Azərbaycanda məcburi köçkünlərin təhsil xərcləri dövlət büdcəsi hesabına ödənilməli olduğu halda, Sumqayıt Dövlət Universiteti (SDU) məcburi köçkündən 5400 manat təhsil haqqını ödəməyi tələb edir. Bu barədə təhsil müəssisəsinin tələbəsi Nəzrin Nəbizadə sosial şəbəkədə məlumat paylaşıb.
Qeyd edək ki, Azərbaycan Prezidentinin 14 sentyabr 2011-ci il Sərəncamına əsasən, 2011/2012-ci tədris ilindən etibarən məcburi köçkünlərin təhsil xərcləri dövlət büdcəsinin vəsaiti hesabına ödənilir. 1988-1992-ci illərdə anadan olan qaçqınlar da dövlət ali və orta ixtisas təhsili müəssisələrində təhsil haqqını ödəməkdən azaddırlar.
Məlumat üçün bildirək ki. Nəzrin Nəbizadə Sumqayıt Dövlət Universitetinin 5-ci kurs tələbəsidir. Universitetin kimya-biologiya ixtisasında təhsil alan tələbə Kəlbəcərdən məcburi köçkündür.
Tələbə qeyd edir ki, 2019-cu ildə 1 saylı İnzibati-İqtisadi Məhkəməsinin qərarı ilə o məcburi köçkün kimi tanınıb. Amma təhsil müəssisəsi həmin qərarı qəbul etmir: “2017-ci ildə universitetə qəbul oldum. 2 il məcburi köçkün statusu olmadığı üçün təhsil haqqını ödədik. İndi deyirlər ki, 5400 manat pul ödəməlisiniz. 2019-cu ildə 1 saylı İnzibati-İqtisadi Məhkəməsi qərar verdi ki, məcburi köçkün kimi tanınım. Təhsil haqqını ödəmədiyinə görə kəsirlər də yaranıb. Bəzi imtahanlara buraxmayıblar. Mən məhkəmənin qərarını onlara vermişəm. Həmçinin, rektorun qəbulunda da olmuşam. Bizi arxayın etdilər ki, yaxşı olacaq. Təhsil Nazirliyindən isə dedilər ki, sizin iki il üçün ödədiyiniz pul da geri qaytarılmalıdı. Rektor deyir ki, get yenidən məhkəməyə müraciət et, ya da həmin pulu ödə. Ödəsən tələbənin kəsirləri də düzələcək. Kəsirlərə də 3000-5000 manat arası pul tələb edirlər.
Sumqayıt Dövlət Universiteti: “Tələbə ərizə yazıb rəsmi şəkildə müraciət etməlidir ki, problemə baxılsın”
Məsələ ilə bağlı Sumqayıt Dövlət Universitenin mətbuat xidmətindən bildirildi ki, tələbə ərizə yazıb rəsmi şəkildə müraciət etməlidir ki, problemə baxılsın: "Tələbə sonradan məcburi köçkün statusu alıb. Rektorun qəbulunda da olub. Hüquqşünasa da deyilib ki, getsin müraciət eləsin və ərizə yazılsın. Tələbə universitetə yaxınlaşsın yerində araşdırıb tələbənin problemini həll etməyə çalışacıyıq. Kəsirlər isə tələbənin öz problemidir. O pul ödəyərək imtahanları verməlidir”.
Kamran Əsədov: “Tələbə əgər məcburi köçkün statusu alıbsa ödənişi dövlət edir, universitetin təhsil haqqı tələbi əsassızdır”
Təhsil eksperti Kamran Əsədovun sözlərinə görə, tələbə məcburi köçkün statusu alıbsa ödənişi dövlət edir, universitetin təhsil haqqı tələbi əsassızdır: "Azərbaycan Respublikası Prezidenti İlham Əliyevin bununla bağlı sərəncamı var. Dövlət ali təhsil müəssisələrində əyani təhsil alan məcburi köçkünlərin təhsil haqqları dövlət büdcəsinin vəsaiti hesabına ödənilir və universitetin belə bir tələbi əsassızdır. Kəsir pulunun isə buna aidiyəti yoxdur. Əgər tələbənin kəsiri yaranıbsa, o, kəsir pulunu ödəyib yenidən imtahan verməlidir”.
Günel CƏLİLOVA
