Hacı Şahinin qurbanlıq açıqlaması ictimai narahatlıq doğurub...

Tural İrfan: “İslam dininə görə, kimin maddi imkanı çatırsa o şəxs qurban kəsə bilər”

img

İslam dünyasının ən müqəddəs bayramlarından sayılan Qurban bayramı bütün müsəlman ölkələrində təmtəraqla qeyd olunur.

Azərbaycan müstəqillik əldə etdikdən sonra Milli Məclisin qəbul etdiyi 1992-ci il 27 oktyabr tarixli “Azərbaycan Respublikasının bayramları haqqında” Qanuna əsasən, Qurban bayramı ölkəmizdə də dövlət səviyyəsində bayram edilir. Qurban bayramına çox qısa zaman qalır. Qurban bayramında kəsiləcək qurbanlıq heyvanla bağlı müxtəlif fikirlər səslənir.

  • “Əsas məqsəd qurban ətinin sosial vəziyyəti aşağı olan insanlara paylanmasıdı”

Din xadimi Hacı Şahin Həsənli media nümayəndələrinə açıqlamasında qeyd edib ki, Qurban kəsmək yalnız Həcc ziyarətində olanlar üçün vacibdir. Yəni həcc ziyarətində olmayan şəxslərə qurban kəsmək vacib deyil. Bu fikir ictimaiyyət arasında narazılığa səbəb olub. Maraqlıdır, ziyarətə gedə bilməyənlər qurban kəsə bilməz?

Tanınmış ilahiyyatçı Tural İrfan “Bakı-Xəbər”ə bildirdi ki, qurban kəsmək vacib hesab olunan əməllərdən biridir: “Ümumiyyətlə, Qurbanlıq, Orucluq aylarında hərə bir fikir söyləyir. İslam dininə görə, kimin maddi imkanı çatırsa o şəxs qurban kəsə bilər. Həmin şəxs həcc ziyarətində olmayıbsa, maddi imkanı çatırsa qurban kəsə bilər”.

Həmsöhbətimiz onu da əlavə etdi ki, Qurban bayramı və qurbanlıq ibadətin bir növüdür. Əsas məqsəd qurban ətinin sosial vəziyyəti aşağı olan insanlara paylanılmasıdır. Bu bayramda istənilən dindən olan yetimin, kimsəsizin və yoxsulun haqqı var ki, varlının imkanlarından bəhrələnsin, adi günlərdə yeyə bilmədiyi qurbanlıq ətindən dadsın: “Qurbanlıq o deməkdir ki, insanlar Allahın xoşuna gələcək bir əməli icra edirlər. Üç səmavi dinin - yəhudilik, xristianlıq və İslamın hər üçündə müxtəlif formada qurbanlıq mövcuddur. Qurban bayramında qoyun, keçi, inək, camış, dəvə kimi heyvanlardan qurban kəsilir. Bu heyvanlar ən azından 1 yaşını tamamlamış və sağlam olmalıdır”.

Günel CƏLİLOVA

Peşə etikası

Son xəbərlər