Ərazi bütövlüyümüzün müdafiəsi ilə əlaqədar yaralananların və şəhid ailələrinin təminatına dəstək məqsədilə yaradılan “YAŞAT” Fondu yarandığı 1 il müddətində çox böyük işlər həyata keçirib. Neçə-neçə şəhid ailəsinə, qaziyə dəstək olub, onların sosial-məişət problemlərini həll edib.
“YAŞAT” Fondunun 1 illiyi ilə bağlı yayılan hesabatda qeyd edilir ki, 23 iyun 2022-ci il tarixinədək Fondun hesabına 73 781 435.79 vəsait mədaxil olub. Qeydə alınmış müraciətlərə gəlincə, bildirilir ki, ölkə ərazisində 2 927 şəhidin ailə üzvləri, habelə 5 599 yaralı olmaqla ümumilikdə 16 966 şəxslə görüşülüb, ehtiyacları qeydə alınıb (yashat.gov.az saytında) və 12 526 şəxsin 26 616 müraciəti icra üçün öhdəliyə götürülüb. Reallaşmış ödəniş sayı 21 848-dır.
Məişət şəraitinin yaxşılaşdırılması istiqaməti üzrə 36 892 200.00 AZN, təhsil, peşə hazırlığı və yaradıcı potensialın inkişafı xərcləri 546 346.40 AZN, istehlak kreditləri və digər borc öhdəliklərinin qarşılanması 6 336 540.51 AZN, müalicə və psixoloji dəstək xərclərinin ödənilməsi üzrə 17 339 670.95 AZN xərclənib.
Qeyd edək ki, müalicə və psixoloji dəstək xərclərinin ödənilməsi istiqaməti üzrə şəhid ailə üzvlərinin 4 907 və yaralıların 4 483 müraciəti olmaqla ümumilikdə 9 390 müraciət təmin edilib. Ümumilikdə 176 şəxs müalicə məqsədilə Türkiyə Respublikasına göndərilib, onlardan 171-i ağır yaralı, 5-i isə şəhid ailəsi üzvüdür. Müalicə alanlardan 148-i ölkəyə geri qayıdıb. Hazırda 26 ağır yaralının və 2 şəhid ailəsi üzvünün müalicəsi Türkiyə Respublikasında davam edir. “YAŞAT” Fondunun dəstəyi ilə ölkəmizə gətirilən türkiyəli həkimlər tərəfindən 150-dən çox yaralı müayinə edilib. 10 mart 2021-ci il tarixdə Türkiyə Respublikasından dəvət olunan həkim tərəfindən komada olan ağır yaralılar müayinə edilib. 28 fevral - 07 mart 2021-ci il tarixlərdə İsrail dövlətindən hərbi xəsarətlərin müalicə edilməsi üzrə ixtisaslaşmış 8 mütəxəssis gətirilib, qeydiyyatı aparılmış ağır göz problemləri olan 148 nəfər şəxs müayinə edilib. Müayinə nəticəsinə uyğun olaraq 30 nəfər əməliyyat edilib, əməliyyat nəticəsində 2 nəfərin görmə qabiliyyəti bərpa olunub. 55 nəfərə protez göz qoyulub, 82 nəfər isə sadəcə müayinə edilib. Ciddi fiziki travma alan yaralıların fiziki bərpa prosesini daha da sürətləndimək üçün “YAŞAT” Fondu tərəfindən xaricdən sifariş edilən 38 999.00 manat məbləğində “RGO” ortopedik cihazları ölkəmizə gətirilib. Avadanlıqdan 8 yaralının müalicəsində istifadə olunub. Gün ərzində 35-40 nəfər yaralının müalicəsində istifadə edilməsi üçün 47 200 manat məbləğində Giger MD reabilitasiya cihazı alınıb. 2021-ci ilin 12 avqust tarixində Fondun Himayəçilik Şurasının üzvü, Kopenhagen Universitetinin nevrologiya üzrə professor və baş məsləhətçisi, Beynəlxalq Baş Ağrıları Cəmiyyətinin rəhbəri və İnsan Miqreni Araşdırma Birliyinin direktoru Məsud Aşina tərəfindən 34 nəfər yaralının müayinəsi həyata keçirilib və müalicə istiqamətləri müəyyən edilib. 2021-ci ilin 12 avqust tarixində İsrail dövlətindən gələn həkim tərəfindən 9 nəfər yaralının müayinəsi həyata keçirilib və müalicə istiqamətləri müəyyən edilib. Türkiyə Respublikasında (İstanbul, Bursa və İzmit) Fondun dəstəyi ilə müalicə alan 28 ağır yaralının əlillik dərəcəsinin qiymətləndirilməsi məqsədi ilə komissiya (2022-ci il 13 yanvar-16 yanvar) təşkil olunub. Komissiya üzvlərinin tərkibinə Dövlət Tibbi-Sosial Ekspertiza və Reabilitasiya Agentliyinin iki əməkdaşı və “Tibbi Ərazi Bölmələrini İdarəetmə Birliyi”nin iki əməkdaşı daxildir. Qeyd edək ki, Türkiyənin ən böyük xəstəxanalarından olan “VM Medikal Park” xəstəxanasının tibbi heyətinin həkim briqadası (beyin cərrahı, plastik-estetik cərrah və uşaq hematoloqu) ölkəmizə gəlib. Həkimlər Türkiyədə əməliyyat olunan, müalicəsini uğurla tamamalayaraq ölkəyə qayıdan 20 yaralı və bir şəhid övladını müayinə ediblər. 2022-ci il 20 may tarixində “YAŞAT” Fondunun, Əmək və Əhalinin Sosial Müdafiəsi Nazirliyinin və İcbari Tibbi Sığorta üzrə Dövlət Agentliyinin nümayəndələri ilə görüş keçirilib. Görüşdə Türkiyə Respublikasında müalicəsi davam edən bəzi şəxslərin ölkəyə geri qayıdan zaman reabilitasiya prosesinin harda davam etdirmələri barədə müzakirələr aparılıb.
