AMEA-nın Aspirantlar Yataqxanasında yaşayan əməkdaşlarının mənzil təminatı məsələsinin həlli üçün xüsusi komissiya yaradılacaq. Bunu AMEA-nın Rəyasət Heyətinin açıq iclasında qurumun prezident əvəzi akademik Arif Həşimov təklif edib.
A.Həşimovun təklifi müxtəlif fikirlərə yol açıb. Belə ki, Qurumun bəzi alimlərinin iddialarına görə, bir neçə il əvvəl AMEA-nın Aspirantlar Yataqxanasında yaşayan əməkdaşları üçün bina tikilib, sadəcə o binadakı mənzillər AMEA rəhbərliyində təmsil olunanların özləri və yaxınları arasında bölüşdürülüb.
Yaradılacaq komissiya alimlərin haqqı olan mənzillərin geri qaytarılmasında nə kimi rol oynaya bilər? Yataqxanada yaşayanlar illərdir ki, pozulmuş hüquqlarının bərpasını gözləyir, bu baxımdan, AMEA aspirantları üçün illər öncə tikilmiş mənzillərin bölgüsü yenidən aparıla bilər?
“Səmimi deyim ki, AMEA-nın indiki Rəyasət Heyətinin tərkibinin bu məsələdə doğru qərar verəcəyinə inanmıram”
Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər” qəzetinə bildirdi ki, AMEA-nın Aspirantlar Yataqxasında yaşayan alimlərin mənzil təminatı ilə bağlı xüsusi komissiyanın yaradılması məsələsi gündəmdədir: “Akademiyanın Rəyasət Heyətində bu məsələ müzakirə olunub. Mənim akademiya ilə bu və digər şəkildə bağlılığım yoxdur. Çox təəssüflər olsun ki, sözügedən iclasa məni dəvət etməyiblər. Amma bütün hallarda bu işdə zəhməti, əməyi olan, rol oynayan şəxs kimi hesab edirəm ki, məni həmin iclasa dəvət etsəydilər mən orada həm reallıqlarla bağlı fikirlərimi bildirəcəkdim, həm də indiyə qədər baş verən qüsurlar, qanunsuzluqlar barədə danışıb konkret faktları ortaya qoyacaqdım. Fikrimcə, mənim o iclasda iştirakım akademiyanın xeyrinə olan bir məsələ olardı. Onlar qərar qəbul edərkən ora ən azı ictimai müzakirənin nəticəsi olan məqamları daxil edərdilər. Təəssüflər olsun ki, mən orada iştirak etməmişəm. Bu kimi məsələlərdə AMEA ictimai müzakirələrə açıq olmalıdır və qərarlarında eyni zamanda ictimai müzakirələrdən doğan məqamlar əks olunmalıdır. Aspirantlar Yataqxanası ətrafında o qədər biabırçılıqlar, xoşagəlməzliklər, qüsurlar, qanunsuzluqlar, hətta cinayət faktları baş verib ki, onları araşdırmadan yenidən bir komissiya yaradıb bu yataqxana ilə bağlı qərar vermək yanlışlıqdır. Mənim Arif Həşimova çox böyük hörmətim var, onunla bir yerdə işləmişik, AMEA-nın ikinci şəxsi olub, onu peşəkar, ədalətli bir insan kimi tanıyıram. Amma təəssüf ki, onun ətrafında zamanında yataqxana məsələsi, yataqxana sakinlərinə tikilən binanın taleyi ilə bağlı yanlış qərarlarda əli olan, o yataqxananın ərazisində tikilən binaların mənzillərini “paylamaqda” “əməyi” olmuş insanlar var. İnanmıram ki, onlarla Arif Həşimov kimi təmiz bir insan hansısa uğurlar əldə edə bilsin. Ən azından düşünürəm ki, Azərbaycan elmi gəncliyini özündə birləşdirən ictimai birliyin rəhbəri olaraq komissiyanın işinin düzgün qurulmasına faydamı verə bilərdim. Qayıdıram yataqxana məsələsinə. Biz dəfələrlə sizinlə söhbətimizdə bu məsələ ilə bağlı mövqeyimi bildirmişəm. Yataqxana ərazisində bina tikilməsi təşəbbüsünü ilk dəfə olaraq 2007-ci ildə akademiyada mən irəli sürmüşəm. 