Bu günlərdə çox sayda dərman qəbul edərək intihara cəhd etmək istəyən Gəncə İsmət Qayıbov adına 1 nömrəli məktəbin direktoru Mətanət Qarayeva bu cəhdinin səbəblərini açıqlayıb.
O, mətbuata açıqlamasında qeyd edib ki, özünə qəsd etmək istəməsinin səbəbi Gəncə-Daşkəsən Regional Təhsil İdarəsinin rəisi Anar Qədiməliyevin onu işdən çıxarmaq üçün müxtəlif bəhanələr gətirməsi, hətta şantaj vasitələrinə əl atmasıdır:
“Məni özü çağırmır, ammaTəhsil İdarəsinin bəzi əməkdaşlarını yanıma göndərir. İşimdə etmədiyim səhvləri, yol vermədiyim qüsurları üstümə atırlar. Hamısı şər-böhtandır. Məqsəd məni işdən azad etməkdir. Hətta ən xırda məsələni belə məqsədli şəkildə şişirdir, olmazın sözlər deyirlər. Mən bütün bunlara dözə bilmədim. Hətta qeyd etdim ki, iyul ayının 6-sı məzuniyyətə çıxacağam, 7-si isə gəlib ərizəmi yazıb işdən gedəcəyəm. Lakin göndərdiyi adamlar bildirdilər ki, yox, elə bu dəqiqə ərizəni yazmalısan. Yerimə namizəd də tapıblar. Bu, məktəbdə təşkilatçı işləyən, tədris müəssisəsinin keçmiş direktoru Müsəddin Məmmədovun gəlini Nüşabə Məmmədovadır". Qeyd edilənə görə, faktla bağlı Gəncə şəhər Baş Polis İdarəsində araşdırma başlanılıb.
Qeyd edək ki, hadisə ilə bağlı Gəncə Şəhər Təhsil İdarəsinin ictimaiyyətlə əlaqələr üzrə məsul şəxsi Raminə Məmmədova mətbuata danışıb: “Mətanət Qarayeva, sadəcə, sakitləşdirici dərman qəbul edib, bundan sonra halı pisləşib, xəstəxanaya yerləşdirilib. Ola bilsin ki, dərmandan çox istifadə edib. Yəni bu, intihara cəhd deyil və Gəncə Şəhər Təhsil İdarəsi ilə heç bir əlaqəsi yoxdur. O ki qaldı yaxın günlərdə həmin məktəbdə aparılacaq monitorinqə, məlumat üçün bildirim ki, bu monitorinqlər mütəmadi olaraq keçirilir”.
Ölkədə belə ciddi bir hadisə baş verib, polis araşdırmaya başlayıb, amma hələ Təhsil Nazirliyi məsələyə reaksiya verməyib. Nə baş verir? Nə üçün Təhsil Nazirliyi bu məsələ ilə bağlı münasibət bildirmir?
“Təhsil Nazirliyinin məsələyə hələ ki, münasibət bildirməməsinə gəlincə...”
