Ruhun işığıyla yazılan kitablar - Zaur Bayramoğlu... - FOTO

img

İyunun 21-də «Libraff» mağazalar şəbəkəsinin «Park Akademiya» filialında qazi-yazar, dünyaya gözlərinin deyil, ruhunun işığı ilə baxan Zaur Bayramoğlunun «Bookzone» nəşriyyatında işıq üzü görmüş «Alabaş»«Qara mamba» kitablarının təqdimetmə mə­ras­imi keçirildi.

Bu mərasim hər halı ilə başqa mərasim və ya kitab təqdimatlarından seçilirdi. Birinci ona görə ki, vətən qazisi Zaur dünya işığından məhrum olduğu kimi, yazan əlləri də əngəllidir. Amma fədakarlığı, yaşama umudu və mücadiləsi o qədər güclü­dür ki, Zaura «dünya işığından məhrum və ya əlləri əngəllidir» ifadələrini işlətməyə peşman oluram. Onun heç bir əngəli yoxdur, bizlərdən fərqli olaraq həyata ruhunun işığı ilə baxır. Demək, o həyata o cür baxmaq daha gözəlmiş, Zaurun yaratdıqları bunu sübut edir. İkinci səbəb isə müəllifin fərqli qonaqları idi. Onlar Zaurun Xüsusi Təyinatlıları­mızın Vətən müharibəsində keçirdikləri misilsiz əməliyyatlardan bəhs edən «Pusqu» povestinin canlı qəhrəmanları kapitan Nicat Əbdürrəhmanov, baş gizir Mahir Məmmədov və gizir Ələmdar Mehdiyev idilər. Sinələri orden və medallarla dolu olan igidlərimizin zala əzəmətli girişini təqdimata toplaşanlar alqışlarla qarşıladı. Hər kəsin qürurdan ürəyi dağa dönmüşdü. Aslan oğullarımız nə qədər şöhrətli və şərəfli olsalar da, çıxış edərkən son dərəcə mütəvazi idilər, keçdikləri döyüş yollarından deyil, Zaurun qəhrəmanlıq­larından danışdılar. 

Zaur doğrudan da Azərbaycan Ordusunun və milli dəyərlərimizin mübariz simasıdır. İndiyədək yazdığı 6 kitabının əksər qəhrəmanları döyüşən əsgərlərimizdir, vətən mühari­bəsidir. Azərbaycanın əsgər və zabit heyətinin Qarabağ uğrundakı rəşadətli mübarizəsini əks etdirən əsərlər yazır və onu minbir əziyyətlə də olsa çap etdirib cəmiyyətə təqdim edir. Ağır kəllə-beyin kontuziyalı, beyni qəlpələrlə dolu, gözdən əlil və sol əlinin iki barmağı ilə yazan Zaur Bayramoğlu artıq altı kitab müəllifidir: “Döyüşlə kəşfiyyat” (2020), “Öz üzərində qələbə” (2020), “Adını sən qoy” (Bakı, 2021, mart), “Adını sen koy” (Ankara, 2021, noyabr). «Alabaş» və «Qara mamba» (Bakı 2022). 

Zaur Bayramoğlunu ilk dəfə kitabının təqdimatında gördüm, bu qədər qəhrəmanlığın sahibi o qədər də səmimi, zərif təbiətli, sənət ruhludur. Üzündə zərrə qədər yaşadıqlarının peşmançılığı, üzüntüsü hiss olunmur, əksinə,  həyat dolu, yaşama tutqun, dirənişli və umutludur. Həyatı ondan öyrəniləcək qədər də sağlam duruşa sahibdir, üzündəki təbəssüm ətrafına yansıyır. Bunu təkcə mən hiss etmədim, bütün iştirakçılar və çıxış edənlər də qəhrəman qazimizin hər halına heyran idilər.

Zaur Bayram oğlu Muradovu – qəhrəman qazimizi cəmiyyətimizə, xüsusilə gəncləri­mizə tanıtmaq istəyirəm. O, 1978-ci ildə Naxçıvan Muxtar Respublikası Culfa rayonunun Milarx kəndində ziyalı ailəsində dünyaya gəlmişdi. 1995-ci ildə orta məktəbi bitirdikdən sonra Bakı dövlət Universitetinin Tarix fakültəsinə daxil olmuşdu. 1999-cu ildə təhsilini qiyabi davam etdirməyi qərara alıb hərbi xidmətə yollanır.  Həmin ilin aprel ayında xidmətdə fərqləndiyinə görə hərbi hissə komandiri tərəfindən kiçik çavuş rütbəsi ilə mükafatlandırılır. İyul ayında qatıldığı XTQ seçimlərini uğurla keçərək, həmin sistemdə təhsil almağa göndərilir. Kursu uğurla bitirən Zaur Muradov «N» saylı hərbi hissədə xidmətə başlayır.  Bir çox döyüş və kəşfiyyat tapşırıqlarını uğurla yerinə yetirən gizir Zaur Muradov 2001-ci ildə yenə də vəzifə borcunu şərəflə yerinə yetirərkən minaya düşüb gözlərini itirib və altı barmağı amputasiya edilib.

Onu da qeyd edim ki, məni bu tədbirə əqidə dostum, vətənpərvər xanım, şəxsinə böyük hörmət və sevgi bəslədiyim Rəsmiyyə Rzalı - Qarayeva dəvət etmişdi. Məhz Zaur kimi igidi mənə yaxından tanıtdığına görə bu xanıma o qədər minnətdaram ki… Həmin tədbirdə mən də söz aldım. Ürək sözlərimi söylədim. Yaşadığım Yevlax şəhərində ölkəmizin hər yerində olduğu kimi şəhid ailələrinə, qazilərə göstərilən diqqət və qayğıdan bəhs etdim. Zaur Muradova Vətən müharibəsində Yevlaxdan olan 65 şəhidimizin həyat və döyüş yolundan bəhs etdiyim «Biz Vətən üçün doğulduq» adlı kitabımı hədiyyə etdim.    

Əminəm ki, ömrünün xəyallarla, ümidlərlə dolu yaşlarında vətəni üçün gözlərindən, canının bir parçasından keçən gənc Zaurun həyatı gəncliyimizə, gələcəyimizə böyük nümunə olacaqdır. Əlbəttə, istəmərik müharibə olsun, övladlarımız şəhid olsun, yarımcan olsun. Amma istərdik ki, qəhrəman qazimiz Zaurun həyatı gənclərimizə yaşama umudu, dirənişi, nağıl qəhrəmanı, öz küllərindən doğan, yenidən həyata dönən Anka quşu kimi örnək olsun.

Əminə YUSİFQIZI,
Respublikanın əməkdar jurnalisti

Peşə etikası

Son xəbərlər