İmtahanda qayda pozan abituriyentlərlə DİM-in mübahisələri davam edir...

Elçin Əfəndi: “Qaydaları pozan abituriyentlərin ikinci imtahana buraxılmalarının tərəfdarıyam”

img

Məlumdur ki, builki qəbul imtahanlarının birinci mərhələsi artıq başa çatıb. II və III ixtisas qrupları üzrə keçirilən qəbul imtahanlarında iştirak edən 16 abituriyent qaydaları pozduğuna görə imtahandan xaric olunub və onların nəticələri ləğv edilib. I və IV ixtisas qrupları üzrə keçirilən qəbul imtahanlarında isə qaydaları pozan 9 abituriyentin nəticəsi ləğv edilib.

DİM-in Direktorlar Şurasının sədri Məleykə Abbaszadə media nümayəndələrinı açıqlamasında bildirib ki, qaydaları pozanlara qətiyyən ikinci şans verilməyəcək: “Bacarana baş qurban”, “mən aldatdım” deyənlər “qəhrəman”a çevrilir. Onlar təxminən 10-15 nəfərdir. Elə bir şərait yaradırlar ki, kimdəsə inam ölür. Onlara ikinci şans verilməsini istəyənlər nə üçün minlərlə uşağı deyil, yalnız qayda-qanunu pozanları fikirləşir? Bu addımı bilə­bilə atıblar və onların artıq bu il müsabiqədə iştirak etmək hüquqları yoxdur. Qaydalarda belə qeyd edilib”.

Qaydaları pozan abituriyentlərə ikinci şansın verilməməsi onları narazı salıb. Onlar qeyd edir ki, səhv edən hər kəsə həyatda ikinci şans verilməlidir.

  • “Abituriyentin zəhmətini yerə vurmaq, yaxud xəyallarını puça çevirmək doğru deyil”

Təhsil eksperti Elçin Əfəndinin sözlərinə görə, abituriyent imtahandan kənarlaşdırılıbsa, deməli özü ilə ya mobil telefon gətirib, ya da ağıllı saatdan istifadə edib. Bu, bir növ köçürmə hallarına yol vermək kimi qiymətləndirilir: “İmtahandan kənarlaşdırılan şəxsin imtahan nəticələri də DİM tərəfindən ləğv edilib. Yəni onun ali məktəbə qəbul olmaq üçün ancaq bir şansı qalıb. Qaydaları pozmaqla abituriyentlər düzgün etməyiblər. Bu yolverilməz haldır. Ancaq buna baxmayaraq, mən onların ikinci imtahana buraxılmalarının tərəfdarıyam. Hesab edirəm ki, abituriyentin zəhmətini yerə vurmaq, yaxud xəyallarını puça çevirmək doğru deyil. Bu abituriyentlər içərisində oğlan abituriyentlər var ki, çağırış vaxtları çatıb. Əgər ali məktəbə qəbul ola bilməsələr hərbi xidmətə yollanacaqlar. Ola bilər ki, onlardan kimsə hərbi xidmətə getsin və qayıtdıqdan sonra bir daha təhsilə davam etmək fikrində olmasın. Qızlar isə təhsil almaq şansını itirdiyi üçün ailə qurmağı seçsin. Buna görə də DİM tərəfindən komporomisə getmək daha məqsədəuyğun olardı".

Ekspert onu da əlavə etdi ki, DİM bu il imtahandan çıxarılmış abituriyenti ikinci cəhddə imtahana buraxsa, növbəti ildə bu say sözsüz artacaq. Onlarda arxayınlıq yaranacaq ki, birinci imtahandan qovulsalar da, ikinci imtahanda prosesə buraxılacaqlar. Belə olan halda mənfi nəticələr olacaq: “Buna görə də, mən bu kimi halları nəzərə alıb, DİM-in qərarına dəstək verirəm. Yaxşı olar ki, hər bir abituriyent öz bilik və bacarıqlarına güvənsin. Axı bilikli, hazırlıqlı abituriyentin tələbə adı qazanmaq şansı var. Bu şansdan səmərəli istifadə etmək lazımdır. Hesab edirəm ki, bu gün əgər biz neqativ hərəkətlərə əl atacağıqsa, gələcəkdə abituriyent çalışdığı sahə üzrə, təbii ki, korrupsiya və rüşvətə, qanun pozuntulara meyl edəcək. Biz əgər sağlam vətəndaş cəmiyyətini formalaşdırmaq istəyiriksə, ilk növbədə bu cür məqamlara diqqət yetirməliyik”.

Günel CƏLİLOVA

Peşə etikası

Son xəbərlər