Artıq ikinci ildir 26 iyun Azərbaycan Silahlı Qüvvələri Gününü qalib xalq kimi bayram edirik. Ali Baş Komandan İlham Əliyevin rəhbərliyi altında rəşadətli ordumuz 30 il düşmən tapdağında qalan Vətən torpaqlarını 44 günə azad etdi. Həqiqətən Azərbaycan Ordusu Cənubu Qafqaz regionunda ən qüdrətli hərbi gücə malik olmaqla öz xalqını, Vətənini hər hansı yad təsirlərdən qorumağa qadirdir.
Xalq öz ordusuna olan inamını bir daha göstərmək üçün qarşıdan gələn 26 iyun Azərbaycan Silahlı Qüvvələri Günü münasibətilə tədbirlər təşkil edir. Belə tədbirlərdən biri bu günlər Rəhim Tağıyev adına Masallı rayon Tarix - Diyarşünaslıq Muzeyində baş tutdu. Rayon Gənclər və İdman İdarəsinin, eləcə Tarix -Diyarşünaslıq Muzeyinin birgə təşkilatçılığı sayəsində ərsəyə gələn, “Qalib Ordu” adı seçilmiş tədbirdə Yeni Azərbaycan Partiyası Masallı rayon təşkilatının sədri Seyfəddin Əliyev, rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Qəşəm Hadıyev, Gənclər və İdman İdarəsinin rəisi Sabiq Cahangirov və əməkdaşları, Tarix -Diyarşünaslıq Muzeyinin direktoru, Əməkdar Mədəniyyət işçisi, Azərbaycan Jurnalistlər Birliyinin üzvü Əntiqə Tağıyeva, Masallı rayon Müharibə, Əmək və Silahlı Qüvvələr Veteranları Təşkilatının (MƏSQVŞ) sədri Məmmədağa Şiriyev, Ehtiyatda olan Zabitlər Konfederasiyasının sədri Cəmaləddin Məmmədov, rayon Gənclər Evinin direktoru Fuad Mənsimov, Masallı Regional Mədəniyyət İdarəsinin nümayəndəsi Salman Yunusov, şəhid ailələri, I və II Qarabağ müharibəsi iştirakçıları ,”ASAN Xidmət” in könülləri iştirak edirdilər.
Vətən torpaqlarının azadlığı uğrunda canından keçən şəhidlərin əziz xatirəsi bir dəqiqəlik sükutla anılmaqla başlanan tədbiri muzeyin direktoru Ə. Tağıyeva açdı, ilk olaraq 26 iyun Azərbaycan Silahlı Qüvvələr Günü münasibətilə iştirakçıları təbrik etdi, müstəqil Azərbaycan naminə müqəddəs və şərəfli xidmətlərinə görə onun keşiyində duran hər bir fədakar əsgərimizə uğurlar arzuladı.
Çıxışlarda Veteranlar Şurasının sədri M.Şiriyev, YAP Masallı rayon təşkilatının sədri S.Əliyev, Gənclər və idman idarəsinin rəisi S.Cahangirov dedilər ki, bu gün qəhrəmanlarımız sayəsində Silahlı Qüvvələr Gününü böyük sevinclə qarşılayırıq. Ali Baş Komandanın qeyd etdiyi kimi, Azərbaycan ordusunun peşəkarlığı, döyüş qabiliyyəti artıb, Azərbaycan əsgəri, gizir və zabitləri Vətənin keşiyində ləyaqətlə dururlar, ona hər zaman sadiqdirlər. Natiqlər özlərinin də Vətənə olan borclarını hər zaman yerinə yetirməyə hazır olduğunu dedilər. I və II Qarabağ veteranı Cəmaləddin Məmmədov, Vətən müharibəsi iştirakçıları Talıb Qəzənfərli, Vüsal Əliyev isə bir Azərbaycan Ordusunun mərd əsgəri olaraq əminliklə bildirdilər ki, Azərbaycan Silahlı Qüvvələrinin şəxsi heyəti bundan sonra da xalqımızın, dövlətimizin etimadını şərəflə doğruldar.
Tədbirin daha bur yaddaqalan məqamı Vətən müharibəsi iştirakçılarına təşkilatçılar tərəfindən Silahlı Qüvvələr Günü münasibətilə Fəxri fərmanların təqdimatı oldu. Sonda iştirakçılar muzeyin ekspozisiya zalında 26 İyun Silahlı Qüvvələr günü ilə bağlı təşkil olunmuş sərgiyə baxdılar, xatirə şəkilləri çəkdilər.
Zəfər ORUCOĞLU
Azərbaycan Jurnalistlər Birliyinin üzvü
