22 il neft sektorunda işləyən Pənahlı attestasiyadan keç(iril)mədi - öz yaxın adamlarını saxladılar...

img

46 yaşlı Rəhman Pənahlı 22 il neft sektorunda çalışıb. Bu ilin mayına çalışdığı Dövlət Neft Şirkətinin “Azneft” İstehsalat Birliyinin 1 saylı İxtisaslaşdırılmış neft- mədən xüsusi texnika İdarəsindən işdən çıxarılıb. Rəhman Pənahlı qeyd edir ki, ona əvvəlcə attestasiyadan keçə bilmədiyi, sonradan isə əmək müqaviləsinin müddətinin bitməsi səbəb gətirilərək işdən çıxarıldığı bildirilib.

Şikayətçinin dediyinə görə, onunla bərabər 150 işçi attestasiyaya cəlb edilib. Onu aşağı bal topladığına görə işdən çıxarıblar, lakin rəhbərliyə yaxın şəxslər heç bal toplamadığı halda işdə saxlanıb: “22 ildir sürücü-maşinist vəzifəsində çalışıram, bu sahə üzrə peşə məktəbini bitirmişəm. İndi isə deyirlər ki, sualları cavablaya bilməmisən. Ədalətli qərar vermədilər, niyə işçi rəhbər şəxslərə yaxın olanda attestasiya nəticəsi nəzərə alınmır?”.

  • “Azneft” İstehsalat Birliyi: “Rəhman Pənahlı əmək müqaviləsinin müddəti bitdiyi üçün işdən çıxarılıb”

Məsələ ilə bağlı “Azneft” İstehsalat Birliyindən bildirildi ki, Rəhman Pənahlı əmək müqaviləsinin müddəti bitdiyi üçün işdən çıxarılıb. Ona iş təklif edilsə də, qəbul etməyib.

  • Hüseyn Axundov: “İşçi səbəbsiz yerə çalışdığı yerdən çıxarılırsa, bununla bağlı məhkəməyə müraciət edə bilər”

Hüquqşunas Hüseyn Axundov qeyd etdi ki, işçilər öz hüquqlarını bilmədiklərinə görə, işə götürən şəxslər də onların hüquqi savadsızlığından istifadə edərək bəzən qanunvericiliyin tələblərini tam şəkildə tətbiq etmirlər: “İşdən azad olunma mərhələsində isə əgər işçi öz təşəbbüsü ilə işdən azad olmaq istəyirsə ən azı bir ay öncədən rəhbərliyə məlumat verməlidir. Əmək müqaviləsinin işəgötürən tərəfindən ləğv edilməsi isə əmək məcəlləsinin 70-ci maddəsinin tələblərinə uyğun gerçəkləşdirilir. Bəzən mövcud proseslərin gedişatı zamanı işçilərin hüquqları çox kobud şəkildə pozulur. Məsələn, işəgötürən işçini işdən azad etmək istəyəndə ona təzyiq göstərərək öz istəyi ilə ərizə yazmasını tələb edir. Belədə, işçi çox nizam-intizamlı, öz işini müvafiq müqaviləyə uyğun şəkildə davam etdirən kadr olsa da, öz istəyi olmadan ərizə yazması nəticəsində Əmək Məcəlləsinin 68-ci maddəsinə uyğun olaraq işçinin əmək müqaviləsinə xitam verilir. Eyni zamanda, əgər işəgötürən 70-ci maddənin A və B bəndinə əsasən işçini işdən azad etmək istəyirsə, işçinin əmək təcrübəsinə uyğun olaraq onu əvvəlcədən məlumatlandırmalıdır.Yəni müəyyən müddətdən sonra işçini işdən azad edəcəyi ilə bağlı ona xəbərdarlıq etməlidir. Əks təqdirdə işəgötürən vaxtından əvvəl öz təşəbbüsü ilə əmək müqaviləsinə xitam verirsə işçinin əmək stajına müvafiq şəkildə kompensasiya ödəməlidir. İşçi səbəbsiz yerə çalışdığı yerdən çıxarılırsa bununla bağlı məhkəməyə müraciət edə bilər”.

Günel CƏLİLOVA

Peşə etikası

Son xəbərlər