Sədərək bazarının “Şirniyyat” bölməsində qalmaqal – “...bizdən 5-7 min pul tələb edilir…”

Elçin Qurbanov: “Həmin sahibkarlar əlavə ödənişdən yayına bilərlər”

img

“Sədərək” Ticarət Mərkəzində sahibkarlar etiraza başlayıb. Belə ki, TM-nin rəhbərliyi mağazaları icazəsiz şəkildə böyüdərək, bunun üçün sahibkarladan külli miqarda pul tələb edir. Bu barədə “Sədərək”dəki sahibkarların sosial şəbəkələrdə etdikləri şikayətin məzmunu yayılıb. Bildirilir ki, hazırda 1000 nəfərə yaxın sahibkar “Sədərək” bazarının rəhbərliyindən şikayətçidir.

Şikayətçilərin sözlərinə görə, bazarın “Şirniyyat” adlanan zonasında yerləşən mağazaların həcmi məcburi şəkildə böyüdülür:

“Amma sahiblarkarlarla rəhbərlik arasında bununla bağlı heç bir razılaşma olmayıb və müqavilə imzalanmayıb. Artırmadan əlavə, gördükləri iş üçün ikiqat vəsait tələb edirlər. Üstəlik, sahibkarların vəsaiti hissə-hissə ödəməsinə də razılaşmırlar. Hətta pul ödənilmədiyi üçün sahibkarlara təzyiqlər olunur və mağazaları bağlanılır. Məsələn, şəxsi obyekt olan 12 kvadratlıq mağazanı heç bir icazə almadan 24 kvadrat ediblər. Ümumilikdə 10, 12 və 15 kvadrtatmetr böyüdülən mağazalar da var. Bunun üçün əvvəl 5 min, sonra 6 min, indi isə 7-8 min manat pul istəyirlər. Mağazanı böyütməklə bağlı heç bir tələbimizin olmamasına rəğmən, 500 manat şəklində hissə-hissə belə ödəməyi təklif edirik. Amma bu iş üçün sahibkarlardan bir dəfəyə 7-8 manat pul tələb olunur. Bu ödənişin olmasına dair heç bir qəbz də təqdim olunmur”.

Zərərçəkənlər mağazalarının icarədə deyil, sənədlə özlərinə məxsus olduğunu da bildiriblər:

“Bizim əlimizdə mağazaları aldığımıza dair müqavilələr də var. Bunun üçün böyük məbləğdə vəsait ödəmişik. İyunun 1-dən etibarən bu prosesə başlayıblar və camaatdan mağazanı artıqmaq adı ilə zorla pul yığırlar. Bir aya yaxındır ki, təmirlə bağlı mağazaların fəaliyyətini də dayandırıblar. Bunları etdirənlər “Sədərək”də rəhbərlikdə təmsil olunan Yusif Qədimbəyli və Ənvər Qədimbəyli heç kimə qulaq asmır. Bizim üstümüzə pul yığmaq üçün “qoçular” göndərirlər. Onlar bizi təhqir edirlər və hədə-qorxu gəlirlər. Buna baxmayaraq, heç bir sahibkar onlarla razılaşmayıb”.

Belə bir vəziyyətdə sahibkarlar nə etməlidir?

Audit üzrə mütəxəssis, ekspert Elçin Qurbanov “Bakı-Xəbər”ə açıqlamasında bildirdi ki, bu cür məsələlər müqavilə ilə həll edilir:

“ Müqaviləni imzalayan tərəflər mülki hüququn subyekti sayılır. Onların qarşılıqlı öhdəlikləri bağladıqları müqavilələrin şərtləri ilə müəyyənləşir. Hüquqi öhdəliklər də yalnız müqavilədən doğur. Mülki qanunvericiliyin prinsiplərindən biri də, mülki hüquq subyektlərinin iradə sərbəstliyidir. Bu səbəbdən də, bu cür məsələyə qiymət vermək üçün,  müqavilə şərtlərinə fikir vermək lazımdır. Əgər müavilədə “fors major” hallar üçün qiymət artımı nəzərdə tutulmursa, o zaman sahibkardan heç nə alına bilməz. Eyni zamanda, kvadratın qiymətində dəyişiklər də oluna bilməz. Belə hallarla bağlı razılaşma hər iki tərəfin istəyi əsasında baş verə bilər. Sahibkarlara əlavə öhdəliklərin qoyulması yolverilməzdir. Belə əməldən zərər çəkən sahibkarlar məhkəməyə müraciət edə bilər. Bazar rəhbərliyi hansısa yeniliyi edirsə, bu o demək deyil ki, sahibkar onların bütün tələblərini yerinə yetirməlidir. Həmin sahibkarlar əlavə ödənişdən yayına bilərlər. Müqavlənin vaxtı bitməyibsə, sahibkarı dükanından heç kim çıxara bilməz. Hətta onun alverinə bazar mane olursa, bununla bağlı da sahibkar əlavə iddia qaldıra bilər”.

Məhəmmədəli QƏRİBLİ

Peşə etikası

Son xəbərlər