki. belə addımlar ictimai müzakirələrə və ciddi qınaqlara səbəb olur. Heç bir halda imkan vermək olmaz ki, müəllim dərs dediyi şagirdi öz istəklərinə qurban etsin. Təhsilin vəzifəsi vətənpərvər şagird yetişdirməkdir. Bu halların geniş yayılmaması üçün məktəblərdəki dərs proseslərinə nəzarət də güclənməlidir”.
Məhəmmədəli QƏRİBLİ
