Bu gün Vətən müharibəsi iştirakçılarına, qazilərə, şəhid ailələrinə böyük dayaq olan “YAŞAT” Fondu təhsil sahəsində də bu kateqoriyadan olanlara ciddi maliyyə dəstəyi göstərir. Fond təhsil, peşə hazırlığı sahəsində də insanlara dayaq olur, dəstəyini əsirgəmir.
Məlumatlara görə, “YAŞAT” Fondu tərəfindən təhsil, peşə hazırlığı və yaradıcı potensialın inkişafı xərcləri istiqaməti üzrə şəhid ailə üzvlərinin 176 və yaralıların 39 müraciəti olmaqla ümumilikdə 215 müraciət təmin edilib. Fondun təşəbbüsü ilə təhsil haqqının qarşılanması üzrə təhsil müəssisələri tərəfindən 254 637.99 AZN vəsait qarşılanıb. 94 şəxsin təhsil haqqı ödənişi Fond tərəfindən həyata keçirilib, 72 şəxsin isə ödənişi Fondun təşəbbüsü ilə təhsil müəssisələri tərəfindən qarşılanıb.
Liberal İqtisadçılar Mərkəzinin rəhbəri Akif Nəsirli baki-xeber.com-a bildirdi ki, “YAŞAT” Fondunun bu sahələrə geniş dəstək göstərməsi çox müsbət haldır. “Azərbaycan Prezidentinin 8 dekabr 2020-ci il tarixli Fərmanına əsasən yaradılan “YAŞAT” Fondu elə əvvəldən ərazilərimizin bütövlüyü uğrunda döyüşən qazilərimizin və canını fəda edən şəhidlərimizin ailələrinin sosial problemlərini daha çevik, operativ şəkildə həll etməyi qarşısına məqsəd qoyub. Qazilərin, şəhid ailələrinin problemlərinin hərtərəfli həlli üçün belə bir fond formalaşdırılıb. Ötən dövr ərzində cəmiyyətdə “YAŞAT” Fondunun artıq reytinqi var. Fond tərəfindən şəhid ailələrinin, qazilərin problemlərinin bir hissəsi həll olunub, qalanları isə həll olunmaqdadır. Bütövlükdə, bu platformanın fəaliyyəti təqdirəlayiqdir. Həm hökumətin, dövlətin nəzarətinin ciddiliyi nəticəsində, həm də öz mənəvi məsuliyyətini dərk edərək Fond öz missiyasını çox layiqincə həyata keçirir, hədəflərinə doğru irəliləyir”.
A.Nəsirlinin sözlərinə görə, şəhid ailələri və qazilər də cəmiyyətin sosial müdafiəyə ehtiyacı olan həssas təbəqəsi sayılır. Ona görə də, dövlətin digər sosial müdafiə orqanları da bu qəbildən olan vətəndaşlarımızın qayğı ilə əhatə edilməsində “YAŞAT” Fondundan nümunə götürməli olduğunu deyən A.Nəsirli bildirdi ki, o burada əsasən Əmək və Əhalinin Sosial Müdafiəsi Nazirliyini nəzərdə tutur.
Fondun təhsil, peşə hazırlığı və digər bu qəbildən olan sahələrə ayırdığı vəsaitin həcminə gəlincə, A.Nəsirli hesab edir ki, Fondun bu addımları da müsbət qarşılanır: “Şəhid ailələrinin, qazilərimizin heç bir sahədə problemi olmamalıdır. Ona görə də “YAŞAT” Fondu yaradılıb ki, dövlətin əsaslı sosial müdafiə strukturlarına yardım etsin. Bildiyiniz kimi Fond tərəfindən həm də bu kateqoriyadan olan ailələrin övladlarının təhsil haqları ödənilib. 94 tələbənin təhsil haqqının ödənilməsinə vəsait ayrılması və 72 tələbənin də təshil haqlarının təhsil aldıqları müəssisələr tərəfindən qarşılanmasına nail olunması çox müsbət haldır. Fond həm tələbələrin təhsil haqqını ödəyir, həm də bu kateqoriyadan olan şəxslərin, şəhid ailələri üzvlərinin peşə hazırlığına cəlb edilməsinə dəstək olub. Fondun bu istiqamətdə gördüyü işlər şübhəsiz ki, şəhid ailələrinə və qazilərimizə, bu qəbildən olan tələbələrə stimul verir”.
İradə SARIYEVA