Tanınmış təhsil eksperti Kamran Əsədov “Bakı-Xəbər”ə açıqlamasında ilk növbədə qeyd etdi ki, ölkədə 4432 ümumtəhsil məktəbi var və son illər ölkədə məktəb direktorları yeni qaydalarla işə qəbul edilir. “Biz görürük ki, müsabiqə və müsahibə prosesindən keçənlər direktor vəzifəsinə işə qəbul olunurlar. Bununla yanaşı, uzun illərdir təhsil sistemində çalışanlar var. Təəssüflər olsun ki, yeni təyinatlar əvvəlki vaxtlarda vəzifədə olanlarla, vəzifə tutanlarla yola getmirlər. Bunun da bir nümunəsini biz Gəncə-Daşkəsən Regional Təhsil İdarəsinin rəisi və məktəb direktoru ilə bağlı məsələdə görürük. Gəncə-Daşkəsən Regional Təhsil İdarəsinin rəisi əvvəllər Gəncə Təhsil İdarəsinin rəisi olanda belə onun barəsində yazılanları mütəmadi olaraq mətbuatda oxuyrduq. Baxmayaraq ki, bu şəxs uzun müddət Bakı Şəhəri üzrə Təhsil İdarəsində çalışıb, fəaliyyətindəki kifayət qədər şəffaflıqla diqqət çəkib. Bilirsiz ki, hazırda islahatlar mövsümüdür və bəzi məktəb direktorları yol verdikləri pozuntulara görə cavab verməlidirlər. Sadəcə, hesab edirəm ki, etik qaydalara Gəncə-Daşkəsən Regional Təhsil İdarəsi də, məktəb direktoru da əməl etməlidir. Uzun illərdir direktor postu tutan şəxslərin böyük əksəriyyəti ciddi qanun pozuntularına yol verib. Yeni təyin olunanlar da onlarla işləmək istəmirlər. Çünki onlar daha şəffaf bir sistem qurmaqda maraqlıdırlar. Bu səbəbdən də belə anlaşılmaz məqamlar ortaya çıxır. Xüsusən bir direktorun intihara cəhd etməsi kifayət qədər ciddi bir faktdır. Bu onu göstərir ki, Gəncə-Daşkəsən Regional Təhsil İdarəsinin rəhbərliyi də, əməkdaşları da işçini işdən azad etməyin yollarını, qanunvericiliyin tələblərini bilmirlər, ya da ki, etik davranış qaydalarına düzgün riayət etmirlər. İnsan həyatı hər şeydən önəmlidir. İstənilən vəzifə tutan şəxs ilk növbədə insanların həyat və sağlamlığını qorumağı özünə öhtəlik olaraq götürür. Bu ciddi bir məsələdir, ciddi bir ittihamdır, inanıram ki, buna hüquqi qiymət veriləcək. Kimliyindən asılı olmayaraq, hamı bilməlidir ki, tutduğu vəzifə ona dədəsindən miras qalmayıb. Ölkə Prezidentinin dediyi kimi, hər kəs vətəndaşa xidmət etməlidir. Bu ciddi məsələ də birmənalı şəkildə öyrənməliyik ki, nəyin nəticəsində baş verib. Mən bilirəm ki, müvafiq idarənin əməkdaşları çox kobud şəkildə davranıblar, onu özünü öldürmə həddinə çatdırıblar. Bu onu göstərir ki, Gəncə-Daşkəsən Regional Təhsil İdarəsinin rəhbərliyinin, əməkdaşlarının təhsildən ümumiyyətlə anlayışları yoxdur. Bu, təyinatın özünü doğrultmadığını göstərir. İnanıram ki, buna hüquqi qiymət verilərkən hətta bəziləri öz vəzifəsini itirməlidir. Çünki onlar təhsil sisteminə yaddırlar, təhsil sistemində keyfiyyətli tədrisdən çox öz maraqlarına xidmət edirlər. Bir insanın həyatı bizim üçün hər şeydən önəmlidir”.
Hər bir insanın həyatının qorunmalı olduğunu deyən K.Əsədov hesab edir ki, ola bilsin, həmin şəxs fəaliyyətində ciddi qüsurlara yol verib, amma biz onu özünü öldürmə həddinə çatdırmamalıyıq. Qanunvericiliyin tələblərinə uyğun olaraq həmin şəxsin vəzifədən getməsinə mümkün qədər şərait yaradılmalı, hətta başqa vəzifəyə keçirilməli olduğunu deyən müsahibimiz qeyd edir ki, xidməti olan şəxslərin fəaliyyəti dəyərləndirilməlidir. “Bu ittiham ağır ittihamdır və inanıram ki, hüquq-mühafizə orqanları bunu ciddi şəkildə araşdıracaq. Təhsil Nazirliyinin məsələyə hələ ki, münasibət bildirməməsinə gəlincə, bu, daxili prosedur qaydaları ilə bağlıdır. Qaydalara əsasən birinci yerli qurumlar, sonra regional qurumlar məsələni araşdırmalıdır. Əgər şikayət olarsa, onda Təhsil Nazirliyi bu məsələ barədə araşdırma aparar”- deyə K.Əsədov qeyd etdi.
İradə SARIYEVA