2007-ci il cənab Prezident tərəfindən “Gənclər İli” elan ediləndə məhz həmin ərazidə gənc alimlər üçün yaşayış binası tikilməsi təşəbbüsü ilə çıxış etdim. Akademiyanın o zamankı rəhbəri çox unikal insan, gözəl elm təşkilatçısı Mahmud Kərimovla o vaxtkı Gənclər və idman naziri Azad Rəhimovla bərabər, üçümüzün imzası ilə cənab Prezidentə xidməti məktub hazırlayıb göndərmişik. O məktubu zamanında mən hazırlamışam. O məktubda xahiş etmişik ki, yataqxana ərazisində gənc alimlər üçün bina tikilsin. Həmçinin akademiyanın yataqxanasında yaşayan, bu qurumun əməkdaşları olan insanlar orada mənzillə təmin olunsunlar. Bu işi biz başladıq. Bu çox gözəl, humanist bir aksiya idi. Bu işdə nə qədər əziyyət çəkdiyimin bu gün də fərqindəyəm. Böyük əzab-əziyyətlə akademiyada evə ehtiyacı olanları müəyyənləşdirdim. Bu çox çətin prosesdir. Lakin 2013-cü ildə akademiyaya prezident seçilən təzadfi bir insanın səyi nəticəsində həmin o obyektiv siyahı gizlədildi. Bundan sonra biabırçılıqlar başladı. Aspirantlar Yataqxanasının sakinləri üçün tikilən binadakı mənzillər haqqı olanlara çatmadı, müdriklik yaşında olan akademiyanın o vaxtkı rəhbəri həmin binadan 4 mənzil qamarladı. Akademiyanın vitse-prezidenti olan insanların da bu işdə nöqsanları, qüsurları var. Onlar eyni zamanda bu işə səs verib, bu qərara şərik olublar. Orada akademiyanın işlər müdiri olmuş təsadüfi bir şəxsin hətta öz sevgilisinə belə oradan mənzil verməsi biabırçılıqdır. O insanlara dövlət vəzifə, məqam etibar etdi, onlar da bundan görün necə sui-istifadə edirlər. O zaman mətbuatda faktlar dərc olundu, o mənzillərin orderlərinə, müqavilələrinə qədər mətbuatda getdi. Akademiyanın o vaxtkı prezidenti Akif Əlizadə AMEA tarixində çox böyük biabırçılığa yol verdi”.
İ.Orucovda olan məlumatlara görə, fon yaratmaq üçün o binada hansısa gənc alimlərə mənzil verilib, halbuki, elə deyil. İ.Orucov deyir ki, ev verilənlərin bəzilərinin Bakıda bir deyil, bir neçə evi var. “Hətta eşitmişəm ki, orada ev verilən gənc alimlərdən rüşvət də alınıb. Təbii ki, bunlar iddilardır, faktlar deyil... Səmimi deyim ki, AMEA-nın indiki Rəyasət Heyətinin tərkibinin bu məsələdə doğru qərar verəcəyinə inanmıram. Nəyə görə inanmıram? Çünki bu adamlar vaxtilə bizim tikdirdiyimiz binlardakı mənzillərin satılması ilə bağlı qərara səs veriblər. İndi onlar orada təmsil olunur. Akademiyada uğursuzluğun kökündə bu insanlar durur... Bunlar üçün müqəddəs heç nə yoxdur. Mən bu gün də akademiyanın Rəyasət Heyətini ədalətsizlikdə suçlayıram. Əgər AMEA ədalətli olsaydı, zamanında paylanmış mənzillərin məsələsinə aydınlıq gətirərdi. Ramiz Mehdiyev akademiya prezidenti seçiləndə ümid edirdim ki, ələ keçirilən mənzillərin aqibəti ilə bağlı qərar verəcək, o bunu etmədi. Akademiyanın rəhbərliyi, Rəyasət Heyəti yeni rəhbərliyi formalaşdıqdan sonra (indiki tərkibdə yox-İ.O) bu məsələni qaldıracağam və tələb edəcəyəm. Çünki bu mənim haqqımdır. Tələb edəcəyəm ki, komissiya yaradılsın və o mənzillərin aqibəti araşdırılsın. Komissiyanın ədalətinə o zaman inanardım ki, o binaların aqibəti araşdırılardı və burada o maddə öz əksini tapardı. Təəssüf ki, o maddə öz əksini tapmayıb...” - deyə İ.Orucov qeyd etdi.
İradə SARIYEVA
