Son zamanlar Bakıda ardıcıl olaraq avtobuslarda gecikmələr olur. Sərnişinlər bəzən 20-30 və bəzən 40 dəqiqəyə yaxın müddətdə dayanacaqda qalır. Demək olar ki, gündəlik olaraq bir neçə istiqamət üzrə avtobusların gecikməsinə, ləngiməsinə dair məlumatlar yayılır. Bir neçə gün əvvəl yayılan rəsmi məlumata görə, 20 istiqamət üzrə 40-a qədər, bundan sonrakı günlər 29 müntəzəm marşrut xətti üzrə avtobuslar gecikib.
İyunun 29-da Bakı Nəqliyyat Agentliyindən bildirilib ki, Vahid Dispetçer Xidmətinin həmin gün səhər pik saatlarına olan məlumatına əsasən, Bakı – Sumqayıt şosesi – Moskva prospektindən 20 Yanvar dairəsi – Tbilisi prospekti istiqamətində nəqliyyat sıxlığı ilə əlaqədar 2, 7A, 13, 14, 18, 29, 37, 65 ,67, 83, 92, 96, 114A, 114B, 119, 135 və 199 nömrəli müntəzəm marşrut xətləri üzrə 20-yə yaxın avtobus 10-15 dəqiqə gecikmə ilə hərəkət edir. Azadlıq prospekti – Binəqədi şosesindən Azadlıq m/st istiqamətində isə nəqliyyat sıxlığı səbəbindən 71, 79, 133, 165, 179 və 202 nömrəli müntəzəm marşrut xətləri üzrə 10 ədədə yaxın avtobusun intervalında 13-15 dəqiqəlik gecikmələr yaranıb. Digər rəsmi məlumatlara görə isə təxminən 16-23 dəqiqə aralığında gecikmə baş verib. Ümumiyyətlə, son günlər avtobusların gecikməsi “ənənə” halını alıb. Rəsmi qurumlar buna səbəb kimi tıxacı göstərsələr də, qeyri-rəsmi mənbələr bunun əsas səbəbinin avtobus çatışmazlıq olduğunu deyirlər. Bildirirlər ki, xarab olan avtobusları təmir etmək əvəzinə metalloma, zibilliyə atırlar, nəticə də bu cür olur. Qeyd edilir ki, bir marşrutu üzrə 10, yaxud 15 avtobusdan ibarət tərkib xəttə çıxmalıdırsa, bunun yalnız yarısı xəttə çıxır. O da məlumdur ki, dövlət təşkilatı olan “BakuBus”ların da büdcə hesabına alıb ölkəyə gətirdiyi avtobusların çoxu dəmir “qəbiristanlığında” yağılıb, günəşin altında çürüyür. Dövlətin bir ətək pulu göyə sovrulub, nəticədə isə paytaxtın ictimai nəqliyyat problemi həll olunmayıb.
“Müəyyən marşurutlar üzrə sahibkarın, o cümlədən də “Bakubus”un “qənaət” istəyi ləngimələrə səbəb olur”
Nəqliyyat üzrə ekspert Ərşad Hüseynov bizimlə söhbətində bildirdi ki, ictimai nəqliyyatın gecikməsi halları əvvəllər də olub, amma rəsmən açıqlanmadığı üçün buna elə də ciddi əhəmiyyət verilməyib. Ə.Hüseynovun sözlərinə görə, avtobus marşurutlarının gecikməsinin səbəbləri müxtəlifdir. “Əslində, ictimai nəqliyyatda bu gecikmələr həmişə olub, bundan da çox olub. Amma son günlər bunu nəyə görəsə daha çox vurğulayırlar. Gecikmələrə hər zaman rast gəlmişik. Şəhərdə nəqliyyatın intensivliyi, nəqliyyat sıxlığı qış aylarından aşağıdır. Hətta fevral, mart, aprel, may ayları ilə müqayisə etsək bu cür nəticə ilə tanış ola bilərik. BNA və Vahid Dispetçer Xidməti son on-on beş gündür ki, bu məlumatları mətbuatda açıqlayırlar. Əvvəllər isə demirdilər. İndi ləngimələr açıqlanır. Onu xüsusi vurğulamaq istəyirəm ki, bu ləngimələr indikindən də çox idi. Nəqliyyatın ləngiməsinin səbəbləri də müxtəlifdir. Demək istəyirlər ki, şəhərin müxtəlif yerlərində, küçələrində tıxac var nəqliyyat ona görə ləngiyir. Bunu xüsusi vurğulayırlar ki, səbəb sıxlıqdır, tıxacdır. Amma bunun başqa səbəbləri də var. Ola bilir ki, müəyyən avtobuslar xəttə çıxa bilmir. Yadınıza gəlirsə, bir neçə ay əvvəl Hesablama Palatasının Milli Məclisə bir hesabı vardı. Azərbaycanda dövlətə məxsus olan və Bakıda fəaliyyət göstərən “Bakubus” şirkəti var. Həmin hesabatda qeyd edilirdi ki, “Bakubus” avtobuslarının təxminən 300-ə yaxını nasaz olduğuna görə xəttə çıxarılmır”.
“Bakubus”a məxsus olan avtobusların xarab olduğu zaman təmir edilməyib Hovsandakı metalloma atıldığına dair iddialara gəlincə, Ə.Hüseynov bildirdi ki, bu iddia deyil, Hesablama Palatasının hesabında əks olunan faktdır: “Bunlar hesabatda qeyd edilirdi. Avtobusların ehtiyat hissələrini söküb yığıblar və o birisi avtobuslar da nasaz vəziyyətdədir, istismara yaramır. Yəni nəqliyyat vasitələri yararsız vəziyyətə düşdüyü üçün xəttə çıxa bilmir. Digər tərəfdən, özəl daşıyıcıların əksəriyyətinin çox ciddi maddi problemi var. Bu səbəbdən də avtobusların hamısını xəttə buraxa bilmirlər. Yol-nəqliyyat hadisələri olur. Avtobusların yararsız vəziyyətdə olması da ciddi problem yaradır və xəttə çıxmalı olan avtobusların sayını azaldır. Yollarda sıxlıq, tıxac, avtobusların hamısının xəttə çıxarıla bilməməsi, yol-nəqliyyat hadisələri, müəyyən marşurutlar üzrə sahibkarın, o cümlədən də “Bakubus”un “qənaət” istəyi ləngimələrə səbəb olur. Ləngimələrin səbəbi hər şey ola bilər”.
İradə SARIYEVA
