Sabunçuda EKO parka böyük xərclə ağaclar əkildi, baxılmadı və qurudu... Günahkar...

İlqar Hüseynli: “Monitorinq aparsaq buna görə nə qədər vəsait silindiyi üzə çıxar”

img

Respublikamızın müxtəlif yerlərində, o cümlədən də paytaxt Bakıda yaşıllaşdırma işinə dövlət səviyyəsində xüsusi diqqət yetirilir, tez-tez ağacəkmə kampaniyaları keçirilir. Bakının bir çox yaşayış massivlərində, ərazilərində ağaclar əkilir. Onu da vurğulayaq ki, son zamanlar şəhərimizdə EKO parkların salınması da ənənəyə çevrilib.

Böyük vəsait hesabına salınan bu EKO parklar əhalinin, xüsusən də uşaqların maraq göstərdiyi məkana çevrilib. Amma çox təəssüflər olsun ki, bəzi ərazilərdə, eləcə də Eko parklarda ağaclara baxılmır, vaxtı-vaxtında suvarılmadığı, qulluq görmədiyi üçün quruyurlar. Yayılan məlumatlara görə, Sabunçu rayonunda yerləşən EKO parkda əkilən ağaclar quruyub. Sakinlər bildiriblər ki, ağaclar əkiləndən sonra qulluq olunmayıb. Qeyd olunub ki, hazırda park bərbad vəziyyətdədir.

Sabunçu EKO parkı niyə baxımsız vəziyyətə düşüb? Yaşıllıqlara niyə baxmırlar?

Ekspertlər deyir ki, yerli bələdiyyə qurumu, eləcə də aidiyyəti təşkilatları əksər hallarda belə şeylər maraqlandırmır.

Sabunçuda EKO parka böyük xərclə ağaclar  əkilib, amma sakinlər deyir ki, o ağaclar baxılmaıdığı üçün quruyub. Bu məsələdə məsuliyyət kimin üzərinə düşür?

  • “EKO parkın da bu vəziyyətə düşməsində əsas səbəb bu amillərdir”

Sosial-iqtisadi sahə üzrə tanınmış ekspert İlqar Hüseynli “Bakı-Xəbər”ə şərhində təəssüflə qeyd etdi ki, Bakı ərazisində bu kimi hallarla tez-tez rastlaşmaq olar. “Bu hallar tez-tez baş verir. Müəyyən infrastruktur layihələri adı altında park salma əməliyyatı həyata keçirilir. Dövlətin xeyli vəsaiti hesabına həmin parklar qurulur. O ağacları, kolları olduqca baha qiymətlərə sənədləşdirib o parkları yaradırlar. Düşünmək lazımdır ki, bu parkı qurduqdan, yaratdıqdan sonra buna xidmət göstərilməsi əsas məsələdir. Parklara xidmət edən şəxslər normal əməkhaqqı ilə təmin olunmalıdır. Eyni zamanda hər bir parka xərclənən vəsaiti araşdırsaq görərik ki, buna görə dövlət büdcəsindən nə qədər vəsaitlər silinir. Monitorinq aparsaq buna görə nə qədər vəsait silindiyi üzə çıxar. Burada yaşıllığın saxlandılması xərcləri, gecə park işıqlandırılmalarına görə elektrik xərcləri, böyük miqdarda su sərfiyyatı məsələləri var. Digər kommunal-təsərrüfat xərclərini də üst-üstə gələndə rayon İcra Hakimiyyətləri həm də onu fikirləşməlidir ki, onların rayonları üçün nəzərdə tutulan büdcə bu parkların saxlanmasına yetərli olacaq, yoxsa yox. Bütün bu hesablamaları aparmadan bütün bu korrupsiya aparatı həmin infrastruktur layihələri adı ilə bu prosesə gedir. Nəticə etibarı ilə parklara qulluq təmin olunmur, o xərclərin ödənilməsi müşkülə çevrilir. Bir tərəfdən dövlətin külli miqdarda vəsaiti izafi məqsədə xərclənmiş olur, digər tərəfdən də təsərrüfatsızlıq və baxımsızlıq rayonların estetik görünüşünü korlayır. EKO parkın da bu vəziyyətə düşməsində əsas səbəb bu amillərdir” - deyə İ.Hüseynli bildirdi.

İradə SARIYEVA

Peşə etikası

Son xəbərlər