“Mən öz gələcəyimi seçirəm” adlı seminar keçirildi

img

Lənkəran Dövlət Universitetinin nəzdində Sosial və Aqrar-Texnoloji Kollecdə növbəti “Mən öz gələcəyimi seçirəm” adlı seminar keçirildi. Tədbirdə Kollecin müəllim və tələbələri iştirak edirdilər. Öncə İştirakçılara mövzunu əhatə edən bukletlər paylanıldı. Sonra Kollecin direktoru, dosent Ruslan Həmidovun çıxışı oldu: - Narkotik vasitələrin insan sağlamlığına və həyatına vurduğu ziyan, cəmiyyətdə “ağ ölüm” kimi tanınan narkomaniya bəlası insan həyatında sağalmaz fəsadlara səbəb olur. Azərbaycan “Narkotik vasitələrin və psixotrop maddələrin qanunsuz dövriyyəsinə qarşı mübarizə haqqında” Beynəlxalq Vyana Konvensiyasına 1992-ci ildə qoşulsa da, narkotizmlə və narkobizneslə mübarizənin əsası ölkə tarixində ilk dəfə  Ulu Öndər Heydər Əliyev tərəfindən qoyulub. Dünyanın başı üzərində dolaşan bu dəhşətli ölüm kabusuna qarşı mübarizəni ümumdövlət vəzifəsi hesab edən müdrik şəxsiyyət Heydər Əliyevin 1996-cı il 26 avqust tarixli “Narkomanlığa və narkotik vasitələrin qanunsuz dövriyyəsinə qarşı mübarizə tədbirləri haqqında” Fərmanından sonra bu problemin həlli üçün həyata keçirilən tədbirlər kompleksi keyfiyyətcə yeni mərhələyə qədəm qoymuşdur. İnsanları, xüsusilə gəncləri sağalmaz xəstəliklərə düçar edib, onların ömrünü qaraldan bu bəladan qurtulmaq məqsədilə respublikamızın müxtəlif bölgələrində maarifləndirmə layihələr həyata keçirilir. Belə tədbirlərin görülməsi artıq ölkəmizdə ənənəyə çevrilib. Narkomaniya ilə mübarizə sağlam cəmiyyətin formalaşması baxımından əsas məqsəd daşıyır. Azərbaycanın dövlət siyasətində başlıca vəzifə olan, sağlam nəslin formalaşması istiqamətində həyata keçirilən tədbirlər sırasında mühüm istiqamət kimi diqqət yetirilən narkomaniya qarşı mübarizə kampaniya xarakterli deyil, davamlı siyasətdir.

“Narkomaniyaya qarşı mübarizəni gücləndirməklə gələcəyimizi, sağlamlığımızı qoruyur, dövlətçiliyimizi daha da möhkəmləndirmiş oluruq. Azərbaycanın gələcəyi kimi dəyərləndirilən gənclərin sağlamlığının təminatı daim diqqətdə saxlanılan məsələdir. Ölkəmizin davamlı inkişafı hər bir problemin uğurlu həllinə, qarşıya qoyulan məqsədə yüksək səviyyədə nail olmağa stimul verir”. Bu fikirləri isə Kollecin psixoloqu Zülfiyyə Əliyeva öz çıxışında söylədi.

Kollecin II kurs tələbəsi, Tələbə Gənclər Təşkilatının sədri Rəhimə Rzazadənin çıxışı da tədbir iştirakçıları tərəfindən maraqla dinlənildi: - Bəşəriyyətin bəlası olan, irqindən, yaşından, dinindən asılı olmayaraq bütün xalqları, millətləri düşündürən ən ağrılı problemlərdən biri də narkomaniyadır. Bu problemin həllinə xidmət edən mühüm addımlardan biri kimi  yeniyetmə və gənclər arasında vaxtaşırı maarifləndirmə işlərinin təşkili olduqca vacibdir. Narkotik maddələrin gənclər və yeniyetmələr arasında daha çox yayılma təhlükəsini nəzərə alaraq, bir çox ölkələrdə “Narkotiksiz gələcək naminə” milli proqramların qəbulu da sağlam gələcəyimiz üçün məsuliyyət hissindən yaranan vətəndaş borcudur. Bu proqramlara təhsil, səhiyyə ocaqlarında, hüquq mühafizə orqanlarında, digər təşkilatlarda narkomaniyanın ziyanı barədə maarifləndirilmə kampaniyaları daxildir. Keçirilən tədbirlərin kütləvi informasiya vasitələrində işıqlandırılması, internet şəbəkəsində yerləşdirilməsi mütləqdir.

“Narkomaniyaya YOX deyək” adlı maarifləndirici video-çarxın nümayiş ilə tədbir  tamamlandı.

Zəfər ORUCOĞLU

Azərbaycan Jurnalistlər Birliyinin üzvü

Peşə etikası

Son xəbərlər