“Biz təkcə Fondun təqdim etdiyi rəqəmlərdən çıxış etmirik, bu qurumun fəaliyyətini, gördüyü işləri özümüz də müşahidə edirik”
Vətən Müharibəsi İştirakçılarının Hüquqlarının Müdafiəsi İctimai Birliyinin rəhbəri Nahid Salayev “Bakı-Xəbər”ə şərhində bildirdi ki, “YAŞAT” Fondu yarandığı gündən indiyə qədər sözün həqiqi mənasında qazilərimizə və şəhid ailələrinə böyük dayaq olub və bu kateqoriyadan olan şəxslər, ailələr Fondun diqqət və qayğısını hər an hiss ediblər. Müharibədə yaralanan, müxtəlif bədən üzvlərini itirən, psixolji sarsıntı keçirən insanların Fond tərəfindən həm müalicə, həm də psixoloji dəstək xərclərinin ödənilməsini yüksək dəyərləndirən N.Salayevin fikrincə, bu Fond neçə-neçə qəhrəmanın normal həyata qayıtmasına töhfə verib. “İlk olaraq deyim ki, Fond cəmi bir ildir yaranmasına baxmayaraq çox böyük işlər görüb. Vətənimizin ərazi bütövlüyü uğurunda sağlamlığını, bədən üzvlərini itirən qazilərimizə, müharibə iştirakçıların həm müalicəsində, həm də psixoloji dəstəklə təmin olunmasında “YAŞAT” Fondu çox müstəsna rol oynayıb. “YAŞAT” Fondunun qazilərin, Vətən müharibəsi iştirakçılarının və şəhid ailələrinin müalicəsində, reablitasiyasında, maddi təminatının, sosial durumunun yaxşılaşmasında və sair istiqamətdə göstərdiyi fəaliyyəti çox yüksək qiymətləndirirəm. Qazilərə, Vətən müharibəsi iştirakçılarına və o cümlədən də şəhid ailələrinə qayğı məqsədilə Fondun həyata keçirdiyi tədbirlər toplusu həddən artıq təqdirəlayiqdir. Özümüz də bunu müşahidə edirik ki, “YAŞAT” Fondu hər zaman qazilərin problemləri ilə ciddi maraqlanıb. Həm maddi, həm də mənəvi cıhıtdən onların qayğı ilə əhatə olunmasını həyata keçirib, reablitasiyası üçün çox böyük işlər görüb. Biz təkcə Fondun təqdim etdiyi rəqəmlərdən çıxış etmirik, bu qurumun fəaliyyətini, gördüyü işləri özümüz də müşahidə edirik. Fond qazilərin həm psixoloji problemləri və digər qayğıları ilə yaxından maraqlanır, onların xarici ölkələrdə, əsasən də qardaş Türkiyədə müalicəsinin həyata keçirilməsində çox böyük fəaliyyət göstərir”.
N.Salayevin sözlərinə görə, Fondun qazilərə, Vətən müharibəsi iştirakçılarına göstərdiyi psixoloji dəstəyi xüsusi qeyd etmək lazımdır. “Qazilərə göstərilən psixolji dəstək işində Fondun aktiv fəaliyyətinin özü çox təqdirəlayiq haldır. Bu işlərin davamlı olmasını arzulayırıq və inanırıq ki, belə də olacaq. Bu sahədə “YAŞAT” Fondu öz üzərinə götürdüyü məsuliyyətli vəzifəni doğruldur. Çünki yüzlərlə insan Fondun maliyyə vəsaiti hesabına müalicə və psixoloji dəstək alıb, bu isə çox böyük işdir”- deyə N.Salayev qeyd etdi.
İradə SARIYEVA
