Azərbaycanda ya bəzi orta məktəblərdə milli ideoloji işin zəif qurulması, ya da müəyyən müəllimlərin dövlətə, dövlətçiliyə bağlı olmamasının nəticəsidir ki, neqativ hallar baş verir. İndiyə qədər məktəblərlə bağlı kifayət qədər xoşagəlməz hallar mövcud olub ki, onları hamınız yaxşı bilirsiz.
Çox təəssüflər olsun ki, bu gün təhsil sistemində islam dinini təbliğ adı altında çirkin əməllərlə məşğul olanlar var. Müxtəlif təriqətlərin, onların liderlərinin təbliğ edilməsi heç şübhəsiz, mənfi haldır və şagirdlərin də “din” adı altında bu prosesə cəlb olunması daha da pisdir.
Bu günlərdə “Turan Tim” “Telegram” kanalında diqqət çəkən bir video yayılıb. Videoda Azərbaycan məktəblərinin birində şagirdlərə İranın ali dini lideri Xamneyiyə həsr olunmuş mahnı ifa etdirildiyi əks olunub. İlkin məlumata görə, video Yevlax rayonundakı məktəblərin birində çəkilib. Şagirdlər sərtbəst geyimdə olduğu üçün, iddialara görə, video “Yay məktəbləri” layihəsi çərçivəsindəki dərslərdən birində çəkilib. Videodan görünür ki, müəllim şagirdlərə Xamneyiyə həsr olunmuş “Salam fərmandeh” mahnsını ifa etdirir. Videoda müəllimin hicablı olması və Azərbaycan bayrağının yanlış asılması da diqqəti çəkib. Bildirilənə görə, “Salam fərmande” “Salam Komandir” deməkdir. Mahnıdaki komandir isə Xamneyidir. Sosial şəbəkə istifadəçiləri müəllimin öz dini görüşlərini şagirdlər arasında təbliğ etməsinin yanlış olduğunu bildirib və buna etiraz ediblər.
Video ilə bağlı hələ ki, hər hansı bir rəsmi açıqlama verilmir.
Azərbaycan məktəblərindən birində baş verdiyi iddia olunan olayı necə qarşılamaq olar? Təhsil Nazirliyi, yerli təhsil qurumları hələ ki, görüntülərə reaksiya verməyib. Qurumların buna reaksiyası necə olmalıdır?
“Ümid edirəm ki, bu video ilə bağlı ciddi şəkildə araşdırma aparılacaq və Xamneyipərəst müəllimə ifşa olunacaq, cəzalandırılacaq”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, istənilən halda Azərbaycan məktəblərində İran İslam Respublikasının dini lideri Seyid Əli Xamneyiyə həsr edilən hansısa bir mahnının ifa edilməsi qəbuledilməzdir. “İstənilən şəkildə hər hansı bir rayonumuzda, hər hansı bir orta məktəbdə belə bir halın baş verməsini nə qəbul etmək olar, nə də bunu dövlətçilik baxımından düzgün qəbul etmək olar. Bu birmənalı olaraq yolverilməzdir. Son zamanlar İranın buradakı emissarları, təbliğatçıları fəallaşmağa cəhd göstərirlər. Onlar müxtəlif formalarda İranı və İranın özünəməxsus məzhəbçiliyini təbliğ etmək istəyirlər. Belə cəhdləri görürük. Çox təəssülər olsun ki, İran mətbuatı Azərbaycan haqqında gerçək olmayan məsələləri irəli sürür. İndi isə belə bir məsələnin hansısa məktəbimizdə baş verməsi (buna dair iddialar və görüntülər var-F.Ə) çox mənfi bir haldır. Bu video təxribat da ola bilər, bütün hallarda diqqətli olmalıyıq. Fikrimcə, əlaqədar qurumlar tərəfindən ciddi araşdırma aparmalı, bunun kökü araşdırılmalıdır. Əgər bu təxribatdırsa və o təxribata yol verənlər Azərbaycandadırsa onlar aşkar edilib müvafiq şəkildə cəzalandırılmalıdır. Niyə təxribat amilini vurğulayıram? Çünki indiki həssas zamanda İrandan hər cür təxribat gözləmək olar. Azərbaycan daha da gücləndikcə və inkişaf etdikcə, şübhəsiz ki, bu amil Güney Azərbaycandakı soydaşlarımıza müsbət təsir göstərir. Bu baxımdan, İran tərəfindən müxtəlif təxribatlarla üzləşirik.
Əgər doğrudan da bu bizim hansısa məktəbimizdə baş veribsə, o məktəb aşkara çıxarılmalı və buna rəvac verən müəllimə, onunla əlbir olanlar cəzasına çatdırılmalıdır. İddia olunur ki, görüntülər Yevlax rayonundakı məktəblərdən birində çəkilib. Ələqədar qurumlar bu barədə geniş araşdıma aparmalıdır. Təbii ki, Təhsil Nazirliyinin bu hadisəyə reaksiyası sərt olmalıdır. Bu cür “müəllimlər” Azərbaycan məktəbində olmamalıdır. İranın dövlət siyasətini və Xamneyini təbliğ edənlər nə Azərbaycan məktəbinin müəllimi ola bilərlər, nə də uşaqlarımızın təhsilini, tərbiyəsini belələrinə tapşıra bilərik. Azərbaycan uşaqlarını milli demokratik, dünyəvi, bütöv Azərbaycan uğrunda böyüdürük, hansısa dini məzhəbçilik, hansısa farsçılıq, İrançılıq yolunda böyütmürük. Bizim məqsədimiz Azərbaycançılıqdır, Azərbaycan türkçülüyüdür, milli-demokratik bütöv Azərbaycandır, üçrəngli bayrağımıza əbədi sevgi və sədaqətdir. Ona görə də, ümid edirəm ki, bu video ilə bağlı ciddi şəkildə araşdırma aparılacaq və Xamneyipərəst müəllimə ifşa olunacaq, cəzalandırılacaq. Azərbaycanın dövlət maraqlarını tapdayanlar bizdən ola bilməzlər”.
Azərbaycanın dünyəvi dövlət olduğunu vurğulayan F.Ələkbərlinin sözlərinə görə, cəmiyyətimiz də demokratik cəmiyyətdir, biz burada İranın məzhəbçiliyini, hansısa geriçiliyini Azərbaycanda qəbul edə bilmərik: “Xüsusən də İranın ali dini liderinin Azərbaycana heç bir aidiyyəti yoxdur. Üstəlik də bilirik ki, Güney Azərbaycanda soydaşlarımıza qarşı hansı proseslər gedir, insan haqları necə tapdalanır, xüsusən də milli dilimiz, milli mədəniyyətimiz necə basqılara məruz qalır. Bunlardan bəhs etmək lazımdır”.
İradə SARIYEVA
