İyulun 9-10-da qeyd olunacaq Qurban bayramı günlərində qurbanlıq heyvan kəsimi və satışının müvafiq norma və qaydalara uyğun, təhlükəsiz və sağlam şəraitdə həyata keçirilməsi məqsədilə ölkə üzrə 134 ünvanda qurbanlıq heyvanların satışı və kəsimi xidmətləri təşkil ediləcək. Qurban bayramı günlərində respublika üzrə 134 ünvanda fəaliyyət göstərəcək qurbanlıq heyvanların satışı və kəsimi yerlərindən 61-də həm kəsim, həm satış, 54-də qurbanlıq heyvanların satışı, 19-də isə yalnız heyvan kəsimi xidmətləri vətəndaşlara təklif olunacaq.
Məlumdur ki, Qurban bayramı günlərində ət kəsimi yerlərində qurbanlıq heyvanların kəsilməsi ilə bağlı problemlər yaşanırdı.
Maraqlıdır, Qurban bayramında müəyyən olunmuş yerlərdə düzgün şəkildə ət kəsiminə necə riayət olunacaq? Bu sahədə yaşanan problemlər necə həll olunacaq?
AQTA: “Satış məntəqələrində baytarlıq nəzarətindən keçmiş və sanitar-gigiyenik tələblər gözlənilməklə kəsilmiş qurbanlıq heyvanlar sifarişçilərə təqdim olunacaq”
Azərbaycan Qida Təhlükəsizliyi Agentliyindən (AQTA) bildirildi ki, Qurban bayramı günlərində qurbanlıq heyvan kəsimi və satışının müvafiq norma və qaydalara uyğun, təhlükəsiz və sağlam şəraitdə həyata keçirilməsi məqsədilə ölkə üzrə 134 ünvanda qurbanlıq heyvanların satışı və kəsimi xidmətləri təşkil ediləcək: “Həmin satış məntəqələrində baytarlıq nəzarətindən keçmiş və sanitar-gigiyenik tələblər gözlənilməklə kəsilmiş qurbanlıq heyvanlar sifarişçilərə təqdim olunacaq. Bununla yanaşı, bir sıra regionlarda Azərbaycan Respublikasının Qida Təhlükəsizliyi Agentliyi ilə razılaşdırılmaqla, səyyar heyvan kəsimi çadırları quraşdırılaraq qurbanlıq heyvanların baytarlıq nəzarəti altında kəsimi və satışı həyata keçiriləcək”.
Eyyub Hüseynov: “Son üç ildir ki, Qurban bayramı günlərində hərcmərclik olur”
Azad İstehlakçılar Birliyinin (AİB) sədri Eyyub Hüseynov qeyd etdi ki, son üç ildir Qurban bayramı günlərində hərcmərclik olur: “Məsələn, Binəqədi rayonunun Gənclik şəhərciyində heyvanlar ayrı satılır, həmin ərazidə böyük növbə olur. Belə olan halda o yerdə antisanitariya qeyd alınır. Bu hal həm ət kəsimi, həm də dini qaydalara görə düzgün deyil”.
Ekspertin sözlərinə görə, qurbanlıq heyvanların kəsilməsi ilə bağlı çatışmazlıqlar var: “AQTA hələ ki, bu işi tam şəkildə icra edə bilmir. Yaxşı olar ki, əhalinin özü bu işdə maraqlı olsun”.
Həmsöhbətimiz hesab edir ki, qurban ətlərinin marketlər vasitəsilə satılması daha düzgün olar: “Orda kəsilən heyvanlar daha təmiz olur və istifadəçiyə səliqəli şəkildə verilir”.
Günel CƏLİLOVA
