Bələdiyyələr tərəfindən qanunsuz torpaq satılması ilə bağlı məlumatlar yetərincədir. Növbəti belə fakt Qaxın Qıpçaq kəndi və Tovuzun Hunanlar kəndindədir. Qeyd edilən kəndlərin sakinləri iddia edir ki, qanunsuz zəbt edilən ərazilər çoxdur.
Bu da örüş sahələrinin azalması ilə nəticələnir: “Mal-qara sahibləri digər kəndlərin otlaq sahələrini icarəyə götürmək məcburiyyətində qalıblar. Sahələrin hamısını tutublar, qeyri-qanuni zəbt ediblər. Kimdən soruşursansa, deyir ki, buranı almışam. Kimdən alıb, bilmirəm. Çəpərlənib hər yer. Kimsə icarəyə verir, biz də gedib pulla götürürük”.
Kənd sakinləri iddia edir ki, bələdiyyələr örüş yerlərini satır, kəndlilər heyvanları otaracaq yer tapmırlar. Mal-qara işi ilə məşğul olanlar çıxılmaz vəziyyətdə qalıb.
Qıpçaq kənd bələdiyyəsi: “Kəndlilərin səsləndirdiyi neqativ hal əvvəlki dövrlərə aiddir”
Məsələ ilə bağlı Qıpçaq kənd bələdiyyəsindən bildirildi ki, həm Qıpçaq, həm də ətraf kəndlərin örüş sahələrində son 3 ildə, yəni yeni tərkib seçildikdən sonra zəbtolunma halı baş verməyib: “Kəndlilərin səsləndirdiyi neqativ hal əvvəlki dövrlərə aiddir”.
Tovuzun Hunanlar kənd bələdiyyəsi: “Otlaq sahələrini qanunsuz mənimsəyən şəxslər barəsində hüquq-mühafizə orqanlarına müraciət edilib”
Tovuzun Hunanlar kənd bələdiyyəsindən bildirildi ki, otlaq sahələrini qanunsuz mənimsəyən şəxslər barəsində hüquq-mühafizə orqanlarına müraciət edilib.
Kamran Məmmədli: “Bələdiyyələr tərəfindən qanunsuz torpaq satılması halları tez-tez baş verir”
Iqtisadçı Kamran Məmmədli qeyd etdi ki, bələdiyyələr tərəfindən qanunsuz torpaq satılması halları tez-tez baş verir: “Bu mövzu ilə bağlı şikayətlərin sayı-hesabı yoxdur. Hətta bir neçə bələdiyyə sədri qanunsuz əməlləri ilə bağlı həbs edilib. Yerli bələdiyyə torpağı satır, sənədi isə icra hakimiyyəti verir. Bax, belə hallarla bağlı məsələ rüşvət mexanizminə yol açır. Bələdiyyə seçkilərinin keçirilməsində şəffaflıq, nəzarət bir az da artırılmalıdır ki, orda təmsil olunanlar icra hakimiyyətlərinin istəyinə uyğun formalaşmasınlar. Bu da həmin bələdiyyələrin icra başçılarından asılılığına şərait yaradır”.
Günel CƏLİLOVA
