Qazilərin, veteranların üzləşdikləri problemlərin çevik şəkildə yoluna qoyulmaması üzündən, hətta beynəlxalq media bu barədə yazmalı oldu. Bu isə istər-istəməz təəssüf doğurur. O mənada ki, gör problem nə həddə gəlib çatıb ki, beynəlxalq media bu barədə yazır.
Məsələ ondadır ki, nüfuzlu alman xəbər agentliyi “Deutsche Welle” Vətən müharibəsi qazilərinin etirazlarından bəhs edən geniş yazı dərc edib. Məqalədə deyilir ki, Azərbaycanda İkinci Qarabağ müharibəsinin bəzi veteranları əlilliyə görə müavinət ala bilmədiklərindən, ümumiyyətlə, hüquqlarının pozulması ilə üzləşdiklərindən şikayətlənirlər.
Azərbaycanın bu probleminin, məsələnin beynəlxalq mediada müzakirəsinin məsuliyyətini kim daşıyır? Bu nəyin, kimin günahıdır ki, Azərbaycanın daxilində həll olunmalı olan məsələ beynəlxalq medianın müzakirəsinə çıxdı? Məsələ ilə bağlı ekspertlərin münasibəti necədir?
“Laqeydlik, səthi yanaşma o həddə gətirib çıxartdı ki, qazilərlə bağlı problemlər ölkə hüdudlarından kənara çıxdı”
Mövzu ilə bağlı fikirlərini “Bakı-Xəbər”lə bölüşən hüquqşünas Şəmsəddin Əliyevin fikrincə, müəyyən məmurların səhlənkarlığı üzündən məsələ bu dərəcədə böyüyüb: “Ümunən, Əmək və Əhalinin Sosial Müdafiəsi Nazirliyi, Müdafiə Nazirliyi bunlara görə məsuliyyət daşıyır. Gərək adıçəkilən quruumlar məsələnin bu dərəcədə böyüməsinə imkan verməyəydilər. Ancaq sözügedən məsələlərin həlli daha çox ƏƏSMN-nin səlahiyyətlərinə aiddir. Zamanında işlərinə ciddi yanaşsaydılar və çevik formada şikayətləri araşdırsaydılar, məsələ bu dərəcədə böyüməzdi. Problem bundadır. Gərək müharibə iştirakçılarının problemlərinə ciddi yanaşaydılar. Nəzərə almalıydılar ki, onlar vətən yolunda öz sağlamlıqlarından keçiblər. Problem ondadır ki, 44 günlük müharibədə iştirak edən vətəndaşlarımızın üzləşdiyi çətinliklər zamanında aradan qaldırılmır. Problemlər üst-üstə yığılaraq durumu bu həddə gətirib çıxarır. Elə qazilər var ki, onlara verilən pensiyalar kəsilib. Təkrar yoxlama aparılır. Bu müddət ərzində onların nə ilə dolana biləcəyi nəzərə alınmır. Narazılıq həm də belə hallardan qaynaqlanır. Laqeydlik, səthi yanaşma o həddə gətirib çıxartdı ki, qazilərlə bağlı problemlər ölkə hüdudlarından kənara çıxdı. Bu baxımdan sosial problemlərin “Deutsche Welle” agentliyində işıqlandırılması utancverici haldır. Bu o deməkdir ki, belə vəziyyətin yaranmasına görə müvafiq cavabdeh qurumlar məsuliyyət daşıyır. Müvafiq dövlət qurumları gərək müharibədən sonra komanda halında şəhid ailələrinin, qazilərin, müharibə veteranlarının problemlərinə yanaşaydılar. Çünki qələbəni bizə bu insanlar bəxş etdi. 3 min nəfərdən çox şəhid var. Yaralanıb əlil olanların sayı isə 12 min nəfərdən çoxdur. Əfsuslar olsun ki, bu baş vermədi. Narazılıqların yaranma səbəblərindən biri də bununla əlaqədardır. Vaxtında müvafiq addımlar atılsaydı, məsələ bu qədər böyüməzdi”.
Bir sözlə, hüquqşünas hesab edir ki, problemin bu dərəcədə böyüməsi yolverilməzdir.
Vidadi ORDAHALLI
