Hər il olduğu kimi, bu il də Qurban bayramı yaxınlaşdıqca bazarlarda ərzağın qiymətində qalxma müşahidə edilir. Ekspertlərin qənaətincə, hər keçən ilə nisbətən qurban kəsənlərin sayı azalır. Buna səbəb isə qurbanlıq heyvanların ildən-ilə baha satılmasıdır. Bildirək ki, qurban məqsədilə qoyun, qoç, inək, dana və ya dəvə kəsilir.
Ənənəyə görə, imkansızlar bayram günü ac qalmamalı və onlar bayram süfrələrinə dəvət olunmalıdır. Ancaq Azərbaycanda qurbanlıq ətinin baha olması qurban kəsmək istəyənlər tərəfindən narahatlıqla qarşılanır. Çünki qazancı o qədər də çox olmayan insanların baha qiymətə qurbanlıq qoyun alıb kəsmək imkanı yoxdur.
Hazırda ətin kiloqramı 14-15 manat arasında dəyişir. Qəssabların verdiyi məlumata görə, ötən il diri çəkildə heyvanın kiloqramı 12-13 manata satılırdısa, bu il qiymət azı 14 manatdan başlayacaq. Bahalaşmaya səbəb heyvan yeminin və dərmanının qiymətlərindəki artımdır. Beləliklə, qurbanlıq qoyunların qiymətləri ötənilki 200-250 manatdan 250-300 manata yüksələcək.
Məlumat üçün qeyd edək ki, 2022-ci ilin yanvar-mayında Azərbaycana 26 716,9 min dollar dəyərində 15 340,04 ton ət idxal edilib. Dövlət Gömrük Komitəsinin hesablamalara görə, bu, bir il öncəki göstəricidən müvafiq olaraq dəyər ifadəsində 3,5%, həcm göstəricisi üzrə isə 4,5% çoxdur.
“Qurban bayramı ilə bağlı satışa çıxarılacaq heyvanların qiymətinin bayram ərəfəsində bahalaşacağı gözlənilir”
İqtisadçı Asif Məmmədov bildirdi ki, qurban bayramı ilə bağlı satışa çıxarılacaq heyvanların qiymətinin bayram ərəfəsində bahalaşacağı gözlənilir: "Qurban ətinə tələbatın artacağını nəzərə alsaq, dövri bahalaşma yaşanacaq. Məhsulun ərsəyə gəlməsinə çəkilən xərclər, lisenziyaya icazə, daşınma, vergi xərcləri, əmək haqqı və digər xərclər toplanıb, qiymət müəyyən olunur. Xərclərin artırılması nəticəsində bahalaşma özünü göstərir. Bəziləri bunu süni bahalaşma kimi qəbul edir. Ancaq bu süni bahalaşma deyil. Bildiyiniz kimi, tələb təklifi üstələyir. Eyni zamanda Azərbaycana Rusiyadan, Ukraynadan iribuynuzlu mal-qara gətirilirdi. Müharibə nəticəsində Rusiyaya sanksiya və məhdudiyətlər bu sahədə də çətinliklər yaratdı".
Günel CƏLİLOVA
