“Araz” market kolbasanı 12 manatdan guya 7.79-a endurub, halbuki, “Bravo” çoxdan bu qiymətə satır

Firdovsi Şahbazov: “Həmin marketdə saxta endirim kampaniyasının keçirilməsi ölkədə rəqabət mühitinin olmaması ilə bağlıdır”

img

Böyük supermarketlərin əksəriyyəti ara-sıra saxta endirim kampaniyası keçirir. Müştəriləri cəlb etmək üçün müxtəlif fırıldaqlar işlədirlər. Müştərilər də buna aldanaraq saxta endirimli dükanlara üz tuturlar.

Məsələn, görürlər ki, məhsulun istifadə müddəti bitib və yaxud da bitmək üzrədir, qiyməti aşağı salırlar. Yaxud da əvvəlcə qiymətləri xeyli qaldırırlar, sonra qiyməti aşağı salaraq “endirim “ görüntüsünü yaradırlar. Bundan başqa, daha çox alıcı cəlb etmək məqsədilə təsərrüfat subyektləri bəzi hallarda, xüsusən də bayram günlərində və mövsümün dəyişməsi ilə əlaqədar malların qiymətlərində endirimlər tətbiq edirlər. Bu endirimlərin istehlakçılara çatdırılması məqsədilə mağazaların pəncərələrində, vitrinlərində və fasadlarında yayımlanan reklamlardan istifadə olunur.

Bu arada “Araz” Supermarketlər şəbəkəsinin saxta endirim kampaniyası ilə məşğul olduğu üzə çıxıb. Bununla bağlı sosial media istifadəçiləri paylaşım ediblər: “Araz” Supermarketlərində 12 manat qiyməti olan kolbasa guya 7.79-a endirimə düşüb. Halbuki, həmin kolbasanın qiyməti hər zaman 7.79 olub”.

Qiyməti digər marketlərlə müqayisə edən xanım həmin kolbasanın “Bravo”-da endirimsiz 7.79 olduğunu çəkərək paylaşıb.

Qeyd edək ki, son günlər sosial mediada qiymət artımı, bahalaşma ilə bağlı tez-tez paylaşımlar edilir. Belə görünür ki, qiymətlərin bahalaşması səbəbindən müştərilərin azalmasını görən supermarketlər bu kimi fırıldaq üsullara əl atırlar. Ancaq bəzi hallarda “endirim kampaniyası” o qədər naşı formada təqdim olunur ki, o dəqiqə fırıldağın üstü açılır.

  • “Bu dəfə kolbasa endirimi ilə camaatı aldadırlar, növbəti dəfə digər məhsulu satışa çıxararkən bunu edəcəklər”

Məsələ ilə bağlı “Araz” Supermarketlər şəbəkəsinin mövqeyini öyrənmək istəsək də, bu mümkün olmadı.

Sözügedən məsələni qəzetimizə şərh edən iqtisad üzrə fəlsəfə doktoru Firdovsi Şahbazov belə vəziyyətin yaranma səbəbini müxtəlif amillərlə izah etdi: “Araz” Supermarketində saxta endirim kampaniyasının keçirilməsi ölkədə rəqabət mühitinin olmaması ilə bağlıdır. Hara gedirsən orada “Araz” marketləri var. Çoxsaylı marketlər və onların arasında sağlam rəqabət olsa, o zaman belə saxtakarlıqlar etməyə cəsarət etməzlər. Bu olmadığı üçün böyük supermarketlər istədikləri kimi istehlakçıların hüquqlarını pozurlar. Saxta endirimlər keçirməklə müştərilərin cibinə girirlər. Digər tərəfdən, böyük market şəbəkələri himayə olunduqları üçün bir növ qanunların fövqündə dayanırlar. Əmindilər ki, saxta endirim kampaniyasına ciddi məbləğdə cərimə olunmayacaqlar. Fikrimcə, “Araz” Supermarketlər şəbəkəsində yaşananlar həm də bundan qaynaqlanır. Bu dəfə kolbasa endirimi ilə camaatı aldadırlar, növbəti dəfə digər məhsulu satışa çıxararkən bunu edəcəklər. Ona görə də belə saxtakarlıqların qarşısını almaq üçün köklü tədbirlər görmək lazımdır. Birinci növbədə rəqabət mühiti olmalıdır. Monopoliya aradan qaldırılmalıdır. Sağlam rəqabət şəraiti olsa, seçim imkanı geniş olacaq. Başqa bir tərəfdən, istehlakçılar haqda qanunvericiliyi təkmilləşdirmək lazımdır. Yəni belə hallar baş verdikdə həmən cəza mexanizmləri işə düşə bilsin”.

Bir sözlə, ekspert hesab edir ki, kompleks addımlar atılsa, saxta endirim halları azalacaq.

Vidadi ORDAHALLI

Peşə etikası

Son xəbərlər