Son zamanlar siqaret çəkənlər bəzi növ siqaretləri tapa bilməməkdən şikayətlənirlər. Qeyd edilir ki, əsasən iri ticarət mərkəzləri və böyük marketlərdə brend növ siqaretlər tapılmır. Əsasən brend növ siqaretlərdən, məsələn, "Caster Winston”, "Caster Sobranie” kimi siqaretlərin tapılmasında problemlər var.
Məlumat üçün bildirək ki, həmin siqaretlər Ukrayna üzərindən gətirilir. Məlumdur ki, Rusiya ilə Ukrayna arasında müharibə davam etdiyi üçün həmin ölkədən qeyd edilən siqaretlərin gətirilməsi çətinləşib və ya daha uzaq ölkələrdən gətirilir.
Qeyd etdiyimiz kimi, son günlər bahalı siqaretlər dükanlarda tapılmır. Ancaq həmin siqaretlər köşklərdə daha baha qiymətlərə satılır.
Ekspertlər dükanlarda siqaretin tapılmamasını qeyd edilən məhsulun satış qiymətinin artacağı ilə əlaqələndirir.
Xatırladaq ki, bu ilin ilk 4 ayında Azərbaycan xaricdən 12,1 milyon ABŞ dolları dəyərində 828 ton çəkməli tütün (emal olunmuş tərkibində tütün əvəzediciləri olan və ya olmayan) alıb. Bu, ötən ilin eyni dövrü ilə müqayisədə 2,1 dəfə azdır. İdxal mallarının 83 %-i Ukraynadan gətirilib.
Bu il mart ayının 28-də Nazirlər Kabineti "Xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri"ndə dəyişiklik edib. Qərara əsasən, istehsal məqsədli çəkməli tütün gələn ilin sonuna qədər spesifik idxal rüsumlarının tətbiqindən azad edilib. Qərar daxili bazarda yerli istehsalda istifadə olunan tütünün mümkün çatışmazlığının, habelə qiymət artımının qarşısının alınması və yerli tütün emalı sənayesinin aralıq məhsullarla təminatının mövcud səviyyəsinin qorunub saxlanılması məqsədilə hazırlanıb.
“Hazırda Ukraynanın özündə belə tütün məmulatlarının istehsalında çətinliklər yaranıb, oradakı zavod və fabriklər normal işləyə bilmir”
Siqaret qıtlığı və qiymətlərinin bəzi yerlərdə nə səbəbdən baha olması barədə fikir bildirən millət vəkili Rüfət Quliyev qeyd etdi ki, bahalaşmaya səbəb Rusiya və Ukrayna arasında gedən müharibə ilə bağlıdır: “Siqaretin istehsalı üçün 27 komponent lazımdır. Bunların bir çoxu Ukraynadan, bir qismi isə Rusiyadan gətirilir. Təbii ki, müharibə böyük problemlər yaradır. Hazırda Ukraynanın özündə belə tütün məmulatlarının istehsalında çətinliklər yaranıb. Oradakı zavod və fabriklər normal işləyə bilmir".
Günel CƏLİLOVA
