“Uşaq bağçaları ilə bağlı yeni qaydaların hazırlanmasının zamanı çatıb”. Bu sözləri Təhsil naziri Emin Əmrullayev media nümayəndələrinə açıqlamasında bildirib. O qeyd edib ki, Bağçalarla bağlı diaqnostik qiymətləndirmə aparılıb.
Onun sözlərinə görə, birinci mərhələdə əsas iş bağçalara uşaq qəbulunun qaydaya salınmasıdır: “İkinci işimiz ilk dəfə müəllimlərin, tərbiyəçilərin bağçalara işə qəbulunun vahid formatda aparılmasıdır”.
Qeyd edək ki, bugünə kimi bağçalarla bağlı çoxlu sayda yeni qaydalar tətbiq edilib. Bağçalar Bakı Şəhər İcra Hakimiyyətinə verildi, ardından məktəbəqədər təhsil müəssisələri həmin qurumdan alınaraq Təhsil Nazirliyinə verildi. Daha sonra bağçalara uşaqların qəbulunun elektron qaydada həyata keçilməsi ilə bağlı məlumat yayıldı. Ekspertlərin bildirdiyinə görə, bağçalarla bağlı tətbiq edilən və ya ediləcək yeni qaydalar narazılığa səbəb olur.
Məlumat üçün bildirək ki, 2022-ci ilin dövlət büdcəsindən təhsil sahəsinə 3 milyard 884 milyon 325 min 660 manat vəsait ayrılıb. Həmin xərclərin 376 milyon 858 min 452 manatı məktəbəqədər təhsilə ayırılması nəzərdə tutulub.
“2011-2021-ci illərdə uşaqların bağçalara qəbulu şəffaf olmayıb, bu, tərbiyəçilərin qəbuluna da aiddir”
Təhsil məsələlər üzrə ekspert Kamran Əsədov bildirdi ki, hazırda ölkədə 1693 dövlət uşaq bağçası var və orada 123 min uşaq tərbiyə alır: “2011-ci ildə ölkə prezidentinin sərəncamı ilə uşaq bağçaları icra hakimiyyətlərinə verildi və bundan gözləntilərimiz daha böyük idi. Amma 10 il ərzində orada hər hansı inkişaf görmədik. Bu 10 il ərzində uşaq bağçaları 20 il geri düşdü. 2021-ci ildə ölkə başçısı yenidən uşaq bağçalarını Təhsil Nazirliyinə qaytardı”.
Ekspertin sözlərinə görə, 2011-2021-ci illərdə uşaqların bağçalara qəbulu şəffaf olmayıb: “Bu, tərbiyəçilərin qəbuluna da aiddir. Qidalanma ilə bağlı ciddi problemlər vardı. Kim pul verirdisə onun uşağını bağçaya götürürdülər, işə qəbul prosesi müsabiqə yolu ilə keçirilmirdi, icra hakimiyyətləri kimi istəyirdilər işə qəbul edirdilər”.
Ekspert onu da əlavə etdi ki, artıq proses dəyişib: “Burada ilk olaraq tətbiq ediləcək qayda - uşaq bağçalarının yerləşdiyi mikroərazidə qeydiyyatda olan uşaqların qəbulu həyata keçiriləcək. Əvvəl Xətai rayonunda yaşayan uşağı Nəsimi rayonunda yerləşən bağçaya qəbul edirdilər. İndi bu mümkün olmayacaq. Hər kəs yaşadığı əraziyə yaxın bağçaya müraciət edə biləcək və kənar yerlərdə bağçada yer boş qalarsa, ora müraciət etmək hüququ qazanacaq. Bu, şəffaflıq üçün çox vacibdir.”
Ekspert hesab edir ki, uşaq bağçalarına işə yalnız ali təhsili və orta ixtisas təhsili olan şəxslər qəbul edilməlidir.
Günel CƏLİLOVA
