Həmişə adı müxtəlif qalmaqallarda hallanan. Hacı Mazan kimi tanınan iş adamı Ramazan Zeynalovla bağlı yeni məlumat yayılıb. Məlumata əsasən, o, Nəsimi rayonu, Şövqiyar Abdullayev küçəsi, ev 23 ünvanındakı binada lifti özününküləşdirib. Belə ki, yaşadığı blokdakı liftlərdən birinə kod qoyduraraq, yalnız ailə üzvlərinin istifadəsinə icazə verib. İş adamının bu hərəkəti qonşular tərəfindən ciddi narazılıqla qarşılanıb. Onun özünü, ailə üzvlərini əlahiddə şəxslər hesab etməsi, qonşularını aşağılaması böyük qəzəb yaradıb.
Bina sakinləri qeyd edir ki, liftlər yaxşı işləmirdi, tez-tez xarab olurdu. Ona görə də yuxarı mərtəbədə yaşayanlar çox əziyyət çəkir: “Belə bir vaxtda Hacı Mazan liftlərdən birini zəbt edir, kod qoydurur, sakinlərin istifadə etməsinə icazə vermir. Təsəvvür edin ki, onlarla şəxs lift gözlədiyi bir vaxtda Mazan padşah ədasıyla öz şəxsi liftinə minib gedir. Heç kimə də qulaq asmır. Deyir, binanı mən tikmişəm, nə istəsəm edə bilərəm. Binada lift 18 mərtəbə üçün nəzərdə tutulmuşdu. Binanın 19 və 20-ci mərtəbələri qeyri-yaşayış sahəsi olduğundan ora lift yox idi. Sonradan Hacı Mazan o iki mərtəbəni özünə ev düzəltdi, liftin şaxtasını artırdı. İndi lift onun mənzilinin içinə açılır. Əslində o, binanın layihəsinə də qanunsuz müdaxilələr edib. Aidiyyəti qurumlar gərək bu məsələ ilə maraqlansınlar”.
Qeyd edək ki, həmin binanın sakinləri bir neçə ay əvvəl lift problemilə bağlı etiraz aksiyası keçirmişdi.
“Tikinti norma və standartları var, memar o layihəni hazırlayanda tikinti norma və standartlarına istinad edir”
Əmlak məsələləri üzrə ekspert Nüsrət İbrahimov bildirdi ki, çoxmərtəbəli binalarda kommunal məsələlərlə bağlı problemlər son dövrlər artıb: “Çoxmərtəbəli binalarda yaşayan insanların bir qismi Sovet psixologiyasından hələ də ayrılmayıb. Nəzərə almaq lazımdır ki, tikinti norma və standartları var. Memar o layihəni hazırlayanda tikinti norma və standartlarına istinad edir. Binada liftlərdən istifadə mənzil mülkiyyətçilərinin bərabər hüquqlu paylı mülkiyyətidir. Kiminsə orada artıq, yaxud əskik hüququ yoxdur. Kiminsə lifti özünküləşdirməsi yolverilməzdir. Binada hər şəxsə məxsus mənzilin içərisindən başqa çöldə dəhliz, bloklar, pilləkənlər, liftlər, zirzəmi, binanın fasad hissəsi, binanın həyəti ümumi paylı mülkiyyətdir. Hamının orada payı bərabərdir. Ən azı hər blokda iki lift olmalıdır. Biri yük, digəri sərnişinlər üçün nəzərdə tutulur. Eyni zamanda hər hansı bir fors-major hal üçün əlavə pilləkən olmalıdır. Bütün bunlar tikinti norma və standartlarında var. Orada kiminsə əlahiddə hüququ və ya vəzifəsi nəzərdə tutulmayıb. Eyni zamanda heç bir sahibkar belə addım ata bilməz. Çünki sahibkar binanı tikib təhvil verənə qədər sahibkardır. Ondan sonra onun səlahiyyəti bitir. Sakinlərin bu barədə etirazını 100% haqlı hesab edə bilərik. Sakinlər yalnız məhkəməyə müraciət edərək məsələni mübahisələndirə bilərlər”.
Günel CƏLİLOVA
